Қытай құрамасындағы қазақ балуаны
Сейсенбі, 3 сәуір 2012 7:35
Астанада Елбасы Нұрсұлтан Назарбаевтың жүлдесі үшін күрес түрлерінен өткен халықаралық турнирде еркін күрестен Қытай ұлттық құрамасында қазақ балуанының белдескенін көрдік. Аты-жөні – Ерланбек Кәтейұлы екен. 1990 жылы Қытайдың Шыңжаң-Ұйғыр автономиялы ауданы Алтай өлкесінің Қызылтас қаласында туған. Күреспен айналысқанына 5-6 жыл болыпты. Қазір 66 кило салмақта Қытай құрамасында белдеседі.
Сейсенбі, 3 сәуір 2012 7:35
Астанада Елбасы Нұрсұлтан Назарбаевтың жүлдесі үшін күрес түрлерінен өткен халықаралық турнирде еркін күрестен Қытай ұлттық құрамасында қазақ балуанының белдескенін көрдік. Аты-жөні – Ерланбек Кәтейұлы екен. 1990 жылы Қытайдың Шыңжаң-Ұйғыр автономиялы ауданы Алтай өлкесінің Қызылтас қаласында туған. Күреспен айналысқанына 5-6 жыл болыпты. Қазір 66 кило салмақта Қытай құрамасында белдеседі.
Осы турнирде Е.Кәтейұлын еріктілерден сұрастыра жүріп таптық. Ол ашықжарқын жігіт екен. Бізге шағын сұхбат беруге бірден келісті. Әуелі қашан, қай жылы туғанын, Қазақстанға алғаш рет келіп отырғанын, бабалар мекеніне келгеніне қуанышты екенін жасырмады. Содан кейін өзі Шыңжаңда туса да қазір ішкі Қытайдың Гуанчжоу аймағында жаттығатынын, екі жылдан бері Қытай ұлттық құрамасында өнер көрсететінін айтты. Қытайда одан басқа Қуатбек, Дәуітнұр, Орынбек деген балуандар да бар екен. Ал өзін күреске ағасы Нұрланбек әкелген көрінеді. Сөйтсе де алғашқы бапкерлері Темірбек пен Серік деген азаматтар болыпты. Солардың қарамағында жаттыға жүріп, ұлттық құрамаға ілігіпті. Қытайдың құрамасына ілігудің өзі қиынның қиыны екені белгілі. Әсіресе, миллиардтан астам халықтың ішінде өз салмағында орын табу орындалмайтын арман сияқты көрінеді. Десек те, қандасымыз сондай тар жол, тайғақ кешуден өтіп, 70 балуанның ішінде өз салмағында №1 атанып, құрама сапына қосылыпты.
Әңгіме кезінде ол осы турнирде бесінші орын алғанын айтты. Күресте Олимпиада жолдамасын алған Ақжүрек Таңатаровпен белдесіп, ұпай саны бойынша жеңіліп қалғанын білетінбіз. Осы белдесуде Ақжүрек Ерланбектің әуелі қазақ екенін білмепті. Кейін, белдесу біткен соң Ақжүрекке қазақша: «Рахмет, аға!» дегенінде ғана Таңатаров қарсыласының қандасы болғанына таңқалыпты. Содан екеуі оңаша кездесіп, ұзақ әңгімелесіп, сыр бөліскен екен. «Олимпиадаға қазақ баласы жолдама алса болды ғой. Мен жеңілгеніме өкінбеймін. Алда тағы екі жолдама беретін жарыс өтеді. Сол жерде бағымды тағы да сынап көремін», дейді ол.
Дастан КЕНЖАЛИН.
Суретті түсірген Еркебұлан ЕРҒАЛИ.