Ағымдағы егін егу науқанын жүргізу үшін шамамен 2,5 млн тонна тұқым егіліп, 471,4 мың тонна тыңайтқыштар салу жоспарланған. Әртараптандыру шеңберінде астық дақылдарының (арпа, сұлы, бұршақ және ноқат, бидай үшін жүгері), көкөністер мен қауындар, картоп және жем-шөп дақылдары егілетін алқаптар кеңейтілді.
Бірінші вице-министр өндірісті әртараптандыру мақсатында Ауыл шаруашылығы министрлігі Солтүстік Қазақстан облысының әкімдігімен бірлесіп «Солтүстік соя» бағдарламасының әзірленгенін хабарлады. Бағдарлама солтүстік өңірлерде соя өнімдерін өндіруде ауыл шаруашылығы тауарларын өндірушілерге көмек көрсетуге бағытталған. Солтүстік Қазақстан облысында ағымдағы егіс науқаны аясында 14 мың гектар егілді. Жалпы алғанда, «Солтүстік соя» бағдарламасын іске асыру 5 жылда 1,5 млн гектарға дейін соя өсіру алаңдарын ұлғайтуға, кірісін гектарына 30 центнерге дейін арттыруға, жалпы өнімді 3,2 млн тоннаға дейін өңдеуге арналған жабдықтарды және экспортты ұлғайтуға мүмкіндік береді, бұл өз кезегінде өнімдер экспортын арттырып, жұмыс орындарының санын көбейтіп, өнімділікке ықпалын тигізеді.
«Проблемалары бар агрохолдингтер бойынша көктемгі егіс жұмыстарының жүргізілуі туралы жекелей айта кеткен жөн. Тиісті жұмыстар атқарылды, агрохолдингтердің 1,6 млн гектар көлеміндегі егіс алқабына егін салу бойынша жоспарланған шаралар орындалды, жалақы және салық бойынша мәселелер шешілді. Биыл күзде үлескерлер өздерінің дивидендтерін алады», деп нақтылады Ауыл шаруашылығы бірінші вице-министрі.
Айдарбек Сапаров атап өткендей, Қазақстанда отандық машина жасау саласына көңіл бөлінуде. «Жақында Премьер-Министр А.Маминнің Мәскеуге сапары кезінде РФ Премьер-Министрі Д.Медведевпен бірге ынтымақтастық туралы меморандумға қол қойылды. Қазақстанда К-744 комбайндарын жинау туралы келісімге қол жеткізілді. Қостанайда комбайндар, Көкшетауда КамАЗ-дар құрастырылатын болады. Бізде құрастырылатын техникаға 25% субсидия ұсынылады. Қосымша тағы 10% жергілікті бюджеттен берілуі мүмкін», деді А. Сапаров.
«ҚазАгро» ҰБХ АҚ басқарушы директоры Асылхан Джувашев ауыл шаруашылығы техникасының лизингін қаржыландыру тетігі туралы айтып берді. «Жыл сайын техниканы 6%-ға дейін жаңарту қажет. Бүгінгі таңда техника жылына 1,5-2%-ға жаңартылады. Осыған байланысты «ҚазАгроҚаржы» белсенді жұмыс жүргізіп жатыр», деді А.Джувашев.
Қазіргі кезде Ауыл шаруашылығы министрлігінің сыйақы мөлшерлемесін субсидиялау бағдарламасын енгізуі арқылы сыйақы мөлшерлемесін жылына 4-6%-ға дейін тиімді төмендету мүмкіндігі пайда болды. Нәтижесінде, тапсырыс көлемі өткен жылғы тапсырыс көлемінен 1,5 есеге артты.
