Осыдан 30 жыл бұрын – 22 маусым күні Қазақстан қоғамы бірінші басшы лауазымына Нұрсұлтан Назарбаев әлдеқашан лайықты болса да сол кездегі Орталық билік, яғни КОКП Бас хатшысы М.Горбачевтің ойнамалы саясатынан көңіліміз алаңдап, жүрек тыныш таппай, «86-шы жылдағыдай тағы қандай күтпеген оқиға болуы мүмкін», деп Орталық комитетке келіп едік. Алматы қаласында таңертең аздап жылы жаңбыр жауып, күн жадырап шыққан. Оны жақсылыққа жорыдық...
Пленум ашылып, мінбеге Мәскеудегі одақтық Орталықтың өкілі – КОКП Орталық комитеті Саяси бюросының мүшесі, КОКП ОК-ның хатшысы В.М.Чебриков көтерілгенде, «не айтар екен?» деп, зал сілтідей тынды. Мәскеу өкілінің аузынан «Нұрсұлтан Назарбаев» деген сөз шыққанда залда отырған бес жүз адам жылы қарсы алып, ұзақ қол соғып, қолдау көрсетіп еді.
Дәл осы күні Қазақстан Компартиясы Орталық Комитетінің ХV пленумы өткізіліп, осыған дейін Қазақ КСР-і Министрлер кеңесі Төрағасы қызметін атқарған Нұрсұлтан Әбішұлы Назарбаев көп тілеуі көл болып, Қазақстан Компартиясы Орталық Комитетінің бірінші хатшысы болып сайланды.
Сол күннен бастап Қазақстан басшысының республика жұртшылығының мүддесіндегі әрбір сөзі, әрбір бастамасы қалың елдің көңілінен шығып, Мәскеудегі Орталық билік біздің басшымызбен санасатын болып, еңсеміз көтеріле бастады.
Осылайша Қазақстанның жаңа дәуірі басталып еді...
Нұрсұлтан Әбішұлы бірден одақтық институттардың ескіргенін, заман талабынан қалып қойғанын, әсіресе экономика, ұлт, басқарушы аппарат, кадр мәселелерінің шамадан тыс орталықтанып кеткенін, көптеген әдіс-тәсілдердің, кейбір шешімдердің әділетсіздігін, қаулы, қарарлардың жарамсыздығын одақтық мәртебелі жиындардың мінберінен ашық, батыл сынға алды.
Бірер мысал: 1986 жылғы 17-18 желтоқсандағы студент-жастардың шеруіне байланысты 1987 жылы КОКП Орталық комитеті арнайы қаулы қабылдап, сол құжатта «казахский национализм» деп баға берген. Нұрсұлтан Әбішұлы осы қаулының әділетсіздігін дәлелдеп, әлденеше рет Саяси бюрода көтеріп жүріп, қаулының күшін жойғызды. Бұл билеуші Компартия тарихында бұрын-соңды болмаған оқиға еді.
Бірінші хатшы болып сайланысымен бір айдан кейін Қарағандыдағы шахтерлер ереуілін тоқтатып, олардың талап-тілектерін шешу жолдарын белгіледі.
Ұлы Отан соғысындағы еңбегі, ерлігі қазақ шеңберінен алысқа шығып жүрсе де лайықты бағасын ала алмаған Бауыржан Момышұлына Кеңес Одағының Батыры атағын бергізді.
Мемлекеттік басқаруды жаңғыртып, Республика Президенті лауазымын кіргізді. Семейдегі ядролық полигонды жапты.
Космодром қазақ жерінде болса да ғарышкерлері болмаған елдің екі ұланы – Тоқтар Әубәкіров пен Талғат Мұсабаевты ғарышқа ұшырды.
Дүние жүзі қазақтарының тұңғыш құрылтайын өткізіп, тәуелсіздік жылдары 1 миллионнан астам отандасымыздың Қазақстанға келуіне есік ашып, жағдай туғызды.
Осы сияқты еліміздің мәртебесін көтерерлік ғасырлар бойы арман болған тәуелсіздік жеңістеріне Тұңғыш Президентіміз – Елбасы бастамашы болды.
Елбасы Нұрсұлтан Назарбаевтың мемлекет қайраткері деңгейіндегі қызметі халқымыздың дәстүрі мен даңқын асырар Ұлы дала кеңістігіндегі абыздықтың даңғыл жолына ұласты.
Қуаныш СҰЛТАНОВ,
Парламент Мәжілісінің депутаты
