Біз – көп балалы отбасымыз. Төрт балам да мектепте оқиды. Күйеуім мемлекеттік мекемеде жүргізуші, өзім де Теректі ауданы әкімдігіндегі бір бөлімде хатшы болып қызмет етемін. Екеуміздің де айлық еңбекақымыз елдегі ең төменгі жалақы қатарына жатады. Оның үстіне пәтер жалдап тұрамыз.
Өмір болған соң басымыздан түрлі жағдай өткеріп жатамыз ғой. 2014 жылы екінші деңгейлі банктердің бірінен тұрмыс қажеті үшін 300 мың теңге несие алдым. Үш жылға есептеп алған несиемді 1,5 жылдай уақтылы төлеп тұрдым. 2016 жылы күйеуім аяқ астынан жұмыссыз қалды. Қиналдық. Несиені уақытында төлеу түгілі, күнделікті тұрмыс қажетін табу қиын болды. Сөйтіп, ойламаған жерден банкке борышты болдық.
Әрине «алмақтың да салмағы» барын түсінеміз. Бірақ күтпеген кедергі жоспарды бұзды. Осындай қиын жағдайға тап болдық. Одан бергі сот шешімдері жығылғанға жұдырық болды. Бүгінгі нәтижесі – банкке әлі 400 мың теңгедей борыштымын. Оның үстіне сот орындаушысына 80 мың теңге төлеуге тиістімін. Қазір ай сайын онсыз да аз жалақымның тең жарымы сот шешімі бойынша «ұсталып», қарызды өтеуге аударылып отырады.
Міне, Президентіміз айтқан «Өмірлік қиын жағдайда қалған Қазақстан Республикасы азаматтарының» бірі біз ғой деп ойлаймын. Мемлекет басшысы Жарлығының мақсаты – қиын жағдайға тап болған азаматтарға көмектесу, оларға өздерінің отбасыларының қаржылық ахуалын айтарлықтай жақсартуға мүмкіндік беру екені сөзсіз. Шынымен де бұл үлкен көмек болмақ!
Айта кетейін, біздің отбасы біраз жылдан бері тұрғын үй кезегінде тұрмыз. Теректі ауданы орталығында су жаңа үш қабатты тұрғын үй құрылысы аяқталуға жақын қалды. Бұйырса, осы үйден үш бөлмелі пәтер тиеді деп қуанып, өз баспанамыздың табалдырығынан аттар сәтті күн санап күтіп жүрген едік. Бүгінгі жылы хабар жүрегімізді одан сайын жылытты. Мемлекеттің елдегі көп балалы отбасыларына қамқорлығы күн санап күшейіп келеді. Біз осыны сезініп отырмыз.
Альбина САРБӨПЕЕВА,
көп балалы ана
Батыс Қазақстан,
Теректі ауданы
