Қазір оның құс қорасында әлемде сирек ұшырасатын кептердің бірнеше түрі бар. «Әрқайсысының құны бір қойға тең», деп Василий Старковтың қалжыңдап қоятыны бар. Десе де әзіл астарында шымшымдай шындық жатқанын аңғару қиын емес. Мәселен, кептердің «салпықанат» деп аталатын түрі қарасаң көз тоймайтын әдемі. Сонысын сезетіндей өзін паң, маңғаз ұстайтынын қайтерсің! Түрлі көрмелерге қатысып, олжа салыпты. Бір маусымда бес-алты балапан басып шығарып, бір аптадай сүтпен қоректендіреді екен. Сүті ірімшік секілді қоймалжың болады. Бір тәуірі, кептерлердің күтімі жеңіл, азық талғамайды. Кәсіпкердің айтуынша, ағзасынан сүт бөлетін құстар санаулы ғана.
Василий декоративті көгершіндерден басқа бөдене, сәндік тауық та өсірумен шұғылданады. Осыдан бірнеше жыл бұрын оңтүстік жақтан екі тауыс әкеліп, биыл алғаш рет жұмыртқа басып, балапан өрбітіпті. Енді қырғауыл өсірмек ойы бар.
Төрткүл дүниеде көгершіннің бір мыңнан астам түрі кездеседі. Өкініштісі сол, біз сияқты егде тартқан жандар болмаса, асылтұқымды құстарды өсіруге, көбейтуге жастар жағы қызығушылық таныта бермейді. Қиынсына ма, әлде мойындары жар бермей ме, білмеймін. Менің пайымымша, қоршаған ортаға, табиғатқа деген жанашырлық көзқарас аң-құстарды аялаудан, мәпелеуден басталады. Қатыгез, тасбауырлықтан жирендіріп, бауырмалдыққа, мейірімділікке тәрбиелейтін өзіндік мектеп екенін ұғынатын мезгіл жетті. Осы жағына жете мән берілсе, құба-құп болар еді дейді кейіпкеріміз мәселенің бір ұшығын шығарып.
Солтүстік Қазақстан облысы
