Мәселен, Сенат депутаттары Нариман Төреғалиев пен Ерболат Мұқаев Батыс Қазақстан облысына жұмыс бабындағы сапар аясында бірнеше ауылдарда болып, жергілікті халықпен кездесті.
Жаңабұлақ ауылдық Мәдениет үйінде жергілікті атқарушы орган өкілдері, мәслихат депутаттары, ауылдық округ әкімдері, басқа да мекеме басшылары және тұрғындармен болған кездесуде атаулы әлеуметтік көмекті тағайындау, төртінші деңгейлі бюджетке көшу, салық жинау, тұрғын үй кезегі мәселелері көтерілді.
Сенаторлар жұмыс сапарын аудан орталығында одан әрі жалғастырып, 100 орындық интернат, 300 орындық мектеп-гимназия, 3 қабатты коммуналдық тұрғын үйдің құрылысымен танысты.
Сондай-ақ Н.Төреғалиев пен Е.Мұқаев Бударин ауылдық округіндегі «Атамұра» шаруа қожалығында да болды. Шаруа қожалықтары көктемгі және күзгі далалық жұмыстар кезінде жанармай бағасының қымбаттайтынын айтып, маусым кезінде жеңілдік беруін немесе субсидия бөлуін сұрады.
Арыс қаласының балалары 12 шілде мен 3 тамыз аралығында демалу үшін Алматыға келген болатын.
Олар қала маңында орналасқан «Өрнек» жазғы сауықтыру лагерінде демалады. Төтенше жағдайлардан зардап шеккен 150 бала сауықтыру шараларынан өтуге және уақытын жақсы өткізуге мүмкіндік алып отыр. Жас қонақтардың алғашқы тобын алматылықтар перронда күтіп алды. Парламент Сенатының депутаты Динар Нөкетаева да жас меймандарды қарсы алушылардың арасында болды. Сенатор жеткіншектермен әңгімелесіп, олардың бәріне демалыстарының жақсы өтуіне тілектестігін білдірді.
Мәжіліс депутаттары Асылбек Смағұлов пен Наталья Жұмаділдаева аймақтарда сайлаушылармен кездесуде.
Тұрғындармен кездесулер барысында депутаттар азаматтардың өзекті мәселелерін талқылап, өздерінің заң шығарушылық жұмысы, Мәжілістің қызметі туралы әңгімеледі.
Осындай шаралардың бірі Қарағандыда өтті. Халық қалаулылары Ішкі істер министрлігінің академиясында аймақтағы құқық қорғау органдарының қызметкерлерімен кездесті.
Кездесуде Мемлекет басшысының тапсырмалары мен еліміздің экономикалық және әлеуметтік саясаты туралы айтылды.
Мәжіліс депутаттары Магеррам Магеррамов және Наринэ Микаелян Қостанай облысының Рудный қаласында сайлаушылармен кездесті.
Депутаттар әкімдікте прокуратура, сот, полиция, өрт сөндірушілер мен басқа да салалар өкілдерімен кездесіп, облыстың әлеуметтік нысандарын аралап, этномәдени орталықтарға барды.
Осы күні Мәжіліс депутаты Тұрғын Сыздықов арнайы әлеуметтік қызметтер сапасына байланысты Ақмола облысының Бурабай ауданында кездесу өткізді.
Щучье қаласындағы арнайы әлеуметтік қызметтер орталығына барған депутат ондағы қызмет көрсету сапасымен, жабдықтармен танысты.
Шымкент қаласында Мәжіліс депутаты Нұржан Әлтаев бірқатар кездесулер өткізді.
Депутат «Continental Logistics Shymkent» көлік-логистикалық орталығының жұмысымен танысып, ұжымымен кездесті.
Мәжіліс депутаттары Қанат Мусин, Шавхат Өтемісов Батыс Қазақстан облысы Зашаған кентіндегі «Нұрлы жер» бағдарламасы бойынша салынып жатқан 9 қабатты үйдің құрылысымен танысты.
«Нұрлы жер» мемлекеттік тұрғын үй құрылысы бағдарламасының негізгі мақсаты – халық үшін тұрғын үйдің қолжетiмдiлiгiн арттыру.
