Қоғам • 17 Шілде, 2019

Субсидияның көмегі зор, бірақ әуресі көп

147 реткөрсетілді

Үкіметтің кеңейтілген оты­ры­сында Президент Қа­сым-Жомарт Тоқаев ауыл ша­руа­шылығы еңбеккер­лері­нің мемлекеттік қолдау талап­тарының жиі өзгеруіне байланысты шағымдарының орынды екенін айтты. Мемлекет бас­шысы айтқандай, мұндай өзгерістер дұрыс инновациялық шешім қабылдауда қиындықтар тудырып, агробизнестің тартымдылығы мен табысты­лығын төмендететіні, кәсіп­кер­лердің ертеңгі күнге деген се­німін жоғалтатыны рас. Соған орай, Мемлекет басшысы Үкі­метке ауыл шаруашылығы сая­сатында қысқа және орта мер­зімдік басымдықтарды айқын­дап, олардың негізінде қолдау тетіктерін тұрақтандыруды тапсырды. Ауыл шаруашылығы – басшылығының араларында сабақтастық жоқ жалғыз сала екенін айтып, сынға алды. Гербицидтер мен тұқым қорын жаңартуға, ауыл шаруашылығы техникасы паркін жаңғыртуға, агротехнологиялар мен тұ­қым­ды жаңалауға бөлінетін субсидиялардың тиімділігіне де күмән келтіретінін айтты.

Ауыл шаруашылығы саласында ұзақ жылдар қызмет етіп келе жатқандықтан бұл мәселе бізге жақсы таныс, яғни Президенттің сыны негізсіз емес. Ауыл шаруашылығын дамыту мақсатында көрсетіліп келе жатқан мемлекеттік қол­даудың шарапатын біздің өн­дірістік кооператив те сезінді. Төлеби ауданы, Кемеқалған ауылдық округіне қарасты Абай ауылындағы 110 гектарға Италиядан алманың төрт сұрыпын, яғни 270 мың көшет әкеліп ектік. Жыл сайын аздап салғанмен, үш жылдан соң 80 тоннаға дейін өнім алуға, оны эскпорттауға болады. Әрине жобамыз мемлекеттің қолдауымен, «Аграрлық несие корпорациясы» АҚ арқылы қаржыландырумен жүзеге асты. Әрқайсысының құны 4-7 доллар тұратын көшетті науқан кезінде 180 адам жабылып егіп, қазір тамшылатып суару күтімін 150-дей маман атқаруда. Яғни, мемлекеттік қолдаудың септігімен ісіміз алға басып, жаңа жұмыс орындарын ашуға мүмкіндік туды. 

Осы арада айта кетерлік жайт, субсидия беруде жүйе­сіздік бар. Мысалы, Еуропа ел­дерінен әкелінетін бірқатар алма сұрыпына берілгенімен, көрші өзбек елінен әкелгенге берілмейді. Кәсіпкердің бірі алған субсидияны екіншісі ала алмайды. Сондай-ақ әр гектарға жұмсалатын шығындар да дұрыс есептелмейді, көп жайт­тар ескерусіз қалады. Ша­руа­лар қосымша шығындануға мәжбүр болады. Талаптар да жиі өзгереді. Тізе берсек, кем­шілігі көп. Ал шаруалардың ұсыныс-пікірлері ескеріле бер­мейді. Шынтуайтында, шаруа­лардың иығындағы жүкті жеңіл­детуге субсидияның кө­мегі мол. Алайда, оны алу оңай емес. Субсидия соңғы жыл­­дары шаруалардың көптен бе­рі көкейінде жүрген өзекті мәсе­­ле. 

Шаруа қожалықтары енді Президенттің тапсырмасы­мен бұл мәселе жан-жақты зерт­теліп, халықтың ұсыныс-пі­кірлері ескерілсе түбегейлі шешімін табады деген сенімде. 


Әсет ҚАЙЫПБЕКОВ, 
Түркістан облыстық мәслихатының депутаты, «Қазығұрт бақтары» өндірістік кооперативінің басшысы
Түркістан облысы

Баннер
Соңғы жаңалықтар

Өркениетке бастаған өрелі істер

Қазақстан • 21 Тамыз, 2019

Ұқсас жаңалықтар