Айта кетерлігі, Көккөлді көргісі келетін туристердің саны да жыл санап артып келеді екен. Тіпті жергілікті тұрғындар мұнда жол болмаса да жыл сайын шетелдік туристер келіп, құпияға толы көлді тамашалайтынын айтады. Алайда, бүгінде бұл жерді туристік орталыққа айналдыру мақсатында жұмыстар да атқарылуда.
Жалпы, бұл көл жергілікті тұрғындардың арасында «Әулиекөл» атанып кеткен. Сонымен қатар жұрт «Әулиекөл» атайтын ерекше көлге қатысты аңыздар да көп. Мәселен, кейбір тұрғындар мұнда айдаһар бар десе, енді бірі ақырған бураны көргендерін айтады. Сондай-ақ бір аңызда бұл жерді жыланбасты, мойыны ұзын, бір өркешті түйеге ұқсайтын мақұлықтың да мекендейтіні айтылады. Себебі көл бетімен ұшқан барлық құс, су ішуге келген мал атаулы ғайыптан тайып, суға тартылып кетеді екен. Алайда, аталған көл осы уақытқа дейін толық зерттелмей, жұмбақ күйінде қалып келеді. Ал Көккөлді ерекше дейтініміз, әуелі көлдің аумағы жүрекке ұқсас. Сондай-ақ бұл көлге ешқандай да ағын су келіп қосылмайды. Өзі де ешқайда су жібермейді. Бірақ судың деңгейі төрт маусымда да бір қалыпта тұра береді екен. Өлкетанушы Серік Құралбаевтың айтуынша, түпсіз көлге кеңестік кезеңде түрлі экспедициялар да ұйымдастырылғанымен, одан ешқандай нәтиже шықпапты. Содан осы уақытқа дейін көлдің тереңдігі де анықталмаған.
Қазақ даласында құпияға толы жерлер аз емес. Ал Көккөлдің құпиясы әлі күнге дейін жергілікті жұртшылықтың таңданысын тудырып келеді. Мәселен, көл айдынында ешқандай қоқыс немесе жапырақ жатпайды екен. Су бетіндегі ультрадірілден суға түскен кез келген зат сыртқа шығып кетеді. Құлама жартасты өткелдері бар құпияға толы бұл көлдің зерттелу тарихы енді болашақтың еншісінде.
Жамбыл облысы
