Міне, бірнеше аптадан бері елімізде ми қайнатар ыстық толастамай тұр. Қапырық ауаның кесірінен өңірде өрт оқиғалары да жиілеп кетті. Әсіресе ашық алқаптардағы құрғақ шөптің жану деректері соңғы күндері көп тіркеліп отыр. Облыстық Төтенше жағдай департаменті баспасөз қызметінің таратқан деректеріне сүйенсек, аймақта тек екі тәулікте 10 өрт оқиғасы тіркеліп, өрт сөндірушілер төрт бірдей ауданда айтып келмейтін апатпен арпалысыпты (Жарма, Аягөз, Бесқарағай және Семей шаһарының маңы).
«Осы күндері облыс бойынша құрғақ шөпті сөндірумен жеке құрамның 42 адамы мен 10 арнайы техника жұмыс істеді. Бұл жұмысқа шаруа қожалықтары мен орман шаруашылықтарының 30-ға жуық қызметкері де жұмылдырылды» дейді облыстық Төтенше жағдай департаменті баспасөз қызметінің маманы Анастасия Скляр.
10 тамызда Күршім ауданының Құйған ауылынан 15 шақырым жерде өрт шығып, 800 гектар аумақ қызыл жалын құрсауында қалғаны, оны сөндіруге төтенше жағдай, жергілікті атқарушы органдар және орман шаруашылығы тарапынан 39 адам мен 9 арнайы техника жұмылдырылғаны туралы ақпарат тарады.
«Сақтансаң – сақтайды» дейтін халықпыз. Ал өрттен қалай сақтануға болады? Дала өртінің тұтануына не себеп? Облыстық Төтенше жағдай департаментінің мамандары дала өртінің шығуына негізгі екі себеп барын, бірі адамдардың абайсыздығы, екіншісі найзағайдың түсуі екендігін айтады. «Орман алқаптары күн сайын ғарыш арқылы бақыланады. Ал соңғы апталардағы құрғақ шөптің жану деректері тіркелгенімен ешқандай материалдық шығын келген жоқ. Өрт елді мекендерден алыс аумақта. Дегенмен арқаны кеңге салуға болмайды. Кейде малшылар мал қарап жүріп мінген техникасының мұржасынан ұшқын түскенін өзі де аңғармауы мүмкін. Кейбір адамдар терезеден шыны бөтелкені лақтырып кетеді. Әйнегінің күнге қызуынан қураған жапырақта от тұтануы әбден мүмкін. Аңшылар немесе жай адамдар далада оқ атуы мүмкін. Оқ қалдығынан да от шығады. Осының бәрі өрттің шығуына себеп болады. Сонымен қатар шаруа қожалықтарына егістік алқаптарына жұмыс істеуге шығар алдында ауылшаруашылық техникаларының жағдайын мұқият тексертіп алса дейміз», дейді А.Скляр.
ӨСКЕМЕН
