Үкімет басшысы алдымен «Нұр Ақтөбе» тұрғын үй кешеніндегі құрылыс жұмыстарымен танысты. Мұнда 27 көпқабатты үй салынып жатыр. Жоспар бойынша биыл облыста 1 миллион шаршы метр тұрғын үй пайдалануға беріледі.
«Жыл соңына дейін 1400-ден астам пәтер »Нұрлы жер« бағдарламасымен беріледі. Ал «Бақытты отбасы» бағдарламасы аясында қаладағы көпбалалы отбасыға 40 сертификат үлестірілді. Бұл - алғашқы жарна болады«, - деді қала әкімінің орынбасары Ұшқын Мыңбаев.
Қала әкімі Мавр Абдуллиннің айтуынша, биыл бес мың пәтер қолданысқа беріледі. Оның ішінде 30 көпқабатты үй мемлекеттік, 31-і коммерциялық. »Ең қиыны - жер кезегі. Қазір қала бойынша 140 мың адам жер алуға өтініш берген. Барлығы 393 бау-бақша ұжымы бар. Оның 40-на жер телімі статусы беріліп жатыр. Енді инфрақұрылымын жаңарту қажет. Су, газ керек. Оларға 6,2 миллиард теңге қаржы сұраймыз. 18 мың жер теліміне 8 жобалық-сметалық құжат жасалды.
Мемлекет басшысының қолдауымен басталған «Бақытты отбасы» бағдарламасы бойынша 1090 өтініш түсті. Оның 471-і «Тұрғын үй құрылыс жинақ банкі» арқылы төлем қабілетін растады. Бұған 2 миллиард теңге ақша бөлініп, игерілді. Тағы 555 отбасына қаржы сұралды. Оны қыркүйекте игеріп, тағы ақша сұрағымыз келеді«, - деді Мавр Абдуллин. Айта кетейік, қала бойынша кезекте 24 мың адам пәтер кезегінде тұр. Үкімет басшысы баспанамен қамтамасыз ету мәселелерінен хабардар болған соң, құрылыс жұмыстарымен танысты.
