Әлем • 29 Тамыз, 2019

Делиде әл-Фараби үйі ашылды

50 рет көрсетілді

«Рухани жаңғыру» мемлекеттік бағдарламасын және Елбасы Н.Ә.Назарбаевтың «Ұлы даланың жеті қыры» атты мақаласының негізгі ойларын іске асыру мақсатында әл-Фараби атындағы Қазақ ұлттық университеті Дели қаласында әл-Фараби үйін ашты. ҚазҰУ бұл жобаны Қазақстан Республикасының Үндістандағы елшілігінің қолдауымен жүзеге асырды.

Айгүл АХАНБАЙҚЫЗЫ

Орталықтың ашылу салтанатына Үндістанның Жастар ісі және спорт министрі Кирен Риджижу, Қазақстан Республикасының Үндістандағы елшісі Болат Сәрсенбаев, әл-Фараби атындағы ҚазҰУ ректоры, академик Ғалымқайыр Мұтанов, сондай-ақ үкімет, іскерлік топ және Үндістандағы дипломатиялық миссиялар, университеттер, бұқаралық ақпарат құралдары және қоғамдық ұйымдардың өкілдері қатысты.

Әл-Фараби үйінің ашылуы ЮНЕСКО шеңберінде 2020 жылы өткізілетін әл-Фарабидің 1150 жылдық мерейтойын атап өту іс-шарасы аясында өткізілуде. Жаңадан ашылған үй Дели қаласының дипломатиялық орталығында орналасқан, ол Қазақстан мен Үндістан арасындағы ғылым, білім және мәдениет салаларында ынтымақтастықты одан әрі дамытуға үлес қосатын алаң болмақ.

Жастар ісі және спорт министрі Кирен Риджижу екі ел арасындағы жан-жақты табысты ынтымақтастықтың қарқынды дамуын назарға ала отырып, ҚазҰУ-дың Үндістанмен мәдени-гуманитарлық серіктестікті нығайтуға қосқан үлесін жоғары бағалады. Сонымен бірге ол әл-Фараби үйінің ашылуы өзара тиімді серіктестікті нығайтуға бағытталған бірлескен жобаларды жүзеге асырудың жаңа мүмкіндіктерін ашуға ықпал ететініне сенім білдірді.

«Үндістанда әл-Фараби үйінің ашылуы – біздің достыққа ұмтылған елдерімізді біріктіретін маңызды іс-шара. Қазіргі әлемдік дағдарыс, мәдени және рухани құндылықтардың жұтаңданған жағдайында, өркениет философының шығармашылық мұрасы мен ғылыми ойлары адамзаттың одан әрі дамуы үшін аса маңызды», деп атап өтті өз сөзінде әл-Фараби атындағы ҚазҰУ ректоры Ғ.Мұтанов.

Іс-шара барысында әл-Фараби атындағы ҚазҰУ-де үш тілде жарық көрген Махатма Ганди туралы «Гандидің ой-пікірлері мен нақыл сөздері» кітабының тұсаукесері өтті.

ҚазҰУ әл-Фарабидің шығармашылық мұрасын насихаттауда белсенді жұмыс атқарып келеді. Түркия, Иордания, Италия, Қытай, Мысыр, Болгария және басқа да елдердің жетекші университеттерінде 12 әл-Фараби ғылым және білім беру орталықтары ашылып, табысты жұмыс жасауда. Аталған орталықтарда қазақ тілін оқытумен қатар, қазақ халқының мәдениеті мен дәстүрі насихатталуда.

Қазақстанның жетекші университетінің Үндістандағы серіктестерімен ынтымақтастығы мәдени-гуманитарлық бағытта ғана емес, сонымен қатар жоғары технологиялар саласында да қарқынды дамуда. Айта кетерлік жайт, ҚазҰУ-дың жас ғалымдары құрастырған алғашқы отандық «әл-Фараби-1» нано-спутнигі Үндістандағы Сатиш-Дхаван ғарыш орталығынан ұшырылған.

Іссапар аясында әл-Фараби атындағы ҚазҰУ ректоры Ғ.Мұтанов Үндістан үкіметінің киберқауіпсіздік бойынша ұлттық үйлестірушісі, генерал-лейтенант Ражеш Пант және Дели университетінің ректоры, доктор Югеш Тияджимен кездесті. Келіссөздер барысында орталық құру және киберқауіпсіздік саласындағы мамандарды бірлесіп даярлау, өзара қызығушылық тудыратын салалар бойынша ғылыми-инновациялық және білім беру жобаларын жүзеге асыру мәселелері талқыланды.

АЛМАТЫ

Күннің маңызды және өзекті жаңалықтарын «Егемен Қазақстан» телеграм каналынан оқыңыз