– Станок паркі, зертханалар, ұйымдастыру техникасы толық жаңартылды. Конструкторлық-технологиялық салаға бірыңғай жүйе енгізілді. Бұл жерде барлық үдерістің екі жыл бойы жүзеге асырылғанын атап өткен жөн. Осы уақыт ішінде зауыт үздіксіз жұмыс істеді, – дейді «Мэйкер» ЖШС-нің конструкторлық-технологиялық басқармасының басшысы Владимир Волынский.
Зауыттың заман талабына сай жаңғыртылуына мемлекет тарапынан көрсетілген қолдаудың көп көмегін тигізгенін айта кеткен ләзім. Жоба «3.0 жаңғырту» ұлттық бағдарламасына енген. Жаңару басталғаннан бергі уақыт ішінде зауытқа 53 бірлік негізгі құрал-жабдық және 230 көмекші құрал-жабдық жеткізілді. Оның 35-і – Еуроодақ елдері мен Оңтүстік Кореяның жетекші фирмаларының заманауи металл кесетін станоктары.
Қазіргі таңда механикалық құрастыру цехы толығымен қалпына келтірілген, онда сандық бағдарлама арқылы басқарылатын жаңа станоктардың 80%-дан астамы жұмыс істейді. Мамандардың айтуынша, мұның өзі еңбек өнімділігін алты есеге арттырған.
Рас, бұл жаңғырту басында оңайға түспеді. Шетелден қып-қызыл ақшаға сатып әкелген қымбат құрал-жабдықтың тілін білетін маман таппай, қатты сасқан кәсіпорын басшылары. Сөйтсе, елімізде бір де бір жоғары оқу орны немесе колледж сандық бағдарлама бойынша басқарылатын станоктардың инженерлері мен операторларын оқытпайды екен...
– Тығырықтан шығарар жол іздедік. Сөйттік те, қызметкерлерімізді өзіміз оқытуға шешім қабылдадық. Бұл іске ресейлік консалтингтік компаниялардың бірі қолұшын беріп, олар бастапқы кезеңде 52 инженер мен 70-тен астам жұмысшыны даярлауға көмектесті. Кейін лицензиялық оқу бағдарламаларын сатып алып, практикалық сабақтар өткізілетін кабинетті жабдықтап алдық. Содан кейін Қарағанды мемлекеттік техникалық университеті жанынан өзіміздің кафедрамызды аштық. Енді біздің қызметкерлер аптасына екі рет студенттерге дәріс оқиды. Алғашқы «қарлығаштарымыз» екі жылдан кейін дайын болады, біз оларды өзіміздің кәсіпорында күтеміз, – дейді В.Волынский.
Жасыратыны жоқ, қазіргі таңда техникалық жоғары оқу орындары мен колледждердің жаңғырту үдерісін бастан кешіп жатқан кәсіпорындардың қарқынына ілесе алмай келе жатқан жайы бар. Ескі жүйе бойынша оқытылған мамандардың заманауи технологиялармен жұмыс істей бастаған зауыттардың маңынан да жүре алмайтыны екібастан белгілі. Міне, осындай олқылықтардың барлығын ескере келе, «Мэйкер» ЖШС өзіне қажетті мамандарды осылайша өздері оқытып, даярлай бастаған.
Бүгінде зауытта 800 адам жұмыс істейді. Олар негізінен қосалқы бөлшектер мен аса күрделі жабдықтарды шығарумен айналысады. Кәсіпорын жыл сайын өндіріс көлемін ұлғайтуға тырысады. Алдағы уақытта оны тағы да 30%-ға көтеру жоспарда бар екен. Мұның өзі Президент Қасым-Жомарт Тоқаевтың «Бірге жүзеге асырамыз» бағдарламасында көрсетілген міндеттермен үндесіп жатыр. Ал ол құжатта Мемлекет басшысы еңбек өнімділігін арттыруды ынталандыру, ұзақ мерзімді бәсекеге қабілеттілікті қамтамасыз етуге жарайтын салалар мен бағыттарды анықтау, халықаралық сапа стандарттарын енгізетін және өз өнімімен жаңа нарықтарға шығатын кәсіпорындарды қолдау және отандық өнеркәсіптегі сапаны арттыру жөніндегі негізгі бағыттарды айқындаған болатын. Бұдан бөлек, ел Президенті жақында ғана Қарағандыда өткен еліміздің индустриялық-инновациялық дамуы жөніндегі кеңесте «Біз өзіміздің өндірушілерді барынша қолдаймыз», деді. Сайып келгенде, мұндай оң көзқарас отандық өнім шығарып, ұлттық брендті қалыптастыруға бар күшін салып келе жатқан Қарағанды зауытының іскерлік тұрғыдағы көкжиегін кеңейте түсері сөзсіз.
Қазір «Мэйкер» ЖШС тау-кен өндіруші кәсіпорындар үшін ғана емес, басқа да өнеркәсіпшілер үшін де қосалқы бөлшектер дайындап, бес мыңнан астам өнім түрін шығаруға қол жеткізген. Негізгі тапсырыс беруші «Қазақмыс» корпорациясы» ЖШС болғанымен, зауыт басқа қазақстандық компаниялармен де іскерлік қарым-қатынас жасайды. Бұдан бөлек, соңғы уақытта шет мемлекеттерден де ынтымақтастық туралы ұсыныстар келіп түсіп жатқан көрінеді. Мұның өзі кәсіпорынның менеджменттік жұмысты да дұрыс жолға қоя білуінің нәтижесі деп сеніммен айтуға болады.
ҚАРАҒАНДЫ
