Ал атаулы әлеуметтік көмекті төлеуге жиыны 11,5 млрд теңге қаржы қарастырылыпты. Десек те қазіргі уақытта ел көлемінде атаулы әлеуметтік көмекке қол жеткізу үшін табысын жасырып, малының санын кемітіп көрсету, дүние мүлкін туыстарының атына тіркеу секілді фактілердің көп болмаса да, тіркеліп жатқаны жасырын емес. «Арнайы құрылған комиссия Еңбек және халықты әлеуметтік қорғау министрлігінің «Еңбек ресурстарын дамыту орталығы» ұсынған тізімге сәйкес атаулы әлеуметтік көмек тағайындалған 3658 отбасы бойынша жұмысты аяқтады. Осы тізімдегі 150 отбасы сәуір айында бірінші тоқсандағы табыстарын төмен көрсеткен. Қалған 3508 отбасына талдау жүргізілді, 103 отбасында көмекті төлеудің заңсыздығы анықталған жоқ, бұл отбасыларға төлемдер жалғасты. Ал қателік болмаған 3405 отбасына төлем тоқтатылмайды» деген еді жақында Өскеменде өткен көп балалы отбасылардың мәселесін шешу жөніндегі комиссия отырысында облыстық Жұмыспен қамту және әлеуметтік бағдарламаларды үйлестіру басқармасы басшысының орынбасары Ерболат Ошақбаев.
Басқарманың әлеуметтік төлем бөлімінің бас маманы Бұлбұл Құсманованың айтуынша, министрлік «табысын жасырды» деп тізімін ұсынған 150 отбасының 120-сының шынымен де табысының асып кеткені анықталыпты. «Олар табысын әдейі жасырды деп айта алмаймыз. Бірінің еңбек демалысының ақшасы кеш түскен, екіншісі жұмыс берушінің тарапынан жалақысын уақытында алмаған. Тексере келе осындай жайттарды анықтап, атаулы әлеуметтік көмекті тоқтаттық. Қазіргі уақытта 120 отбасы өздері алған әлеуметтік көмектің қаржысын мемлекетке қайтаруда. Қалған 30 отбасында қайта есептеу жүргізілді, әлеуметтік көмек беру тоқтатылған жоқ. Тек көлемі азайды» деген ол Өскемен қаласы мен Бородулиха ауданында алимент көлемін азайтып көрсету фактілері тіркелгенін жеткізді. Ал Үржар ауданында аудандық жұмыспен қамту және хал актілерін тіркеу бөлімі мал санының көптігіне байланысты 5 отбасына атаулы әлеуметтік көмек тағайындаудан бас тартыпты. Жалпы, бұл ауданда 2018 жылы 592, биыл 2023 отбасына атаулы әлеуметтік көмек тағайындалыпты.
Шығыс Қазақстан облысы
