Вице-премьердің нысандарды аралауы қаланың ескі медициналық мекемесі ‒ орталық темір жол ауруханасын аралаудан басталды. Аурухананың корпустары 60 жыл бұрын салынған әрі қатты ескірген. Осы уақытта аталған нысанда бір рет те жөндеу жұмыстары жүргізілмеген. Сонымен қатар медициналық мекемеде елорданың халық көп орналасқан аудандарының бірі – Сарыарқа ауданының тұрғындарына қызмет көрсетіледі.
Қала әкімдігі мен Денсаулық сақтау министрлігі бұл мәселені 600 орынға арналған жаңа медициналық кешен салу арқылы шешуді жоспарлап отыр. Болашақ құрылыстың учаскесі анықталды. Мемлекет-жекеменшік серіктестік жобасын іске асыру үшін Түркиядан инвестор тарту жоспарлануда.
Вице-премьер сондай-ақ қатерлі ісік ауруларын емдеуге жоғары мамандандырылған көмек көрсететін Көпбейінді медициналық орталықта болды. Алдыңғы жылдары онкологиялық орталық «СҚ-Фармация» дистрибютеріне 1,3 млрд теңге көлемінде қарыз болып қалды. Бұл жағдайды шешу үшін арнайы комиссия құрылды.
Премьер-Министрдің орынбасары жауапты мемлекеттік органдарға медициналық орталықты науқастарды емдеуге қажетті дәрі-дәрмектермен толықтай қамтамасыз етуді тапсырды.
Сонымен қатар Бердібек Сапарбаев «Қазақстан» спорт кешенінде және «Толқын» олимпиадалық резервтегі мамандандырылған балалар-жасөс-
пірімдер мектебінде болды.
«Қазақстан» спорт кешені 2001 жылы салынған, бүгінде күрделі жөндеу жұмыстарын жүргізу қажет. Нысанда мұз аренасы жұмыс істейді, бірақ бассейн апатты жағдайына байланысты жабық тұр. Жалпы, нысан толық жаңғыртуды қажет етеді. Оған мемлекет-жекеменшік серіктестік аясында шетелдік инвесторды тарту жоспарлануда. Бүгінде қажетті рәсімдер орындалып жатыр. Келесі жылы жұмыстар басталады. Құрылысты 2023 жылы аяқтау жоспарланып отыр», деді елорда әкімінің орынбасары Бақтияр Мәкен.
«Толқын» спорт мектебінің шатыры күрделі жөндеу жұмыстарын талап етеді.
«Жобалық-сметалық құжаттаманы әзірлеуге жергілікті бюджеттен қаражат бөлінді. Конкурстың жеңімпазы анықталғаннан кейін біз жұмысқа кірісеміз. Жөндеу жұмыстарын келесі жылдың қыркүйегіне дейін аяқтауға тырысамыз», деп сендірді Б. Мәкен.
Жұмыс сапарының қорытындысы бойынша Бердібек Сапарбаев Денсаулық сақтау министрлігі мен қала әкімдігі алдына бірқатар міндеттер жүктеп, Мемлекет басшысының тапсырмаларын орындау Үкіметтің ерекше бақылауында екенін атап өтті.
Айта кету керек, Мемлекет басшысы жақында өткен елорданы дамыту жөніндегі кеңесте спорттық нысандардың қолжетімділігін арттыру және медициналық қызметтердің сапасын жақсарту жөнінде бірқатар тапсырмалар берген болатын.
