Өңірдегі 1-4 аралығындағы бастауыш сынып оқушыларының мектеп асханасынан тамақтануын қамтамасыз ету үшін аталған жобаның басталғанын облыс әкімі Болат Бақауов мектептердің Қамқоршылық кеңес өкілдері, ата-аналар, мұғалімдермен кездесу барысында жеткізді.
– Бұл кездесуді өткізбес бұрын инстаграм парақшасына мектептерге қатысты бір тәуліктің ішінде 350-ден астам өтініш түсті. Ата-аналар тарапынан мектеп асханасы жөнінде сұрақ көп. Барлық пікірлерді оқып, ата-аналармен кездесуді ұйғардым, – деді облыс әкімі Болат Бақауов.
Шағымдар мен ұсыныстар негізінен парталарды жаңарту, кабинеттердің терезелерін ауыстыру, жұмыс істемей тұрған мектеп бассейндерін қалпына келтіру және оқу орындарының аулаларын абаттандыру секілді мәселелерді қамтыған.
Ал мектеп асханасына қатысты мәселеге келсек, жуырда облыс орталығындағы Павлодар ауылындағы мектепте оқушылар тамақтан уланып, ауруханаға түскен-ді. Бұл оқыс жағдай балалары мектептен тамақтанатын ата-аналардың алаңдауына себеп болды.
Білім және ғылым министрінің 2017 жылғы 27 шілдедегі бұйрығы бойынша Қамқоршылық кеңес жұмысының жаңа тәртібі енгізілді. Енді Қамқоршылық кеңестің мектептегі атқаратын жұмысы маңызды. Тамақтану балалардың денсаулығына тікелей қатысты болғандықтан, Қамқоршылық кеңесі мектеп асханасындағы тамақ сапасын қадағалауға да құзыретті. Сондай-ақ мектепте тамақ сапасын бақылау бойынша мониторинг комиссиясы құрылуы тиіс. Бұл шаралардың барлығы тамақ беруді сапалы түрде ұйымдастыруға мүмкіндік береді.
Облыстық білім беру басқармасының өкілдері өткен оқу жылынан бастап өңірдегі мектептерде «Қазақ тамақтану академиясы» мен «Ұлттық саламатты тағамтану орталығы» әзірлеген «Оқушылардың тамақтану рационы бойынша бірыңғай стандарттар» әдістемелік ұсынымдары бойынша жұмыс істеп жатқанын айтады.
Былтыр облыста 7 мың бала 1-сыныпқа барса, биыл 14 мыңға жетіпті.
Жиын барысында облыс орталығындағы Усолка шағын ауданындағы №42 орта мектептің ата-аналары сөз алып, бұл ауданға тағы бір жаңа мектеп қажет екенін айтты. Шағын ауданда жыл сайын көп қабатты үйлер салынып, пайдалануға берілуде, оқушылар саны да көбейе түскен.
Тағы бір мәселе, бүкіл қала мектептерінің оқушылары сөмкелерін арқалап, сабаққа қоғамдық көліктермен қатынайды. Бұл мәселе де Қамқоршылық кеңес мүшелерінен қамқорлық күтетін жағдай. Қамқоршылық кеңес мүшелерінің айтуынша, қала ішінде 15 жасқа толмаған оқушылар қоғамдық көліктерде 50 пайыз жеңілдікті пайдалануда. Қалған оқушылар жолақысын толық төлеуге міндетті.
– Усолка шағын ауданында оқушы саны көп екені белгілі. Бірақ енді мектеп салатын орын жоқ. Сондықтан жаңа мектеп басқа жерден салынады. Ал жолақы мәселесіне келетін болсақ, қоғамдық көлікте 50 пайыз жеңілдік қарастырылатын балалар жасын 15 жастан ұлғайту қажет. Мәселені бақылауға аламыз, – деді Б.Бақауов.
Бұдан бөлек, ата-аналар ағылшын тілі мен қазақ тілі пәндерінен сабақ беретін мұғалімдерге ренішті. Ата-аналар бұл пәндерден қосымша репетитор жалдауда. Сондықтан енді осы екі пәннің мұғалімдерін аттестациядан өткізу тапсырылды. Қамқоршылық кеңес өкілдері бұл жұмысқа белсенді араласып, өз пікірлерін ашық білдірмек.
Кездесуде Ақсу қаласындағы №7 мектептің қоғамдық кеңес мүшесі Андрей Рахметов мектеп ауласын абаттандыру қажеттігін, Ленин кенті №32 мектептің Қамқоршылық кеңес мүшесі Уәлихан Нығманов мектеп айналасын қоршауға көмек сұрады. Өңір басшысы мектептің айналасын қоршағаннан гөрі, аумағын абаттандырып, бейне-бақылау құрылғыларын орнатуды ұсынды.
Қаладағы №35 мектептің Қамқоршылық кеңес мүшесі Майгүл Иманқұлова мектептегі асханаға шағым білдірді. Көп балалы ана С.Шарапиева мектеп жасындағы 3 баласының ыстық тамағына күніне 900 теңге төлейтінін айтып, көмек сұрады.
Сондай-ақ Успен ауданындағы №2 мектептің ата-аналары да асхана бағасына ренішті. Аз қамтылған және көп балалы отбасылардан шыққан балалар 350 теңгеге тамақтанса, ақылы негізде тамақ ішетіндер асқа күнделікті 500 теңге төлеуге міндетті.
Ал керісінше Аққулы, Шарбақты аудандарында 1-4-сынып оқушылары жергілікті демеушілер қолдауымен тегін тамақтанады.
Облыс орталығындағы №19 мектептің ата-аналары мектеп маңындағы қаптаған көліктерді ретке келтіруді сұрады. Мектеп «Халыққа қызмет көрсету орталығының» жанында орналасқан. Көліктер кептелісі қатар орналасқан №29, №36 мектептің оқушыларына да бөгет келтіруде. Сондай-ақ №41 мектептің ата-аналары бағдаршам орнатуды сұрады. Қаладағы №23, №16 балабақшалар күрделі жөндеуді қажет етеді.
Келесі кезек екібастұздық ата-аналарға тиді. Олар қаладағы №13 мектептің ата-аналары мектеп ауласын жарықтандыруды, сонымен бірге өздерімен бірге бір ғимаратта отыратын №35 мектептің болуы салдарынан кабинет саны жеткіліксіздігін, парталар тым ескіргенін, денешынықтыру сабағында бір уақытта 2-3-сынып дайындалуға мәжбүр болып отырғанын жеткізді. Ал №36 мектептің ата-аналары оқушылардың киім ілуіне арналған шкафқа бюджеттен қаржы бөлуді сұрады.
– Мектептерді шкафпен қамту мақсатында 100 миллион теңге бөлдік. Қазіргі уақытта байқау жарияланды. Осы қаржыға өңірдегі 3 мектептің шкафқа қажеттілік мәселесі шешілмек, – деді Б.Бақауов.
Кездесуде жергілікті ата-аналар тарапынан түскен барлық сауалды тыңдаған Болат Бақауов жауапты орындарға нақты тапсырмалар берді.
Облыс әкімі кездесуге келген ата-аналар тарапынан өңірдің, облыс орталығының білім саласына қатысты көптеген мәселелерін тыңдап, қаладағы №19, №35 мектептерді және күрделі жөндеуді қажет ететін балабақшаларды аралап көрді.
Сонымен бірге кездесу барысында облыс әкімі Абай атындағы №10 қазақ мектеп-лицейінің асханасына кіріп, тамақтанғанын да айтып өтті.
– Мектеп асханасындағы хабарландырулар өзге тілде жазылған екен. Екіншіден, ас мәзірінде бәліш, тоқаш бағалары жоғары. Қамқоршылық кеңес мүшелері қайда қарап отыр? Асхана сөресінде шоколад пен тәтті сусындар да бар. Олай болса, ата-аналармен бірлесіп, тамақ сапасын бақылау қажет-ақ, – деді Б.Бақауов.
Облыс әкімі ата-аналармен кездесуде мектеп асханасындағы тамақтың сапасына Қамқоршылық кеңес өкілдері жауапты екенін атап өтті. Облыстық білім беру басқармасының басшысы Дінислам Болатханұлына мектеп асханасын бір жылға жалға бермей, арендалық шартта 3-5 жылға дейін ұзартуды ұсынды.
Сұрақ та, мәселе де аз емес. Осы кездесуден соң мектеп асханасы, ауласы, басқа да көптеген шаруашылық мәселелері қалалық, облыстық білім беру саласының басшыларының, мектеп директорларының, Қамқоршылық кеңес өкілдерінің назарынан неге тыс қалған деген ой келеді.
Павлодар облысы
