Премьер-Министрдің орынбасары Бердібек Сапарбаев меценаттар мен кәсіпкерлерді «Шапағат» медалімен, Президент пен Премьер-Министрдің атынан алғыс хаттармен марапаттады. Парламент Мәжілісі Әлеуметтік-мәдени даму комитетінің төрайымы Гүлшара Әбдіқалықова ардагерлерге «Еңбек ардагері» медалін табыстады.
«Адамды адам еткен – еңбек. Біз еңбеккерлердің алдында басымызды иеміз. Елбасы айтқандай, халық өмірінің жақсы болуы, жағдайларының түзелуі еңбекке байланысты. Сондықтан мемлекет өз халқы үшін еңбек етуіне барлық жағдайды жасайды. «Еңбек» бағдарламасының ең негізгі міндеті – қазақстандықтардың еңбек етіп, отбасын асырауға, ел экономикасын дамытуға жағдай жасау. Жаңадан ашылған кәсіпорындар мен бизнес нысандар негізінен соған арналған. Үкіметтің ең негізгі міндеттерінің бірі – халыққа жағдай жасап, өз кәсібін ашуына көмектесу, қолдау», деді Вице-премьер.
Елбасының Жалпыға ортақ еңбек қоғамын құру идеясын жүзеге асыру мақсатында 2016 жылдан бастап өткізіліп келе жатқан конкурс «Үздік еңбек әулеті», «Жұмыс істейтін жастардың үздік тәлімгері» және «Өндірістің үздік жас жұмыскері» сияқты үш номинациядан тұрады. Биыл «Үздік еңбек әулеті» аталымында елордалық Еңсебаевтар әулеті 1-орынға, Шығыс Қазақстан облысынан келген Сағадиевтер әулеті 2-орынға, ал атыраулық Жұмағалиевтердің ұстаздар әулеті 3-орынға ие болды. «Жұмыс істейтін жастардың үздік тәлімгері» номинациясында Ақмола облысының Техникалық бақылау бөлімінің бақылаушысы Майра Исаева жеңіске жетті. Шымкент қаласының цемент өндіру жөніндегі инженер-технологы Ескендір Рүстемов 2-орынға, Қарағанды облысының ауа бөлу қондырғыларының аппаратшысы Дәулет Ежибаев 3-орынға ие болды. «Үздік жас өндіріс жұмыскері» номинациясында солтүстікқазақстандық жалпы тәжірибелік дәрігер Юлия Шевченко топ жарды. Қостанай облысының логистика және қойма сақтау шебері Владимир Самодуров 2-орынға тұрақтады. Павлодар облысынан келген технологиялық сорғы машинисі Асқар Нұрғалиевқа 3-орын бұйырды. Байқау жеңімпаздары 1-орын үшін – 1 млн теңге, 2-орын үшін – 500 мың теңге, 3-орын үшін 200 мың теңге көлемінде ақшалай сертификаттармен марапатталды.
