«Білім және ғылым» атты тақырыппен өткен іс-шарада Мемлекет басшысы ұстаздықты өте мәртебелі мамандық деп атап, алдағы уақытта болашаққа жол сілтейтін мұғалімнің еңбегін лайықты бағалау өте маңызды міндет екенін айтты.
Жастардың үлкен өмірге тез бейімделіп, іске белсенді араласып кетуі үшін маңызды мәселенің бірі тұрғын үй еді. Осы мәселе бойынша жастарға арналған бағдарламалар негізінде жатақханалар беріліп, жастарды қолдаудың түрлі жобалары жүзеге асты.
Тағы да үнемі айтылып келе жатқан мәселе – мұғалімдердің еңбекақысының төмен болуы. Осы тұрғыдан да білім жүйесіне білікті мамандар тарту мақсатында және педагогтардың мәртебесін көтеру үшін мұғалімдердің еңбекақысын 4 жылдың ішінде 2 есе арттыру керектігі айтылып, ұстаздар қауымының сапалы, белсенді жұмыс істеуіне ерекше қолдау жасалды.
2019 жылды Жастар жылы деп жариялау аясында елімізде біршама жұмыс атқарылып жатқанын біліп, көріп жүрміз. Қазақстанның жастары – елдің басты байлығы. Еліміздің болашағы да жастар, сондықтан оларға үлкен үміт артылды және мүмкіндіктерін толық пайдалануға жол ашылды. Мемлекетіміздің нығая түсуіне бұрынғыдан да мол үлес қосу үшін жастар енді белсенді бола түсуі керек. Жас маман ретінде жан-жақты қолдауды сезініп, ұстаздық жолда еңбек етуді жалғастырып келемін. Мамандықты сүйіп, болашақ өскелең жастарды тәрбиелеу – ұстаздар қауымының міндеті. Бізге артылған жауапкершілік өте үлкен. Мен жастарды елдің болашағы үшін еңбек етуден талмаңдар дегім келеді.
Мақсат Падсабаев,
Нұр-Сұлтан қаласы
Абай атындағы №87 мектеп-гимназиясының мұғалімі
