Қоғам • 16 Қаңтар, 2020

Игілікті істің үздігі

317 рет
көрсетілді
6 мин
оқу үшін

Қолым қысқа демейтін, қолтығынан демейтін адамдар арамызда аз емес... Солардың бірі — ақтөбелік Гауһар Жұмағазиеваны көпшілік Ұлттық волонтерлік желісінің өкілі, Ақтөбеде құрылған «Д.А.Р.» еріктілер клубының белсендісі ретінде таниды. Оны өткен жылдың соңында ел Президенті Қасым-Жомарт Тоқаевтың өзі марапаттап, еңбегін мемлекеттік һәм республикалық деңгейде жоғары бағалаған-ды.

Игілікті істің үздігі

«Ақтөбе қалалық сал ауруына шалдыққан азаматтарды қолдау орталығы» қоғамдық бірлестігінің жанынан 2007 жылы ашылған, достық, адалдық, рақымшылық де­ген әдемі ұғымдардың бас әр­іп­­терінен құралған ұйым – «Д.А.Р.» еріктілер клубын әу баста Қазақ­станның Еңбек Ері Құралай Бай­ме­нова құрған. Өңірдегі белсенді үкі­меттік емес ұйымның қызметі негі­зінен мүмкіндігі шектеулі азамат­тарды қолдауға бағытталған, әлеу­мет­тік көмекке баса маңыз беріледі. Қа­зіргі таңда жүзден астам мүшесі бар орталықты құрудағы мақсат та сол – қоларбада отыратын қам­кө­ңіл жандарға демеу болу. Үлкен жү­ректі азаматтардың басын қосқан клуб­тың үйлестірушісі Гауһар Жұма­ғазиева:

– Бұл – зор жауапкершілікті қажет ететін жұмыс. Қатарымызға кәме­лет жасынан асқандарды ғана қабыл­дайтынымыз сондықтан. Мәселен, ол кісі мүмкіндігі шектеулі жан­ның ауласындағы қарын аршуға немесе дүкеннен тамағын алып ке­луге жұмылдырылуы мүмкін. Тіпті, үйінде бала-келіндері мен не­мерелері болса да, шүйіркелесіп әң­гіме айтуға құштар, өзіне рухани серік іздейтіндер ұшырасады. Сол сияқты біз Ұлы Отан со­ғы­сының ардагерлері мен тыл ең­бек­керлеріне де жәрдемдесеміз. Орта­лық қоғамдық негізде жұмыс іс­теп, ешкімге қаржылай қол­дау көрсетпейді. Мақсат – үйде отыр­ған зейнеткерлер мен әртүрлі жас­та­ғы мүгедек жандарға қолғабыс та­ныту, – дейді.

Гауһардың айтуынша, волон­тер­лік қызметті тек науқас балаларға қаражат жинаумен, қарттардың «қо­лын ұзартумен» байланыстыра­тын­дар көп. Бұл – қате түсінік.

Қазақстанның өзінде волонтерлер жұмысының 15 бағыты тү­зілген. Олардың арасында ме­ди­ци­налық (донорлық), эко­ло­гия­­лық, жануарларға арналған, мәдени-көпшілік, ғаламтор кеңіс­ті­гіндегі, төтенше жағдай кезіндегі во­лонтерлік, т.б. бар. «Қазіргі таң­да қоғам арасында волонтерлік қоз­ға­лыс өте қарқынды дамып келеді. Дегенмен, қоғамдық қызметтің мән-мағынасын дұрыс түсінбейтіндер де кездеседі. Ондай жағдай, волонтер имиджінің төмендеуіне әкеліп соқтырады.

Ақтөбеде де волонтерлік ұйым­дар­дың саны жылдан-жылға көбейіп келе жатыр. Іштей қуанасың. Бірақ олар­дың жұмысы волонтерліктің негіз­гі қағидаларына негізделсе, тек ел аузына ілігу үшін жасалмаса екен дейсің... Жалпы, волон­тер­лер қызметінің құқықтық негіз­де­рі, мақсат-міндеті мемлекет тара­пынан белгіленуі керек деп есеп­теймін. Ал волонтерлердің өзі­не оқу ақысын төлеу жағынан жеңілдік жасау дұрыс па, бұл – үлкен сұрақ. Неге десеңіз, бұл во­лон­­терлердің қағидаттарына сәй­кес келмейтін сияқты. Яғни біз­дің жұмыстың негізі риясыз, өтеу­сіз көмектен тұрмай ма? Егер әл­гін­дей жағдай ұсынылса, басқа пи­ғыл­дағы жас­тар да волонтер бо­лу­ға ұм­тыл­уы мүмкін», — деп сыр шер­теді әңгі­ме­лесушіміз.

2019 жылдың соңында Нұр-Сұлтан қаласында Жастар жылы қорытындыланған салтанатты шарада Гауһар Мемлекет басшысының қолынан Алғыс хат алды. Мұндай үлкен құрметке ие болған ақтөбелік волонтер аталған саладағы еңбегінің еленгеніне дән риза.

– Мені ұсынған — Ұлттық во­лон­терлік желісі. Шынымды айтсам, бұл күтпеген жерден алған мара­пат болды. Өте қатты қуандым. Ел Президенті Қасым-Жомарт Тоқаев­тың қолынан Алғыс хат алу мен үшін үлкен мәртебе. Мұны жыл­дар бойы сіңірген еңбегімнің баға­лан­ғаны деп білемін.

«Волонтер» сөзі шетелден енген термин болғанымен, қазақ хал­қы атам заманнан көмекке зәру­лерді ескерусіз қалдырмай, жесі­рі мен же­тімін жылатпаған. Сон­дық­тан ерік­тілер қызметін Батыс­тан үй­ре­ніп жатырмыз дегенге ке­ліс­пей­мін. Тек бұл ұғымды қай­та жандандырып жатырмыз деге­ні­міз дұрыс болар, – дейді Гауһар Қар­шы­ғақызы.

Кейіпкерімізден ұйымдағы ең жас мүше 18-де болса, ең үлкені – 70-тен асқан қарт екенін білдік. Соңғысы – құрметті демалыстағы заңгер қоларбада отырғандарға ақы­сыз негізде құқықтық кеңес береді. Одан бөлек, волонтерлердің ара­сында қарттар үйі, балалар үйі сияқ­­ты әлеуметтік нысандарға ұдайы ба­рып, концерт қоятын өнерлі жас­тар да бар. Осы орайда «Д.А.Р.» еріктілер клубының мүшесі болып жүріп танысқан, кейін табысқан жастардың біршама екенін айтпай кетуге болмайды. Олардың бір­азы бұл күнде жан қалауын бірлесіп орындап жүр. Ең алғаш сы­ңа­рын аталған клубтың өткізген шара­ла­рында кездестіріп, шаңырақ кө­терген ерікті мен мүмкіндігі шек­теу­лі жандар да бар.

Орталық белсенділері бірқатар республикалық байқаулардан да жүлдемен оралып жүр. Мәселен, елордада өткен «Үздік волонтер» сайысында «Волонтерлік бойынша үздік жоба» аталымы бойынша «Д.А.Р.»-дың жастары өзгелерден оқ бойы озып шығып, Білім және ғылым министрлігі тарапынан дип­лом мен бағалы сыйлыққа ие болды. Сонымен бірге ұйым көптеген халықаралық, республикалық қозға­лыстардан жемісті жұмысы үшін Алғыс хаттар алғанын айта кет­ке­ні­міз абзал.

Жалпы, Ұлттық волонтерлік желісінің мәліметінше, Ақтөбенің өзінде игі іс жасауға ұмтылған 30-дан астам ұйым бар. «Д.А.Р.» еріктілер клубынан бөлек, қайырымдылыққа ден қойған «Қызыл Ай» қоғамы облыстық филиалының жанынан құрылған волонтерлер тобы, «Жүректен жүрекке» және «Ме­йі­рім» клубтарының мақсаты бір – қиналғандарға қолұшын созу. Білгеніміздей, ондағылардың 70 пайызын жасы 29-ға толмаған жас­тар құрайды.

 

Айбек ТАСҚАЛИЕВ,

журналист

 

Ақтөбе облысы