Әлем • 24 Қаңтар, 2020

Қытайдағы вирус өзге елдерге де тарап жатыр

408 реткөрсетілді

Қытайдан тараған коронавирустан көз жұмғандар саны 17-ге жетті. Вирусты жұқтырғандар қатарында Ресей, АҚШ, Таи­ланд, Жапония, Тайвань және Оңтүстік Корея азаматтары бар.

2019-nCoV атты корона­ви­рус­тың жаңа түрі былтыр жел­тоқсанда Қытайда анықталған. Ауру алғашында суық тиюдің бел­­гілерімен басталады. Ухань қала­сында бір күннің ішінде атал­­ған шағымдармен жүзге жуық науқас тіркелген. Науқас­тар­дың санының күрт өсуі дәрі­гер­­лердің үрейін туғызған. Бү­­гінде ауруға шалдық­қан­дар­дың саны 541-ге жетті. Дәрі­гер­лер­дің айтуынша, коро­навирус нәти­жесінде науқастың өкпесі қабы­нып, тыныс алуы нашарлайды. 

Соңғы деректерге сүйен­сек, вирустың ошағы – Ухань қала­сында аталған белгілермен 170 адам ауруханаға жатқызылған, олардың 40-ы ауыр халде. Алға­шында вирусты жануарлар тарата­ды деген ақпарат болды. Бі­рақ ма­мандар адамдардың да жа­ңа ви­русты тасымалдаушы еке­нін рас­тады. Өйткені аурухана қызмет­кер­лерін де індет айналып өтпеген.

Вирус қалай және қайдан пайда болды деген сұраққа әзірге нақты жауап табылмай отыр. Алай­да, науқастардың алғашқы легі теңіз тағамдарын сататын базар­­дың қызметкерлері екенін ескере келе, бұл аурудың да теңіз тағам­­дарына қатысы бары болжануда.

Бүгінде Ухань қаласының бас­­шылығы қалаға кіруге, қала­дан шығуға тыйым салып отыр. Қо­ғамдық көлік­тер­дің жұмысы тоқ­таған. Ухань әлемнің үлкен қа­ла­­лары тізімінде 43-орында. Қа­­ла әкімдігі аймақта 11 млн-ға жуық тұрғын барын хабарлады.
Сарапшылардың айтуын­­ша, қаланың жалпы ауда­­ны мен да­мыған экономикасы да ви­рус­тың тез тарауына себеп. Бұдан өзге Бейжің, Шан­хай, Шэньч­жэнде де нау­қас­тар анық­­талды. Гон­конг универ­сите­­тінің ғалым­дары вирус Қы­тайдың 20 қала­сына тарады деген тұжырымға келіп отыр.

Вирус тараған Қытай қала­ла­рының нақты саны белгілі болмаса да, әлемнің басқа түкпіріне жетіп үлгергені анық. Таиландта 4 адам, Гонконгте 2 кісі ауруха­на­да. Ал Макао, Тайвань, Оңтүстік Ко­рея, Жапония, АҚШ-та бір нау­қастан тіркелген. Санкт-Петер­бургте аталған вируспен 2 адам тіркелді. Олардың біреуі – Қы­тайдан келе жатқан жолау­шы. Ол Пулково әуежайында қызуы­ның көтерілгенін айтып, әуежай мамандарына көмекке жүгінген. Ресейдің Иркутск пен Томск әуежайларында тексеріс күшейтілген.

Дүниежүзілік денсаулық сақтау ұйымы 22 қаңтарға жедел отырыс белгіледі. Алайда Женевадағы кездесуден кейін ұйым Төтен­ше жағдайлар жөніндегі ко­ми­тетінің жаңа вирусқа қатыс­ты «жаһандық төтенше жағ­дай» жарияламайтынын мәлім­деді. Ұйымның бас директоры Тедрос Гебрейесус инфек­ция туралы қосымша ақпа­рат қажет екенін айтты. Ден­саулық сақтау сала­сындағы сарапшылар комитеті тағы да жиналатынын хабарлады.

Коронавирустың жаңа түрі бұрынғыларына қарағанда қауіпті, емі де табылмаған. Ға­лымдар бұл вирус 2002-2003 жылы 1000-ға жуық адам­ның өмірін қиған SARS виру­сы­мен туыстас деген тұжы­рым жасады. АҚШ-тағы Аллер­гия мен жұқпалы аурулар ұлт­тық институтының ға­лым­­дары вирусқа қарсы вак­­цина дайындап жатыр. Алай­да вакцинаны сынау бір ай­дан кейін ғана мүмкін бол­мақ. Ал оның нарыққа шығуы 2020 жылдың соңына жоспарланған.

Қазақстанның ше­кара­лық және кедендік қызметі көршілес елдегі бел­гісіз вирус­қа қатысты бақы­лау­ды кү­шейткенін жет­кізді. Әуе­жайдың сани­тар­лық-каран­тиндік бақылау қыз­меті Қытайдан келген жолау­шылардың дене қызуын арнайы тепловизор құрылғысы арқылы тексеруді бастап кеткен. Дене қызуы жоғары жолаушы бірден медициналық тексеруден өтеді.

Әлемдік сарапшылар да дабыл қағуға ерте екенін айтады. Бернхард Нохт универ­сите­тінің дәрігері, вирусо­лог Йонас Шмидт-Каназит Еуро­­па елдеріне арнайы шара­лар қол­данудың қажеті жоғын мәлімдеді.

 * * *

Қытайда өршіп жатқан коронавирус Қазақстан аумағында тіркелген жоқ. Осыған орай Ор­та­лық коммуникациялар қыз­­метін­де өткен баспасөз мәсли­хатын­да Денсаулық сақтау ми­­нистр­лігі Тауарлар мен көр­­сетілетін қызметтердің сапа­сы мен қауіп­сіздігін бақылау комитеті төрағасы Людмила Бюра­бекова және Денсаулық сақтау ми­нистр­лігі Тауарлар мен көрсеті­летін қыз­меттердің сапасы мен қауіпсіздігін бақылау комитеті төраға­сының орынбасары Жандарбек Бекшин ел азаматтарын ерекше қажет­тілік болмаса, ҚХР-ға сапарға шығудан бас тартуға шақырды.

Ж.Бекшин Ухань қаласындағы жағдайдың тәулік бойы назарда екенін айтып, қазіргі уақытта ҚХР жергілікті билігі бұл қалада карантин жариялаған.

«Олардың ақпаратына сүйенсек, қазіргі кезде қалаға кіруге де, шығуға да болмайды. Бұл – өте дұрыс шешім деп ойлаймын. Өз тарапымыздан біз қазақстандықтарға, әсіресе әуе жолымен жүретіндерге түсіндіру жұмыстарын жүргізіп жатырмыз. Бас санитарлық дәрігердің 6 қаңтар күнгі қаулысы бойынша, Қытайдан келе жатқан жолаушылар термометриядан өтеді. Қазіргі таңда 13 мыңнан ас­там жолаушы аталған термометриядан өтті. Әуежайларда карантин пункті орналасқан. Ухань қала­сынан Қазақстанға тікелей рейс жоқ. Бірақ Алматыдан ҚХР-ға – 5 рейс, Нұр-Сұлтан қа­ла­­сынан 3 рейс бар екенін айта кеткен жөн. Біз осы рейстер­ге баса назар аударудамыз. Сон­дай-ақ шекаралық жерлерде де жағдай қатаң бақылауға алынды. Сонымен қатар біз ұшақ­тардағы экипаж мүшелеріне ауру белгілері қандай болатынын тү­сіндіріп, кеңес бердік. Мыса­лы, жолаушылардың дене қызуы көтерілсе, жөтелсе, ентіксе, бо­йында әлсіздік сезілсе мән беру­лері қажет. Аталған ко­рон­а­вирустық инфекцияның белгі­лері тұмаумен ұқсас», деді Ден­сау­лық сақтау министрлігі Тауар­лар мен көрсетілетін қыз­мет­­тер­дің сапасы мен қауіпсіз­дігін бақылау комитеті төраға­сы­­ның орынбасары Жандарбек Бекшин.

Светлана ҒАЛЫМЖАНҚЫЗЫ,

Рауан ҚАЙДАР,

«Egemen Qazaqstan»

 

Соңғы жаңалықтар

Шымкентте Алғыс айту күні аталып өтті

Оңтүстік Қазақстан • Кеше

Ұқсас жаңалықтар