Тұжырымдама негізінде жеті бағыт бойынша жалпы ұлттық жобалар жүзеге асырылмақ. Ақтөбе облыстық жастар саясаты мәселелері басқармасының басшысы Мейрамбек Махамбетов осыған орай өңірде «Білім», «Сабақтастық», «Таза Қазақстан», «Асыл мұрат», «Қамқор» және «Үміт» атты бағыттарға басымдық берілгенін айтып берді. Оның мәлімдеуінше, бұл еріктілер қозғалысын аймақта кеңінен өрістетудің басты бір жолы болмақ.
Қазіргі кезде облыста құрамында 1500-ден астам мүшесі бар 36 волонтерлер тобы қызмет жасайды. Олардың 17-сі Ақтөбе қаласында белсенді іс-қимыл танытып жүрсе, 17-сі облыс аудандарында сабақтастықтың және жаңашылдық пен жасампаздықтың үлгісін көрсетуде. Бұл ретте Ақтөбе аймағында ресми түрде тіркелген волонтерлер топтары біраз жылдардан бері өз жұмыстарын тұрақты түрде жүргізіп келеді. Олардың алға қойған басты мақсаты мұқтаж жандарға рухани тұрғыдан және қоғамдық қабылдау тұрғысынан қажетті көмектер беру болып отыр.
Осы орайда әрбір волонтерлік топтың өздеріне тән іс-қимыл ерекшелігі бар екені, оларды дараламай, керісінше бірін-бірі байытып, толықтырып жүргені де сүйінішті жайт. Айталық, алғашқы топ көмекті қажет ететін жалғызілікті жандар мен мүмкіндігі шектеулі азаматтардың жандарында жүрсе, екіншісі қариялар мен аналар үйлеріне жиі барып, олармен тығыз қарым-қатынас орнатуды басты міндетіміз деп біледі.
Облыста медициналық көмек көрсетуге бағыт ұстаған волонтерлер топтары да жасақталған. Сондай-ақ сонау кеңестік кезеңде қалыптасқан «Қызыл Жарты Ай» қоғамы өз жұмыстарын бүгінгі қазақстандық қоғам мүддесіне бейімдей білгені де сүйсіндірмей қоймайды. Айталық, қазіргі кезде жастар мен студенттердің арасында репродуктивтік денсаулығы нашар қоғам мүшелері жиі кездесіп қалып жүргені белгілі. Егер бас көтере бастаған бұл дерттің алды алынбаса, ертең оның аяғы үлкен өкінішке апарып соқтырмасына ешкім кепілдік бере алмайды.
Отбасын құрған ерлі-зайыптылардың репродуктивтік денсаулықтары төмендігінен ұрпақ сүйе алмауы – бақытсыздықтың бір көрінісі емес пе? Бұл бағытта «Репродуктивті денсаулық» және «Алғашқы медициналық көмек» атты кәсіби дәрігерлерден құралған волонтерлер тобы өздеріне жолыққан жандарға жан жылуы мен шипа жылуын қоса беруге қашан да әзір. Өңірдегі волонтерлер армиясының тағы бір өкілі экологиялық бағытта туындаған мәселелерді шешуге қатысты өз үндерін айқын жеткізуде. Сондай-ақ «Зерде» деген атауға ие волонтерлік топ іс-түссіз жоғалып кеткен адамдардың деректерін іздестіріп табуға қатысты жоспар жасап, алға қойған мақсаттарына қол жеткізуді көздейді. Бұл тұрғыда олар өз жұмыстарын төтенше жағдайлар жөніндегі мемлекеттік құрылымдармен және құқық қорғау органдармен қоян-қолтық қызмет жасауға бекем бел буған.
Биылғы Волонтер жылында Ақтөбе аймағындағы волонтерлер алға қойған ой-жоспарлар мен жобалар ертеңгі күннің тындырылған нақты ісіне айналса игі.
АҚТӨБЕ