Облыс экономикасының тамырына қан жүргізіп тұрған – өңірдегі мұнай-газ кеніштері. Бірақ соңғы жылдары экономиканы әртараптандыру, соның ішінде агробизнес саласына басымдық беру мәселесі оң шешілуде. Мәселен, өңірде cоңғы жылдары пайдаланылмай жатқан 1 млн 140 мың гектар жер мемлекетке қайтарылды. Қайтарылған жер телімдерін кәсіпкерлерге беру үшін аукциондар электронды түрде жүріп жатыр. Яғни сыбайлас жемқорлықтың жолы барынша кесілген.
– Өткен жылы облыста 45 электронды аукцион өткізіліп, 71 га жер жалға берілді. Биыл өңірде геоақпараттық порталды іске қосу жоспарлануда. Бұл портал жер телімдеріне мониторинг жасап, мақсатты түрде пайдалану үшін тиімді болмақ, – дейді облыс әкімі Ғали Есқалиев есепті кездесуінде.
Бүгінде облыс тұрғындарының 48%-ы
ауылда тұрады. Сондықтан да өңірде ауылдарды дамытуға барынша көңіл бөлінген.
Селекциялық-асылдандыру жұмыстары мен мемлекеттік қолдау және мал шаруашылығы саласындағы асыл тұқымды қайта құру нәтижесінде соңғы жылдары ірі қара малдың орташа тірілей салмағы 325-тен 345 килоға дейін өскені байқалған. Ал облыстың тауар өндірушілері сиыр және қой еті экспорты бойынша жоспарды 1,5 есе артық орындап, республикада алдыңғы қатарға шықты. Бүгінде Ақжайық малының еті Ресей, Иран, Әзербайжан және басқа бірқатар мемлекетке сатылуда.
Осы орайда тұрғындардың бас ауруына айналған жол мәселесі де айтылды.
– 2018 жылы Елбасы Н.Назарбаев Қазталов, Жәнібек және Бөкейордасы аудандарына жол салуды тапсырған болатын. Жаңа жолдардың жалпы ұзындығы 245 шақырымды құрайды. 2019 жылы 18 шақырым жөнделді, биыл 100 шақырымнан астам жолды жөндеуді жоспарлап отырмыз, – дейді Ғ.Есқалиев.
Әкім өңірдің үлкен мәселесі – жергілікті жолдар екенін айтты. Жол сапасы бойынша өңір ең соңғы орында. Облыстық және аудандық маңызы бар 5 мың шақырым жолдың тек 31%-ы ғана қанағаттанарлық деңгейде.
Былтыр 11 млрд теңгеге 145 шақырым облыстық және аудандық маңызы бар жол жөнделген. Жалпы өңір бойынша былтыр 27 млрд теңгеге 360 шақырым жол жасалынған еді. Енді биыл тағы да 400 шақырым автожол жөнделетінін естіп, ел қуанып қалды. Әсіресе халық тарапынан жиі көтерілген облыстық маңызы бар «Барбастау – Ақжайық – Индер» жол бөлігінің 50 шақырымын жөндеу басталады. Бұған қоса жол апаты жиі болатын «Орал – Атырау» республикалық тас жолын кеңейтуге жобалық-сметалық құжаттама жасалып жатқанын әкім құлаққағыс етті.
– Орал мен Атырау қалаларының арасына темір жол қатынасын салса, әрі қауіпсіз, әрі арзан болмас па екен? Халық арасынан қойылған бұл сауалға Ғ.Есқалиев ұсыныстың экономикалық жағын зерттеп барып жауап беруге уәде етті.
Облыс тұрғындарын табиғи отынмен қамту бойынша елімізде алдыңғы қатарда тұр. Былтыр Теректі және Қазталов аудандарының 16 ауылын газдандыруға бюджеттен 1,1 млрд теңге бөлінді. Бұл 6 мың адам қи жағып, күл шығару бейнетінен құтылады деген сөз.
– 2019 жылы 32 мың халқы бар 23 ауыл сапалы ауыз сумен қамтылды. Нәтижесінде халықтың орталықтандырылған сумен қамту үлесі 81%-дан 86,8%-ға дейін көтерілді. Ал 2020 жылы 26 мыңнан астам халқы бар 24 ауыл таза ауыз сумен қамтылатын болады. Осы мақсатта 6 млрд теңге бөлінді, – деді облыс әкімі.
– Ел ішінде Қазақстанға келіп жатқан Қытай компаниялары, қытай жұмысшылары туралы қауесет көп. Біздің өңірде жұмыс істеп жатқан Қытай кәсіпорындары бар ма? – деп сұрады Бекнұр Сражанов есімді тұрғын.
– Бәйтерек ауданы аумағында ақпараттық сервер құрылысы жүріп жатқаны рас. Мұнда Қытай компаниясы инвестор ретінде қосылған. Бірақ құрылыста қытайлар жоқ. Бұл – өте қажет, заманауи нысан, болашақта бұл жерде жергілікті мамандар қызмет етеді. Инвесторлардың басқа өңірді емес, бізді таңдағанына қуаныштымыз. Қытай компаниясы қолға алған екінші нысан – Ақжайық ауданы аумағындағы Сәти калий тұзы кеніші. Бұл жерде әлі мәселе нақты шешілген жоқ, әзірге кен орнында бірер вагон ғана тұр, жұмыс басталған жоқ. Зерттеу, барлау жүргізіліп жатса керек. Болашақта кен өндіру басталса, 1 мыңдай жұмыс орны ашылады. Соның 95-98%-ы қазақстандық жұмысшылар болады. Біз бұл жерде жергілікті халықтың жұмыспен қамтылуына барынша көңіл бөлетін боламыз, – деді Ғ.Есқалиев.
Әрине өңірде бәрі жақсы деуге болмайды. Мәселен тұрғындар газ бағасының тұтынушылар үшін қымбат екеніне наразы. Сондай-ақ апаттық жағдайда тұрған, үш
ауысымда оқитын мектептер көбейіп барады. Денсаулық сақтау саласында да кадр жетіспеушілігі салдарынан тұрғындар дертіне дауа іздеп, көрші мемлекеттерге сандалып кетеді. Осының бәрі есептік кездесуде ашық айтылды.
Батыс Қазақстан облысы
