Әсіресе, Италиядағы жағдай ушығып тұр. Бір күнде Апеннин түбегінде 6557 адам коронавирус жұқтырған. Осылайша, осы елдегі науқастанғандар саны 53 мыңнан асып кетті. Сондай-ақ Италияда бір күнде 793 адам ажал құшты. Әлемдік пандемия басталғалы мұндай көрсеткіш алғаш рет тіркеліп отыр.
Сонымен қатар Испаниядағы, Франциядағы, Германиядағы, АҚШ-тағы ахуал да көңіл көншітпейді. Аталған елдерде бір күнде науқастанғандар саны екі мыңнан асып кеткен.
Бұған дейін пандемияның негізгі ошағы саналған Иран мен Оңтүстік Кореяда жағдай тұрақталып келеді. Иранда бір күнде 966 адам ауырған. Бұл – кешегі көрсеткіштен біршама аз.
Айта кету керек, қазіргі таңда коронавирус әлемнің 186 мемлекеті мен территориясына таралды. Бүгінге дейін вирус жұқтырғандар саны 297 мыңнан асқан. 12775 адам қаза тапса, 95 мыңға жуығы науқастан құлан-таза айыққан.
