жол апатынан қаза тапқандардың саны өсіп барады
Қазақстан Республикасының Ішкі істер министрлігі «өткен апта ішінде (19-25 тамыз аралығында) елімізде 547 жол-көлік оқиғасы болып, 108 адам көз жұмды, 719 адам түрлі жарақат алды», деп хабарлады.
жол апатынан қаза тапқандардың саны өсіп барады
Қазақстан Республикасының Ішкі істер министрлігі «өткен апта ішінде (19-25 тамыз аралығында) елімізде 547 жол-көлік оқиғасы болып, 108 адам көз жұмды, 719 адам түрлі жарақат алды», деп хабарлады.
Жамбыл облысының «Алматы-Ташкент» тас жолында 10 адамның өмірін қиған ірі жол апаты болды. Екі «Ауди» автокөлігі соқтығысып, жолаушылардың барлығы көз жұмған. Тағы бір жантүршігерлік оқиға Қостанай облысының Амангелді ауданында орын алды. «Арқалық-Торғай» автожолының 54-ші шақырымында «Фольксваген» көлігінің жүргізушісі жол жиегіне шығып кетіп, ішінде отырған 7 адам қаза болды. Апаттан тек 13 жасар бала ғана аман қалған көрінеді. Ол қазір түрлі жарақаттарымен ауруханада жатыр. Дәл осы күні Батыс Қазақстан облысы, Ақжайық ауданы «Чапаев-Жалпақтал» автожолының 22-ші шақырымында УАЗ және ВАЗ маркалы автокөліктер соқтығысып, нәтижесінде 6 адам қаза тапқан.
31 тамыз күні сағат 11.30-да «Алматы-Ұзынағаш» автожолының 55-шақырымында Фабричный кентінің маңында Алматы облысының әкімі Аңсар Мұсаханов жол апатына ұшырады. Ол кезде аймақ басшысы Конституция күніне орай ұлттық ат спорты түрлерінен Қазақстан Президенті кубогы үшін дәстүрлі жарыс өткен «Көк бастау» ипподромынан қайтып келе жатқан. Апат салдарынан облыс әкімі Аңсар Мұсаханов, оның орынбасары Серік Мұқанов, Жамбыл ауданының әкімі Махаббат Бигелдиев зардап шекті. Қазіргі таңда жапа шеккендердің барлығы да №4 қалалық ауруханаға жатқызылған. Алдын-ала мәліметтерге қарағанда, олармен соқтығысқан «Toyota Camry» автокөлігі жолдың қарсы бағытына шығып кеткен көрінеді.
Шынында да, елімізде көлік апаты жиілей түсті. Бейбіт заманда мұншама адамның ажал құшуы алаңдатпай қоймайтын жайт. Полицейлер мұны «жүргізушілердің жол ережесін сақтамауынан» көрсе, мамандар «сапасыз жолдың да әсері бар» дейді.
«Жүргізушілердің жол қозғалысы ережесін ескермеуі, жылдамдықты асыруы, қарсы бағытқа шығып кетуі көбіне жол апаттарына негіз болуда. Сондай-ақ жүргізушілердің балаларға қауіпсіздік белдігін тақпауы, арнайы автокреслоға отырғызбауы да алаңдатады», дейді Ішкі істер министрлігі жол полициясы комитетінің баспасөз хатшысы Ирина Лукьянина.
Айдар ӨРІСБАЕВ,
«Егемен Қазақстан».
