Кеше Астананың «Rixos» қонақүйінде Индонезия Республикасының Президенті Сусило Бамбанг Юдойононың Қазақстанға мемлекеттік сапары аясында Қазақстан-Индонезия бизнес қауымдастығының форумы болып өтті.
Кеше Астананың «Rixos» қонақүйінде Индонезия Республикасының Президенті Сусило Бамбанг Юдойононың Қазақстанға мемлекеттік сапары аясында Қазақстан-Индонезия бизнес қауымдастығының форумы болып өтті.
Оны Индустрия және жаңа технологиялар министрлігі, «ҚазнексИнвест» АҚпен Қазақстанның Сауда-экономикалық палатасы Индонезияның Экономика министрлігі және Қазақстандағы елшілігі мен ынтымақтаса отырып ұйымдастырды. Форум жұмысын Қазақстанның Сауда-экономикалық палатасының президенті Сабыр Есімбеков ашып, жүргізіп отырды. Қазақстанның Экономика және бюджеттік жоспарлау министрлігінен құттықтау сөзді вице-министр Тимур Жақсылықов айтты. Ол екі елдің Мемлекет басшыларының жоғары деңгейдегі сапарлармен алмасуы Қазақстан мен Индонезия экономикаларының ынтымақтаса түсуді қалағанын көрсететін фактор екенін атап өтті.
Екі елдің арасындағы бүгінгі күнгі сауда-экономикалық байланыстар тұрақты түрде даму үстінде. Нақты айтар болсақ, 2012 жылдың қорытындысы бойынша екі елдің арасындағы сауда айналымы 57,2 млн. АҚШ долларын құрады. Ал биылғы жылдың алғашқы жартысындағы ғана көрсеткіш одан үш есе артып, 150,5 млн. АҚШ доллары көлеміне жетіп отыр. Осының өзі Қазақстан Президенті Н.Назарбаевтың былтырғы сәуір айында Индонезияға жасаған ресми сапарының ынтымақтастыққа игі ықпал еткендігінің арқасында қол жеткізген табыс болып отыр.
Сонымен қатар, қазақстандық вице-министр Индонезияны Қазақстанның Оңтүстік-Шығыс Азиядағы белсенді және перспективалы экономикалық әріптесі деп санайтынын жеткізді. Өзінің сөзінде ол Қазақстандағы инвестициялық ахуалдың барынша оңтайлы екенін, мұның өзі бірлескен іскерлік ынтымақтастық орнатуға барынша қолайлы екенін атап өтті. Осындай тиімділіктің арқасында 2012 жылы Қазақстан экономикасына 22,5 млрд. АҚШ долларына тең инвестиция тартылды. Бұл 2011 жылмен салыстырғанда 7 пайызға артық.
Индонезия тарапынан жауап сөз айтқан Экономика министрінің орынбасары Ризал Аффанди Лукман Қазақстан тарабына жақсы ұйымдастырылған қарсы алу үшін алғысын жеткізе келіп, Қазақстанды Индонезияның болашақ үлкен экономикалық әріптесі ретінде көргісі келетінін айтты. Біз Қазақстанның экономикалық жетістіктерін жақсы білеміз. Посткеңестік республикалар арасында Қазақстан өзінің жақсы бастамаларымен барынша танымал, деді ол. Сонымен бірге, вице-министр жоғары деңгейдегі ресми сапарлардың бұл іске игі ықпал ететінін атап өтті.
Форум барысында Қазақстан Республикасы Сауда-экономикалық палатасы мен Индонезияның осындай қызметі арасында ынтымақтастық орнату жөніндегі келісімшартқа қол қойылды. Сондай-ақ, бірнеше қазақстандық және индонезиялық компаниялар өзара ынтымақтастық орнату жөніндегі екіжақты келісімдерге қол қойды.
Форум барысында сөйлеген шешендер арасында «Қазэнерджи» ассоциациясының атқарушы директоры Рамазан Жанпейісов те болды. Ол 2017 жылы Қазақстан Астана қаласында Бүкіләлемдік мұнай конгресін өткізуге ұмтылып отырғанын атап өтті. Осы тарапта индонезиялық компанияларды Қазақстанның кандидатурасын қолдауға шақырды.
Жақсыбай САМРАТ,
«Егемен Қазақстан».
