Олардың арасында пульмонолог, эпидемиолог, инфекционист мамандар мен сарапшылар бар. Ақ халаттылар 24 наурызда Мемлекет басшысы Қасым-Жомарт Тоқаев пен Қытай төрағасы
Си Цзиньпиннің телефон арқылы келісуі бойынша шекаралық аймақта орналасқан Шыңжаң өлкесінің бес ауруханасынан арнайы жөнелтіліп отыр. Олар Нұр-Сұлтан, Алматы және Қарағанды қалаларында бес-бес күннен болады деп жоспарланған. Көмекке келген дәрігерлердің барлығынан Қазақстанға келген бойда бірер сағатта нәтижесі дайын болатын сынамалар алынып, денсаулық жағдайы тексерілген.
Жұма күні ШҰАР Халық ауруханасы бас дәрігерінің орынбасары Лу Чын мен Шыңжаң медицина университетінің №1 серіктес ауруханасының жұқпалы аурулар дәрігері Лу Шяубо Президент жанындағы Орталық коммуникациялар қызметінің онлайн баспасөз мәслихатына қатысып, журналистердің сұрағына жауап берді.
Оқшаулану коронавирустан сақтанудың және таралуына жол бермеудің ең нәтижелі тәсілі екенін жеткізген олар елордадағы күшейтілген төтенше жағдай режімінің жақсы сақталып жатқанына оң бағасын берді. «Карантин көптеген адамның тұрмысына қолайсыздық әкелетіні рас. Бірақ бұл індеттен тез құтылудың бірден-бір тиімді жолы. Біз Нұр-Сұлтанға кеше келдік. Соған қарамастан біз бұл қалада жақсы жұмыс жүргізіліп жатқанын байқадық. Ең бастысы, карантин енгізілген. Көптеген әріптесіміздің маска тағып жүргенін, тіпті бізді осында алып келген жүргізушінің де арнайы киім кигенін көрдік. Сол себепті қолға алынған шаралар дұрыс деп ойлаймын. Кейін ауруханаларға барып, жағдаймен толық танысқан соң толықтай баға береміз», деді инфекционист Лу Шяубо.
Ал Лу Чынның айтуынша, Қытайда 3387 медицина қызметкері ауру жұқтырған. Оның 90%-ы Ухань қаласының дәрігерлері көрінеді. «Оларға инфекция алғаш таралған кезде жұққан. Медицина қызметкерлері аурудың алдын алуға арналған оқу-жаттығудан өтіп, қорғаныш құралдарымен қамтамасыз етілген соң ауру жұқтыру деңгейі айтарлықтай төмендеді», деді ол.
Елімізге келген мамандар Шыңжаң провинциясында індет жұқтырғандарды емдеуге атсалысқан Шыңжаң өлкелік Халық ауруханасы, Шыңжаң медицина университетінің №1 серіктес ауруханасы, Өлкелік дәстүрлі қытай медицинасы ауруханасы, Іле облыстық санитарлық-эпидемиялық бақылау орталығы және Іле облыстық Достық ауруханасының басшылары мен қызметкерлері. Айта кетерлігі, COVID-19 Шыңжаң провинциясындағы 76 адамға жұғып, үшеуі қайтыс болған еді. Қалғандары түгел жазылып шыққан аймақта соңғы 55 күннен бері жаңа жағдай тіркелмеген.