«Бүгінде елімізде коронавирус жұқтырғандардың 79 пайызының ауруы симптомсыз немесе жеңіл өтуде. 18 пайыз науқастың жағдайы орташа болса, 21 адамның халі ауыр, ал 2 адам аса ауыр күйде жатыр. Сондай-ақ олардың ішінде бір жасқа толмаған екі бала бар. Олар клиникалық хаттамаға сәйкес қандай препараттарды қандай мөлшерде беру керектігі бекітілген тәртіпке сай ем алуда. Біреуінің жағдайы қанағаттанарлық, вирус анықталғанымен аурудың белгісі байқалмайды. Екінші бала ауыр халде. Бірақ ол бала туабітті патологиясына байланысты ауыр жағдайда жатыр. Жалпы індетке душар болғандардың барлығының жағдайы бақылауға алынған. Вирус ошақтарымен байланыста болған 31 512 адам анықталды. Оның ішінде 30 850 адам (98 пайызы) оқшауланған. Елде ауруды жұқтыру деңгейі 15 пайыздық мөлшерде. Алайда кейбір өңірлерде бұл көрсеткіш 20-дан 60 пайызға дейін жетіп отыр. Бұл өңірлерде енгізілген карантин тәртібін қатаң сақтауды талап етеді», деді А.Есмағамбетова.
Бас санитар 14 сәуірде карантиндік шараларды күшейту туралы шешім қабылдағанын жеткізді. Қаулыны таныстырған ол: «Барлық ауруханалар күшейтілген эпидемияға қарсы режімге көшеді, онда әр пациент коронавирусқа күмәнді ретінде қабылданады. Науқастарды қабылдауға және диагноз қоюға қатысатын ауруханалар мен емханалардың барлық медициналық қызметкерлері жеке қорғаныш құралдарын пайдалануы керек», деді.
Қаулы бойынша карантиндік және провизорлық ауруханаларда талап күшейтіледі. «Стационарларда бейнебақылау камералары орнатылып, тиісті желдету
жүйесі жолға қойылуы тиіс. Медициналық ұйымдардың әр ауысымы бір-бірінен оқшаулана жүруі керек. Сондай-ақ дезинфекция режімі қатаң сақталып, барлық қызметкерлердің денсаулығы күнделікті тексеріледі. Осыған байланысты барлық бас дәрігерлер қызметкерлерді жеке қорғаныш құралдарымен қамтамасыз етуге міндетті, бұған олар жауап береді», деді А.Есмағамбетова.
Еліміздің 13 өңірінде 423 медицина қызметкері COVID-19 вирусын жұқтырған. Бас санитардың хабарлауынша, олардың жартысынан көбі Алматыда анықталған. «Медицина қызметкерлері арасында 423 коронавирустық инфекция жағдайы тіркелді. Бұл 13 өңірде тіркелді. Жоғары көрсеткіш Алматыда – 53 пайыз. Ал Нұр-Сұлтанда – 33 пайыз, Шымкентте 24 пайыз», деді А.Есмағамбетова.
Сондай-ақ коронавируспен күреске тартылған дәрігерлердің жеткілікті екенін жеткізген ол: «Медициналық ұйымдарда дәрігерлердің жетіспеушілігін болдырмау мақсатында әр өңірде 10 пайыздан бастап 20 пайызға дейін резерв қарастырылған. Сондықтан бүгінде медицина қызметкерлері жеткілікті», деді.
Коронавирустың алдын алудың бірден-бір жолы карантин екенін баса қайталаған еліміздің бас санитарлық дәрігері оның ұзаққа созылу, созылмауы да халыққа байланысты екенін атап өтті. «Инфекцияның таралу өрісіне талдау жүргізе отырып, коронавирус жұқтырған бір адамның 80 адамға дейін жұқтыруы мүмкін екенін біліп отырмыз. Карантин кезінде де көршілер бір-бірімен әңгіме-дүкен құруды доғарар емес. Осылайша бір-біріне вирус жұқтырады. Мұндай жағдайлар кездесті. Орташа есеппен бізде коронавирус жұқтырған 1 адаммен 30 адам байланыста болады екен. Науқастардың 70 пайызының ауру белгісі байқалмайды. Демек сап-сау көрінген адамның өзі инфекция таратуы мүмкін. Президент жанындағы Төтенше жағдай режімін қамтамасыз ету бойынша мемлекеттік комиссия төтенше жағдайды 30 сәуірге дейін ұзартты. Ал карантиннің әрі қарай созылуы да өзімізге байланысты болмақ. Яғни карантин шараларын қатаң сақтап, оқшаулансақ мәселенің шешілуі де тездейді», деді ол.
