– Полиция қызметкерлері тек бір тәулікте (18 сәуір) Атырау қаласында 55 құқық бұзушыны (негізінен автокөлік) ұстады. Ал, 19 сәуірге қараған түні сағат 21:00-ден кейін жолаушылар тасымалдаған 24 жүргізуші анықталды. Оның ішінде, полицейлер түн ортасында «inDriver» қосымшасы арқылы жеке тасымалдаумен айналысқан үш жүргізушіні тоқтатты. Үшеуі де сағат 20:00-ге дейін жүзеге асырылатын азық-түлік жеткізу тәртібін бұзып, жолаушылар тасымалдаған. Оларға қатысты ҚР Әкімшілік құқықбұзушылық туралы Кодекстің 476-бабымен (Төтенше жағдай режимін бұзу) әкімшілік хаттамалар толтырылып, сотқа жолданды.
Сондай-ақ ҚР Әкімшілік құқықбұзушылық туралы Кодекстің 608-бабын бұзған 3 жүргізушіге де хаттама толтырылды. Олар автокөлікті мас күйде басқарған, - деп хабарлады облыстық полиция департаментінің баспасөз қызметі.
Карантиннің күшейтілген талабын бұзған таксистер ақшаға құнығып, ақыны өрескел қымбаттатып жіберген. Таксистер тапсырыс берушілерге бір мекен-жайға жету үшін 3000-нан 5000 теңге аралығында ақы төлеуді ұсынған.
Жұмасат ҒАЗИЗ
