Суретті түсірген Ерлан Омар, EQ
Astana Hub екі жылдан бері кәсіпкерлер мен мемлекет арасындағы байланысты нығайтып келеді. Бүгінде ол еліміздегі инновация мен IT саласын дамытуға бағытталған бизнесмендер мектебіне айналды. Технопарк жұмыс алаңымен қамтамасыз етіп, таратушы қызметін де атқарады. Қазіргі таңда технопарк стартаптарының 30 пайызы шетелдік кәсіпкерлерге тиесілі. Бұл алдымен отандық экономикаға өте тиімді. Өйткені олардың жобалары мемлекетке салық төлеп, елімізде жұмыс орнының көбеюіне үлес қосады. Одан бөлек әлемдегі Nokia, Huawei сынды үлкен корпорациялар өкілдіктерін ашып, жас кәсіпкерлерге бағыт-бағдар беріп те келеді. Енді міне, аймақтық әріптестікті дамыту бағдарламасын іске қосылып отыр.
Бұдан былай облыстардағы технопарктер, акселераторлар, инкубаторлар, коворкингтік ұйымдарға жан-жақты қолдау жасалатын болады. Саланың жаңа жобалары оқу-әдістемелік құралдармен қамтылып, кәсіби маман кеңесін алады. Бұған қоса, бағдарлама қатысушылары түрлі салықтық және визалық жеңілдіктер иеленбек.
– Бізге тіркеліп, келісімге тұрған қатысушыларға қосымша құн салығы, жеке табыс салығы да салынбайды. Осы сынды бірқатар салықтық жеңілдіктер беріледі. Шетелден жұмыс күшін тарту бойынша арнайы визалық тәртіп те қарастырылған. Өтініш беру онлайн жүзеге асырылады. Бәрі ашық. Яғни IT- компаниялар өз өңірлерінен тегін өтініш тапсыра алады. Кеңес мүшелері өтінімдерді қашықтан қарап іріктейді. Кейін біз келісім мен сертификат жібереміз. Содан соң компания мемлекеттік органдарға салықтық жеңілдіктерге қатысты өтінім жібере алады, – дейді Astana Hub IT-стартаптар халықаралық технопаркінің атқарушы директоры Әділет Нұрғожин.
Айта кетейік, былтыр Astana Hub сарапшылар командасы технопарк қызметімен таныстыру үшін, сондай-ақ ел арасында технологиялық кәсіпкерлік мәдениетін ілгерілету үшін өңірлерді аралаған болатын. Startup Sapary бағдарламасы арқылы стартап-жобаларды дамыту бойынша білім алғысы келетін және өз идеяларын барынша қысқа мерзімде іске асыруға бейім бастаушы кәсіпкерлердің жолын ашқан еді. Соның заңды жалғасы ретінде Astana Hub ел аумағындағы технопарктердің әлеуетін арттыруға мүделі. IT-мамандар тың өнертабыстарын іске асыратын жаңа мүмкіндіктерге ие болады. Салаға қатысты соңғы жаңалықтардан да құлағдар етіліп тұрады.
– 2019 жылы Astana Hub аймақтардағы барлық ірі технопарктерді аралап, IT мамандармен кездесті. Олардың көбінде әлі жүзеге аспаған тың ойлар бар. Біз инвестиция тарту бойынша бірқатар жетістіктерге жеттік. «Бизнес періштелер» клубы құрылды. Сондай-ақ көптеген халықаралық венчурлік қор, клуб және компаниялармен әріптестік орнаттық. Қанатқақты жобаларды венчурлік инвесторларға ұсынатын боламыз, – деді Ә.Нұрғожин.
Мамандар жаңа бастама Қазақстанның инновациялық экожүйесін жақсартуға тың серпін беретініне сенімді. Бұл тек ірі шаһарларды ғана емес, жалпы барлық аймақтарды біріктіретін еліміздің бірыңғай IT-қауымдастығына айналуы тиіс.
Astana Hub басшылығының айтуынша, алдағы уақытта нақты жоспары құрылған стартаптар мекені еліміздегі әр саланың IT жүйесін дамытатын, халық өмірін жақсартуға бағытталған жобалардың ордасына айналмақ.
