Баянсыз бағдарлама

Білім және ғылым министрлігінің қар­жы­лық қоржынынан тағы да бір ши шық­ты. Ал оның ақыры шуға айналып кететін түрі бар.

Дүрлігіс Парламент Мәжілісінің Әлеу­­меттік-мәдени даму комитетінде көтерілген әңгі­­меден басталды.

Білім және ғылым министрлігінің қар­жы­лық қоржынынан тағы да бір ши шық­ты. Ал оның ақыры шуға айналып кететін түрі бар.Дүрлігіс Парламент Мәжілісінің Әлеу­­меттік-мәдени даму комитетінде көтерілген әңгі­­меден басталды. Онда­ғыларға ми­нистр­лік­тің бірнеше жылдан бері жүр­гізіп келе жатқан е-лёрнинг атты бағ­дарламасына жұмсаған қаржылары күдік туғызған. Анықтай келгенде, күмән­нің бекер ту­ма­ғаны белгілі бола түсті. Сөйтіп, талай жыл бойы минис­тр­ліктегілер табанын жер-көкке тигізбей мақтап келген оқу бағдары көп мақталған қыздың тойда бүлдіріп ал­ған кейпін киіп шыға келді.

Мәжіліс депутаттары аталмыш бағдар­ламаға берілген қаржылардың құмға сіңген судай жоқ болып кетіп жатқанын біраздан сезіп жүрген сияқты. Енді соны індетіп, қаза қалғанда расында түбі шикі тірліктің арғы жағы былқ ете қалыпты. Арғы жағы деп отырғанымыз – бос қуыс. «Іс бітті, қу кеттінің» кері. Осыншама уақыт бойы шашып-төгіп жұмсаған қаржының қағанағы да жоқ, одан жұрттың көрген сағанағы да жоқ. Былайынша айтқанда, бағдарламаға жұмсалған ақшадан ешкім білім алып, білігін арттырмаған.

Кеше Мәжілісте есеп берген Білім және ғылым министрлігінің өкілдері е-лёрнинг бағдарламасының жүзеге асырылу барысын депутаттарға түсіндіріп береді деп әкелген қарапайым мектеп мұғалімі оның қатардағы оқушы үшін не қажеттілігі барын айтып бере алмай әбден абдырады. Бәріне бірден көздері жете түскен депутаттар сосын көл-көсір ақшаны көзсіз жұмсайтын мұндай обыр бағдарламаны қаржыландыруды дереу тоқтату керек деген бірауызды шешімге келді. Сонымен бірге, аталмыш мақсат үшін бөлінген қаражатты министрліктің қайда жұмсағанын анықтау үшін прокуратура, есеп комитеті және қаржы полициясы шұғыл түрде тексеруге кірісетін болады.

«Менің айтарым: бұл бағдарламаны қаржыландыруды шұғыл тоқтату керек. Қаржы полициясы, есеп комитеті және прокуратура бірлесіп, нақты қанша қаражат жұмсалды, соны тексерулері тиіс. Байқаулар қалай өтті? Неге кейбір мектептерге компьютерлер екі есе бағасына сатып алынған? Біз мұның бәрін анықтайтын боламыз», – деді Мәжілістің Әлеуметтік-мәдени даму комитетінің төрайымы Дариға Назарбаева.

Құрыш НҰРЫМБЕТ.