![Шағын кәсіпкерлік шағын дүние емес](/media/2020/06/09/shaghyn-kasip.jpg)
Әрине шағын және орта кәсіпкерлік саласында шоғырланған. Қазір елімізде ресми тіркелген шағын және орта кәсіпкерлік құрылымдарының саны 1,3 млн-нан асады. Статистика комитетінің кейінгі мәліметіне қарағанда, шағын және орта кәсіпкерлік өкілдері жылына 16 трлн теңгеге жуық өнім өндіріп, ел қоржынына салық түрінде 1 трлн теңгеден астам қаржы құяды екен. Ал Нұр-Сұлтан, Алматы, Шымкент сияқты ірі қалалардағы бюджет түсімінің 70 пайыздан астамын осы саладағы түскен салық төлемдері құрайды. Бұл бір жылғы көрсеткіш емес. Шамамен 2000 жылдардың басынан бері бізде кәсіпкерлік саласы бюджетке жыл сайын осындай қомақты үлес қоса бастады.
Тоқсаныншы жылдары тірек болды
Біле білсек, тоқсаныншы жылдардың басындағы тоқыраудан да елді шағын кәсіпкерлік саласы алып шыққан болатын. Ол кезде шетелдік компаниялардың көмегімен кен орындары жаңа игеріле бастағандықтан, ел қоржынындағы валюта қоры қоңдана қоймаған-ды. Тоқсаныншы жылдардың басындағы «Шағын кәсіпкерлікке – кең өріс!» деген ұран аясында алдымен еті тірі жеңгелеріміз жаппай шаштараз, дүкен, дәмхана тағы сондай кәсіпкерлік нысандарын қаптатып жібергеннен кейін барып өзге жұрт та олардан қалмауға тырысты. Алыс ауылдағы ағайынның да азық-түлігін, керек-жарағын жеткізіп, қысылғандарына қарызға жазып беріп қолтығынан демеген еді. Ел осылай ес жиып, етек жапқан...
Бүгінде елімізде осы шағын кәсіпкерлік саласында ресми түрде тіркелген 4 млн-ға жуық адам еңбек етеді. Бұл – үлкен экономикалық күш. Әлемдік экономикада жетекші орындарға көтерілген Қытай да адам санының көптігімен алдыңғы шепке шығып отыр. Біз бекіре тұқымдас балықтарды арнайы зауыттарда өсірсек, Қытайда әр шаруа үйінің ауласында бекіре бапталады. Басқалар аяқкиімді фабрикада тігетін болса, олар үйінің алдында отырып-ақ тігіп шығара береді. Үкімет тарапынан әр шаруаға аздаған несие тисе, талай кәсіптің басын қайырады. Нарықтағы сұранысқа қарай, едел-жедел бір кәсіпті ашып жіберсе, көп уақыт өтпей басқа кәсіпке бет бұрады. Бұл елде кәсіп жасайтын адам көп, соған орай бюджетке салық төлеушілердің қатары да қалың. «Көп түкірсе, көл болар» деген сол, әне!
Банктер бизнеске қырын қарайды
Біздің ағайындар да қазір кәсіп жасаудан қалыспайды. Өйткені сонау бір қиын уақыттарда кәсіп жасау арқылы өз қолымыз өз ауызымызға жеткенін санамызға мықтап сіңірдік. Сондықтан қазір кәсіпкерлікпен айналысып жүргендер де, айналысқысы келетіндер қатары да көп. Сәл қолтығынан демеп жіберсең, бір кәсіпті дөңгелетіп жібермек болып алақандарын ысқылап жүргендер қаншама. Әттең, біздегі бюрократия осы бағыттағы адымымызды аштырмай отыр. Әйтпесе шағын кәсіпкерліктің үлес салмағы қазіргіден екі-үш есе жоғары болар еді.
Басқасын айтпағанда, Қазақстанда бизнесті қаржыландыру, несиемен қамту мәселесі әлі жүйелі шешілмеген. Обалы не керек, Үкімет шағын және орта кәсіпкерлікті қолдауға, жаңа кәсіп ашпақ болғандарға жеңілдетілген несиелер бөледі. Бірақ сол мүмкіндікті бизнес субъектілерінің басым бөлігі пайдалана алмайды. Өйткені несиені берер кезде қаржы институттарының қоятын талаптары көбейеді: кепілдік сұрайды, басқа шарттар қояды... Нәтижесінде, несие алмаққа талпынған кәсіпкерлердің 8 пайызы ғана қаржыға қол жеткізеді.
Әлемдік KPMG компаниясы 2019 жылы «Қазақстанның тікелей инвестициялар нарығына» жүргізген зерттеуінде осы жайдың бетін ашқан еді. Біз сонда шетелдік компанияның шын көрсеткішті ұсынғанына күмәнмен қарағанымыз рас. Себебі осы бағытта сараптама жүргізетін шетелдік ұйымдардың көбі Қазақстандағы бизнес-қауымдастықтың қыспақта жатқанын көрсетуге бейім екені байқалатын. Алайда «сырт көз – сыншы», бұл деректер шындықтан алшақ болмай шықты. Жақында Парламент Мәжілісінің жалпы отырысында депутат Айқын Қоңыров нақты фактілерді алға тартып, біздегі банктердің бизнеске қырын қарай бастағанын дәлелдеп берді. Оның айтуынша, биылғы наурыз айында банктер 1 трлн 146 млрд теңге несие бөлсе, соның 14 пайызы ғана бизнеске бұйырыпты.
«Бұл 14 пайызды да олар ынтасымен беріп отырған жоқ. Мемлекет коммерциялық банктердің несиеге есептейтін мөлшерлемелерін субсидиялағаннан кейін барып бизнеске несие ресурстарын амалсыз бөле бастады. Егер Үкімет қаржы институтын субсидиямен қамтамасыз етпесе, бизнеске 14 пайыз да бұйырмас еді. Біздегі банктер экономиканың нақты секторын қаржыландыру міндетін мүлдем ұмытқан. Өндірістегі инвестициялық жобалардан ат-тондарын ала қашады. Өйткені келер табысты ұзақ күткісі келмейді. Банктердің бар аңсары бүгін және қазір алып қалуға, бірден пайда табуға ауған. Өндірісті ұзақ мерзімді несиелеу деген ұғым да санадан өшті», деп қынжылыс білдірген еді Мәжіліс депутаты.
«Даму» делдалдық рөлінде
Пандемияның әсері ме, әлде басқа себептерге байланысты ма, жалпы Парламентте мамыр айының соңында бір ширығу байқалғандай. Шағын және орта кәсіпкерліктің жағдайы үлкен мінберде жиі-жиі көтерілді. Депутаттардан бастап жұрттың бәрі экономиканың ендігі тірегі мұнай емес, шағын кәсіпкерлік екенін шын ұққан сияқты. Кәсіпкерлікті қолдау бағытында батыл ұсыныстар айтылуда. Мәселен, Мәжіліс депутаты Аманжан Жамалов «Даму» кәсіпкерлікті қолдау қоры» АҚ бұрынғы жұмыс жүйесінен айырылмай келе жатқанын сынға алды.
Айтса айтқандай, «Даму» кәсіпкерлікті қолдау қорының негізгі жұмыс бағыты банктен бөлінетін несиенің пайыздық сыйақы мөлшерлемесін бюджет арқылы субсидиялау ғана екен. Ондаған жыл бұрын да солай еді, қазір де сол. Мәселен, кәсіпкер өзі іске асырмақ болған жобаға банктен 14 пайыз сыйақы мөлшерлемесімен несие алатын болса, соның 7 пайызын «Даму» қоры субсидиялайды. Былайша айтқанда, қор бюджет пен банк арасындағы делдалдың рөлін атқарып отыр. Субсидиялап жатқан жобаларының саны көп болса, ештеңе демес едік. Өкінішке қарай, «Даму» жыл басынан бері республика бойынша бар-жоғы 703 жобаға ғана қолдау білдіріпті.
Қор қанша жылдан бері жұмыс істеп келе жатса да, мұнда шағын қаржы ұйымдары, тікелей инвестициялар арқылы немесе жобалық қаржыландыру жолдарымен несиемен қамту тәсілдері тәжірибеге енгізілмеген. Соңғы төрт жыл көлеміндегі айта қалар бір өзгеріс – кәсіпкерлердің банкке кепілге ұсынған мүліктерінің құны сәл жетпей тұрса, сондай мөлшерде кепілдік ұсыну. Шынына келсек, мұндай мүмкіндікті иеленетін кәсіпкерлердің саны да шектеулі келеді ғой. Еліміздегі кәсіпкерлікке қолдау көрсететін ең үлкен қордың жағдайы осындай болғанда, қалғандары туралы сөз қозғаудың өзі ыңғайсыз.
Былтыр біраз банк кәсіпкерлерге 0,1 пайыздан 1 пайызға дейін несие береміз деген жарнамаларын жарқыратып іліп еді. Кәсіп бастауға ақша таппай қиналып жүрген ағайын андағайлап жүгіріп барғанымен, қайтуы тез болды. Себебі банктердің оларға ұсынған шарттары тиімсіз болып шықты. Берілетін несиені бастапқы алты айын 1,5 пайыз мөлшерлемемен есептегенімен, бір жылдық несиеге 13 пайыз, 5 жылға алсаңыз 23 пайыз сыйақы мөлшерлемесімен қайтару керек екен. Мұны тек пайда табуды көксеген қаржы құрылымының әрекеті демеске лаж жоқ. Шын кәсіпке бет бұрған адам несие алса, кем дегенде бес жылға рәсімдейтіні айтпаса да белгілі.
Осындай жағдайлар біздегі бизнеске ендігі жерде басқаша көзқарас қалыптастыру керектігін көрсетіп отыр. Ең алдымен шағын кәсіпкерлікті несиемен қамтамасыз ететін ұйымдардың несие шарттарын, қоятын талаптарын, құжаттар пакетін қазіргі кезеңге бейімдеп, қайта қарастырған жөн. Әсіресе жаңадан кәсіп ашпақ болғандарға, жаңа бизнес-жобалар ұсынғандарға жаңа қолдау жүйелері ойластырылса, тіпті дұрыс болар еді. Соның ішінде жеңілдік мерзімін ұзарту, ұзақ мерзімді жобаларға басымдық беру басты назарға алынуға тиіс.
Қазақстанды тоқсаныншы жылғы тоқырауда шағын кәсіпкерлік асырап еді. Пандемия салдарынан туындаған қиындықтарды да тек кәсіпкерлік арқылы жеңеміз. Сондықтан шағын кәсіпкерлікті шағын дүние көрмейік!
Меңдолла ШАМҰРАТОВ,
журналист