Осынау қиын-қыстау шақта Шымкент қала­сын­дағы «Химфарм» кәсіпорны және «Зерде-Фи­то» фармацевтикалық компаниясы қаладағы дә­ріханаларға үздіксіз дәрі-дәрмек жеткізе бас­тады.

Бұл бірінші кезекте шетелден келетін тауарға қарап қалмай, өз өнімдерімізбен науқастарды ем­деуге септігін тигізді. Сонымен қатар медициналық көмекті өз уақы­тында көрсетуді қамтамасыз ету үшін бірыңғай дистрибьютор арқылы 207,1 млн теңгеге қосымша дәрі-дәрмектер мен медициналық құралдарға тапсырма берілді. Бүгінгі күнде 76,8 млн теңгеге тауар жеткізілді.

Мониторинг нәтижесі бойынша көпте­ген дәріха­нада дәрі-дәрмек қоры жеткілікті. Тұрғын­дар сұранысының көбеюіне орай ыстықты түсі­ретін дәрі­лердің (парацетамол, эффералган, пана­дол, нурофен, ибупрофен, нимесулид) 238 486 қорап қоры бар. Оның ішінде дәріхана қоймаларында 115 389 қорап болса, дәріханаларда 123 097 қорабы сақталған.

Ал вирусқа қарсы дәрілердің (ингави­рин, эргоферон, кагоцел, арпефлю) қоры – 38 187 қорап, оның ішінде 25 518 қорабы дәріхана қойма­ларында, ал дәріханаларда 12 869 қорабы бар.

Тұрғындар бірінші кезекте сұрайтын антибио­тиктердің (азитромицин, цеф­триак­сон, цефиксим, амоксициллин, левофлоксацин) 592 899 қорап қоры болса, оның ішінде дәріхана қоймаларында 502 788, дәріханаларда 90 101 қорабы саудалануда.

Дей тұрғанмен, дәрі-дәрмек шығара­тын зауыт өкілдері құралдардың максималды түрде өндіріліп жатқанын айтады. Алайда халықтың сұранысы күннен-күнге артып келеді. Осыған байланысты тапшылық пайда болған.

«Біз елді дәрі-дәрмекпен қамту үшін қолдан кел­геннің бәрін жасап жүрміз. Бағаның қымбаттап кетпеуі үшін делдалдар қатарын көбейтпеуге де ты­­рысып әлекпіз. Барлығы жұрттың денсаулығы үшін жасалып жатыр», дейді «Химфарм» АҚ SANTO компаниясының директоры Ирина Чублукова.

Қазіргі таңда қалада вирусқа қарсы дәрілерге сұраныс жоғарылап, фармацев­тикалық компания­лар тапсырысын 5 есеге арттырған. Шаһардағы «Химфарм» компаниясымен қатар «Зерде-Фито» компаниясы төтенше жағдай кезінде өнім көлемін арттыру үшін үзіліссіз жұмыс істеп жатыр.

Аталған компания өкілдерінің мәліме­тін­ше, қазіргі таңда дәріханаларда параце­тамолдың 50-ге тарта аналогы бар.

«Көршілес Жамбыл, Қызылорда, Түркістан облыстарынан сұраныс көптеп түсуде. Ең бірінші Шымкент қаласын толығымен қамтып болған соң ғана өзге қалаларға жіберіледі», дейді сала мамандары.

Ал «SANTO» дәрі-дәрмек зауытында инъек­циялық ерітінділер мен инфузиялар, қатты перо­ральды дәрілік заттар (таблеткалар, саше, түйір­шіктер), антибиотик ұнтақтары, стерильді емес ерітінділер шығарылады. Тапсырыс көле­мінің артуына байланысты шығарылатын өнім де кө­бейген.

«830 қызметкер тәулік бойы төрт ауысымда жұмыс істеуде. Өнімнің 70 пайызы – көтерме, 30 пайызы бөлшек бағада сатылуда», деді ком­панияның өндіріс жөніндегі директоры Светлана Майорская.

Қалада «Ақниет», «Зерде» компаниялары жүз шақты дәріханаға екі мезгіл дәрі жеткізіп, дистрибьютерлер қоймаларды күніне 2-3 көлік дәрі-дәрмекпен толтырып жатыр.

Миллионды қалада бірнеше фарм компания­лар­дың өнімі қажеттілікті толық қамта­масыз ете алмайтыны рас. Бір қызығы, қаладағы дәрі-дәрмек тапшы­лығын қолдан жасап отырған жағдай да жоқ емес. Олай дейтініміз, дәрі-дәр­мек­тің жетіспеушілігін алыпсатарлар қолдан ұйым­дастырып отыр. Бұл жөнінде өткен аптада вице-премьер Ералы Тоғжанов айтқан болатын. Президент тапсырма бергеннен кейін Шымкентте дәрі-дәр­мекті қымбат бағаға сатып жүргендер ұсталды.

Өкпені жасанды желдету аппараты шығарылады

Бүгінде Шымкентте науқастарға аса қажетті құралдың бірі – өкпені жасанды желдету аппараты. Індет жұқтырғандар санының артуы­на орай шетелден келетін бұл құрал барлық емделушілерге жетпей отыр. Осынау қысылтаяң шақта отандық медици­налық құрал-жабдықтар өндіретін «Kazmedpribor Holding» ЖШС аталған аппаратты өздерінде өндіретін болды.

Бұл ақжолтай жаңалықты Шымкент қаласы­ның әкімі Мұрат Әйтенов әлеу­меттік желідегі парақ­шасында жариялады. Сондай-ақ қала басшысы «Kazmed­pribor Holding» ЖШС директоры Рахат Байзақовпен пандемиямен күрес мәселе­лерін талқылады.

Рахат Тұрғанбекұлы қала тұрғында­рына 150 дана төсектік орын, инфузия құюға арналған 400 дана штатив және 40 дана медициналық бағана сыйлады.

Өзінің алғысын білдірген қала әкімі жақын арада әкімдік қолдауымен «Kaz­med­pribor Holding» ЖШС-і ӨЖЖ аппаратын шығаратынын жеткізді.

«Біз бұл жобамен үш ай бойы жұмыс істедік. Ендігі кезекте қажетті сертификатты алсақ, аппаратты шығара бастаймыз. Алдымен, қаланы толығымен қамтып, содан кейін еліміздің өзге қалаларына көмектесетін боламыз. Бүгінгі бас­ты жа­ғым­ды жаңалық осы», деді М. Әйтенов.

Қазіргі таңда қаладағы медициналық мекемелерде 323 ӨЖЖ аппараты, оның ішінде 130 портативті аппарат бар. Сон­дай-ақ 250 «Бобров» тыныс алу аппараты, 10 монитормен қамтамасыз етілген.