ҚАЛАМГЕР ҚАДІРІ

“Әр адамның жанында ашылмай жатқан кені бар” деген сөздің иесі кім екендігін, сол кісінің шығармаларындағы рухани тазалық пен адамгершілік сезімін бойына дарытқан оқырман қауым жақсы біледі. Иә, дұрыс айтасыз. Бұл сөзді қазақтың көрнекті жазу­шысы, Мемлекеттік сыйлықтың лауреаты, Қазақстанның еңбек сіңірген қайраткері, “Құрмет” ордені­нің иегері, Қазақстан жазу­шы­лар Одағы Астана филиалының жетекшісі Әкім Тарази айтқан еді. Жуырда, халқымыздың абзал азаматы, өз шығармаларымен оқыр­ман қауымның жүрегінен ойып тұрып орын ала білген жазу­шы оқырмандарымен тағы да жақын­даса түсуге мүмкіндік алды. Бұған Ұлт­тық кітапханада ашылған “Таразы­ның екі басын тең ұстай­тын Тарази” атты көрме мұрын­дық болып отыр. Бүгінгі таңда қазақ әдебиетіндегі шоқтығы биік тұлғалардың бірі болып есептелі­нетін Әкім Тарази көр­месі­не өзінің үзеңгілес замандас­тары, әдебиет айдынындағы серіктері, дос-жаран­дары, шығар­машылық ортадағы бауырмал аға-інілері мен жандары жайсаң оқырмандар көптеп келді. 33 жасында алғашқы “Құй­рықты жұлдыз” атты шығар­масы­мен таныл­­ған жас жазушы­ның атағы көп ұзамай ерен еңбегі мен азаматтық рухының арқасында  шартарапқа танылды. Мұның айғағы ретінде Әкім Таразидің орыс, қытай, ағыл­шын, венгер және фин тілдеріне ау­да­рыл­ған кітаптарын айтуға болады. Халықтың зор ықыласына бөленген жазушы “Тасжарған” романымен тіпті даралана түсті. Абай атындағы мемлекеттік педа­го­гика институтын, Мәскеу­дегі жоғары сценаристер курсын тамам­даған Әкім Таразидің Жам­был облысындағы ауыл мектебінде мұғалім болып қызмет атқарғанын біреу білсе, біреу білмеуі мүмкін. Бұдан кейін қазақ баспасөзіне көптеген жылдар еңбек сіңірген еліне адал азамат кинематография саласына да елеулі із қалдырды. “Қорқау жұлдыз”, “Шер”, “Тыр­на, тырна, тырналар”, “Жаза”, “Қиянат”, “Жолы болған жігіт”, “Махаббат жыры” сияқты роман­дар мен повестердің авторы болған Ә.Таразидің біраз фильмдерге сценарийін жазғаны да өзімізге белгілі. Сондай-ақ, Әкім ағаның еңбегі сіңген “Мұстафа Шоқай”, “Арман-атаман”, “Тұлпардың ізі” сынды кинофильмдерін де көрер­мен қашанда сүйіп тамашалайды. Бұның сыры – таланттың нағыз еңбек­қорлығында, адал еңбегінде, оқыр­манға деген шынайы махаббатында жатса керек. – Жарты ғасыр бойы халқын шығармашылығымен сусындатқан Әкім ағаның кітап көрмесінің тұсауын кескелі отырмыз. Жазу­шы­ның шығармашылық өресін өздері­ңіз де жақсы білесіздер. Қазақ әдебиетіне қаншама роман­дар, повестер, әңгімелер, драма­тур­гиялық туындылар, кино­сценарий­лер берді. Уақыт алмасса да, қоғам алмасса да қазақ әде­биеті­нің мол қазынасын үнемі толықтыруды көздеді. Енді жазу­шының еңбек­терін қала сту­дент­­тері, жоғары және орта білім беру мекемелерінің мұ­ға­­лім­­дері, оқу­шы­лар көріп, таныса алады. Бұдан бұрын Әбіш ағамыз бен Фариза апамыздың мерей­тойы­на арналған бір айлық көрмеміз өтіп еді, бүгін­гі көрмені де осындай тағылымы мол дәстүрмен жалғас­тырғалы оты­рмыз”, – деді Ұлттық кітап­хана­ның бас дирек­торы Рахым­жан Отарбаев көрменің ашылу салтанатында. Рәсім кезінде Ө.Байгелди, М.Жол­дас­беков, Ф.Оң­ғарсынова, Т.Әбдік, С.Абдрахманов сөз сөйлеп, қаламгер қадірі жөнінде өз ойларын ортаға салды. Көрмеге жазушының кітап­тары, газеттер мен журналдардағы Әкім аға жөніндегі жарияланым­дар, жазушының жеке мұрағаты­нан алынған фотосуреттер мен көп­теген құжаттар қойылған. Оқыр­манның рухани жан-дүние­сін байытатын бұл көрме бір айға дейін жалғасады. Арай ҮЙРЕНІШБЕКҚЫЗЫ.