Яғни жол картасы аясында клиниканың және медицина факультетінің дәрігерлерінен топ құрылып, науқастанған қала тұрғындары мен университет қызметкерлеріне онлайн-кеңес беруде. Қызметкерлерге дәрі-дәрмек сатып алуға кәсіподақ ұйымы қаржылай қолдау көрсетеді. Осы мақсатта бекітілген хаттамаға сәйкес антибиотиктермен пневмонияны емдеудің 200 курсына жеткілікті қаражат бөлінген. Университет клиникасында қызметкерлерге ақысыз негізде пневмонияны анықтау үшін компьютерлік томографиямен тексеру жүргізілуде және қажет болған жағдайда емделуі үшін клиниканың провизорлық бөліміне жатқызылуда. Сондай-ақ университет клиникасы мен «АИ» медициналық орталығында амбулаториялық емдеу ұйымдастырылған. Мұнда оқытушылар мен қызметкерлердің тиісті процедуралардан өтуіне мүмкіндік жасалған.
«Біз диагностика мен емге мұқтаж барлық қызметкерлерді қамтамасыз етудеміз. Сонымен қатар университеттің кәсіподақ ұйымы тарапынан пневмониядан жазылып шыққан оқытушылар мен қызметкерлердің еліміздің ең жақсы шипажайлары мен демалыс үйлерінде оңалтудан өтуі үшін 300 жолдама беру мәселесі шешімін тауып отыр. Жұмыла күресу арқылы ғана коронавирустық пандемияны тоқтатып, оның қайталануына қарсы қалқан бола аламыз. Дүрбелең мен эмоцияға жол бермеуіміз керек. Әлеуметтік желілерде көптеген жалған ақпараттың жиі таратылатынын ескере отырып, қызметкерлерімізді, студенттерімізді тек ресми ақпараттарды қолдануға шақырдық», дейді Қ.А.Ясауи атындағы Халықаралық қазақ-түрік университетінің ректоры Болатбек Абдрасилов.
Қолдан келген барлық мүмкіндікті жасап жатқан университет басшылығына ризашылығын білдірген оқу орны ұжымы бұл қиындықты абыроймен жеңетіндеріне сенімді.
Түркістан облысы
