Қарағандыда медицина қызметкерлері марапатталды

Аймақтар • 16 Шілде, 2020

Қарағандыда медицина қызметкерлері марапатталды

29 рет көрсетілді

Кеншілер астанасында облыс әкімі Жеңіс Қасымбек Қазақстан Республикасы Президентінің Жарлығымен қызметтік борышын үлгілі атқарғаныжәне жанкешті еңбегі үшін орден, медальдармен марапатталған қарағандылық бір топ дәрігерлер мен медбикелерге Мемлекет басшысының атынан наградаларын табыс етті, – деп хабарлайды Egemen.kz облыс әкімінің баспасөз қызметіне сілтеме жасап.

Қайрат Әбілда

Өңір басшысы «Парасат» орденімен қайтыс болғаннан кейін марапатталған Бұқар жырау ауданының санитарлық дәрігері Бақберген Айжігітовтің наградасын марқұмның жұбайы мен балаларына табыстады.

Бақберген Айжігітовтің жесірі Әлия Баяхметова көңіл білдіріп, қолдау көрсеткен зор қамқорлық үшін алғыс сезімін білдірді.

«Бұл марапат есте қалады. Менің күйеуім әрдайым алдыңғы қатарда болды. Өз жұмысын өте жақсы көрді. Әріптестеріне үлкен құрметпен қарады. Ол Астанаға дәрігерлер қажет болғанда, сонда баруға бірден ниет білдірген еді. Біз оны сапардан бас тартуға көндірмек болдық. «Мүмкін бармай-ақ қоярсың, жас емессің ғой», дегенімізде, «Мен дәрігер-эпидемиологмын, парызымды өтеуім керек, баруым керек», деді. Бір ай Нұр-Сұлтан қаласында жұмыс істеп келді. Ол үшін жұмыс әрдайым бірінші орында болды. Бірақ, отбасын да жақсы көрді, қолдады. Әрине, қазір бізге өте қиын. Ең жақын адамымызды ерте жоғалтамыз деп ойлаған жоқ едік», – деп көзіне жас алды марқұм дәрігердің зайыбы.

Облыс әкімі Жеңіс Қасымбек дәрігерлердің кәсібилігі мен Гиппократ антына адалдығы үшін шын жүректен алғыс айтты.

«Бүгінгі күнде біздің еліміз сіздерге арқа сүйейді. Сіздердің әрбір күндеріңіз осы бір көрінбейтін жаумен күресумен және мыңдаған тағдырларды құтқарумен өтеді. Тіпті, өз денсаулықтарыңыз бен жеке бастың амандығын құрбандыққа шалуға бар екендіктеріңізді көрсеттіңіздер. Ел үшін бұл қиын кезеңде сіздер ерліктің, іске берілгендіктің, қамқорлықтың және көмекке мұқтаж адамдарға жанашырлық танытудың үлгісі бола білдіңіздер. Қарағанды медицина қызметкерлері өз кәсібилігін, ұйымшылдығын және ауызбірлігін тағы да дәлелдеді. Қалай болған күнде де пандемия біздің барлығымызға мемлекеттің басты құндылықтары – азаматтардың өмірі мен денсаулығы екендігін және сенімді, мықты медицинаның маңыздылығын еске салды», – деді ол.

«Құрмет» орденімен наградталған Хафиз Мақажанов атындағы көпсалалы аурухана бөлімшесінің меңгерушісі Сергей Ким жұмыс барысындағы жеңістер мен өкініштер туралы әңгіме қозғады.

«Осы үш айдың ішінде көп нәрсе өзгерді. Дәрігерлер де өздеріне басқаша қарай бастады, көп нәрсені үйрендік. Адамдардың өзіне және өз денсаулығына және жалпы болып жатқан жағдайларға деген көзқарасы өзгерді. Ең қиыны – шарасыз қалғаныңды көру екен. Қалғаны – жай ғана білім, күнделікті күйбең тірлік, – деп сыр ақтарды ол. – Ал ауыр халде болған науқастың өз аяғымен үйіне кетіп бара жатқанын көру – ең үлкен қуаныш. Соңғы болған оқиғалардың бірі – өкпесі 95% зақымданған медбике әріптесіміз емделіп шыққанында ерекше қуанышқа бөлендік».

Жалпы, Қарағанды облысы бойынша Мемлекет басшысының Жарлығымен 15 медицина қызметкері түрлі дәрежедегі наградаларға ие болды. Олар «Парасат», «Құрмет» ордендерімен, «Ерен еңбегі үшін», «Шапағат» медальдарымен және Қазақстан Республикасының Құрмет грамотасымен марапатталды.