«Астана-Ойл» мұнай үйі» ЖШС «Қазына Капитал Менеджмент» АҚ-тан (ҚКМ) ҚКM Sustainable Development Fund I C. V. (BV Management ЖШС басқаруында) еншілес тікелей инвестициялар қоры арқылы Степногор қаласындағы шағын МӨЗ жаңғыртудың 2 кезеңін іске асыру үшін 941,2 млн теңге мөлшерінде екінші транш алды. Жоба ҚКМ-ның жеңілдікпен қаржыландыру бағдарламасы бойынша инвестициялар және кәсіпорынның өз қаражаты есебінен жүзеге асырылады. 3,9 млрд теңге көлеміндегі бірінші транш «Астана-Ойл» мұнай үйі» ЖШС-на 2019 жылдың қыркүйегінде жіберілді.
Шағын МӨЗ арктикалық қысқы дизель отынын өндіруге мамандандырылған, алынған инвестициялар өндірісті жаңғыртуға бағытталған. Атап айтқанда, ҚКМ-нан алынған екінші транш жазғы дизель отыны мен газ конденсатын қысқы дизель отынының, жоғары октанды бензиннің, пропан-бутан сұйытылған газының, пеш және кеме отынының жоғары сапалы сұрыптарына қайта өңдеу үшін көмірсутектердің орташа фракцияларының каталитикалық конверсия блогы бар «OPTIMA-150» МК мұнай өңдеу қондырғысын енгізуге пайдаланылатын болады. Жаңа инновациялық технология қайта өңдеу тереңдігін 95%-ға дейін арттыруға, технологиялық процесті жеңілдетуге және арзандатуға, қосылған құны жоғары мұнай өнімдерін шығаруға және өңірде жаңа жұмыс орындарын құруға мүмкіндік береді.
– Айналым қаражатын толықтыруға бірінші транш бойынша алынған инвестициялар арқылы біз қайта өңдеу үшін шикізат жеткізуді тұрақтандырдық және арттырдық, бұл жаңғырту аяқталғаннан кейін кәсіпорынға толық өндірістік қуаттылыққа шығуға және елдегі мұнай өнімдері нарығында арктикалық пен сапалы қысқы дизель отынының тапшылығын азайтуға мүмкіндік береді, – дейді «Астана-Ойл» мұнай үйі» ЖШС бас директоры Владимир Грищенко. – Жаңғыртуды белгіленген мерзімде іске асыруды жоспарлап отырмыз, пандемия зауыттың қызметіне айтарлықтай әсер етпеді, өйткені дизель отынын негізгі ірі сатып алушылар, атап айтқанда, жер қойнауын пайдаланушылар өз өнімдерін өндіруді жалғастыруда және мұнай өнімдерін толық көлемде сатып алып жатыр. Кәсіпорындағы барлық жұмыс орындары сақталды, өндіріс кесте бойынша жүргізілуде, дизель отынын жөнелту жасалған шарттарға сәйкес жүргізіледі. Жаңа мұнай өңдеу қондырғысын енгізгеннен кейін біз қосымша 10-15 маманды жұмысқа қабылдаймыз.
