Ел Президенті Қ.Тоқаевтың жаңа Жолдауында цифрландырудың сән үрдісінің жалғасы емес, ұлттық бәсекеге қабілеттілікке қол жеткізудің негізгі құралы екендігі аталған болатын. Жаңа оқу жылының басталуына арналған мерекеде цифрлы педагогиканың жаңа зертханасының ашылуы символдық мәнге ие.
– Бүгінде адамзат жаһандық ақпараттық-цифрлы қоғамды құруға байланысты өз дамуының сапалы жаңа кезеңіне қадам басып отыр және осы уақыт талабы «Цифрлы Қазақстан» мемлекеттік бағдарламасында қамтылған. Біз бағдарламаларды іске асыру IT-құзыреттіліктерге ие кәсіби кадрларды қажет ететінін түсінеміз. Жаңа технологиялар дәстүрлі оқыту жүйесін де, білім беру ортасын да өзгертуде. Педагогикада жақында «digital pedagogy» («цифрлы педагогика») термині пайда болды және бұл ұғым «онлайн оқыту» деген сөз тіркесімен синоним емес. Цифрлы педагогика – әртүрлі цифрлы технологияларды (компьютерлер, гаджеттер, бағдарламалық қамтамасыз ету және т.б.) қамтитын және осының нәтижесінде білім беру қызметтерінің неғұрлым жоғары сапасын қамтамасыз ететін педагогикалық процесс. IT-технологияларды дамыту саласы оқу орнымыздың даму тұжырымдамасында да басым бағыт саналады. С.Аманжолов атындағы Шығыс Қазақстан университетінде осы бағытқа көп көңіл бөлінеді, заманауи цифрлы жабдықтармен жарақталған жаңа зертханалар мен оқу аудиториялары ашылуда. Мұның бәрі біздің студенттерге жақсы білім алуға және еңбек нарығында бәсекеге қабілетті болуға мүмкіндік береді. Ал университетте жаңа үлгідегі білім беру технологиялары бойынша кадрлар даярлауға мүмкіндік беретін тағы бір құрылым – цифрлы педагогика зертханасы ашылып отыр, – деді С.Аманжолов атындағы Шығыс Қазақстан университетінің ректоры, профессор Мұхтар Төлеген.
Зертхананы құрудағы мақсат – қазіргі заманғы IT-құзыреттіліктерге ие заманауи білім беру жүйесі үшін педагогикалық кадрларды даярлау, қазіргі заманғы АКТ (ақпараттық-коммуникациялық технологиялар) құралдарын тиімді қолдану жағдайында заманауи оқу процесін педагогикалық жобалаудың ғылыми-әдістемелік негіздерін әзірлеу, оқытудың қосымша нысандарын іске асырудың және мектеп пен колледж педагогтеріне білім беру қызметтерін көрсетудің тиімді тетігін қамтамасыз ету.
Цифрлы педагогика зертханасында оқыту цифрлы білім беру ресурстары, білім берудегі қашықтан оқыту технологиялары, онлайн-оқыту, цифрлы білім беру ортасы, компьютерлік технологиялар және т.б. бағыттар бойынша жүргізілетін болады.
– Біз мектептердегі әріптестерімізге және мектеп түлектеріне, мысалы, ҰБТ-ға дайындықты, ал педагогтерге жұмысқа арналған электронды ресурстар мен жаңа IT-платформаларды, сондай-ақ ресурстардың әдістемелік жиынтығын ұсынамыз: Білім және ғылым министрлігі әдістемелік ұсынымдарын ескере отырып дайындалған бейнедәрістер, бейнеконсультациялар бар. Қазіргі уақытта университет мамандары түрлі тақырып бойынша көптеген бейнематериал, жекелеген оқу пәндері бойынша мұғалімдерге арналған Цифрлы педагогика зертханасында университеттің электронды кітапханасының әдебиеттерін жеке сайтпен және электронды ресурстармен, электронды кітаптармен, аудио жазбалармен және мультимедиалық оқулықтардың платформаларымен пайдалану арқылы әртүрлі вебинарларды онлайн режімде жүктеп отыр, – дейді педагогикалық білім беру және менеджмент кафедрасының меңгерушісі Наталья Радченко.
Үкімет басшысы Білім және ғылым министрлігіне Цифрлық даму, инновациялар және аэроғарыш өнеркәсібі министрлігімен және әкімдіктермен бірлесіп, елде «Цифрлы білім беру» бағдарламасын ауқымды іске қосуды қамтамасыз етуді тапсырғаны белгілі.
– «Дайын ҰБТ» тренажері талапкерге сапалы құрастырылған тест сұрақтарынан өтуге, облыста өз деңгейін, таңдаған пәндерін білуге мүмкіндік береді. Сонымен қатар тренажер келесі өту кезінде тест сұрақтарын қиындата алады, – дейді маркетинг, мансап және жұмыспен қамту орталығының басшысы Жаннель Болатова.
Оқу орнының ректоры М.Төлегеннің айтуынша, Шығыс Қазақстан университеті үй шаруасындағы әйелдерден бастап жоғары оқу орындарының оқытушыларына дейінгі азаматтардың барлық санаттары үшін курстық дайындықтарды жүргізе отырып, болашаққа есік ашып, алға қадам басуда.
ӨСКЕМЕН
