Өйткені осы кезге дейін Ескенеге интернет желісі тартылмаған. Сол себептен, мектеп оқушылары шатырға шығып, интернет желісін іздеуге мәжбүр. Білім нәрімен сусындағысы келген шәкірттердің сатымен шатырға шығып-түсіп жүрген сәті әлеуметтік желілерде де, БАҚ бетінде де жарияланып жатыр. Шынымен солай ма? Мұндай шағын ауылдарда тұратын оқушылар интернетпен неге қамтылмаған?
Осындай сауалдарға жауап алу үшін Мақат ауданының әкімі Шәкір Кейкинге хабарласқан едік. Әкімнің мәліметіне сүйенсек, «Қазақтелеком» АҚ өңірлік филиалының басшылары 20 тамызға дейін Ескенедегі үйлерді интернет желісімен қамтуды Beeline және Kcell мобильді байланыс операторлары арқылы шешуге уәде берген екен. Алайда аталған мобильді байланыс операторларының қызмет көрсетуі қаржыға тірелгендіктен, «Қазақтелеком» АҚ өңірлік филиалының басшылары бұл мәселенің шешілмейтінін ескертіпті.
– Туындаған мәселені оң шешу үшін «Транстелеком» мекемесінің басшыларына өтініш білдірдім. «Транстелеком» мекемесі тарапынан Ескене елді мекенінде темір жол торабының бір бетіндегі 11 үйдің тоғызына оптикалық талшық желісі жүргізілді. Енді бұл мекеме қажетті материалдардың болмауына байланысты қалған үйлерді алдағы қазан айында интернетпен толық қамтуды жоспарлап отыр, – дейді аудан әкімі.
Ш.Кейкиннің айтуына қарағанда, темір жол торабының келесі бетінде 14 отбасы тұрады. Олардың мектеп жасындағы 19 баласы да кеңжолақты интернет желісінің игілігін көрмей отыр. Бірақ Аctiv мобильді байланыс операторының қызметін пайдаланады.
– Бұрын Ескене елді мекеніндегі 22 бала, Таскескен елді мекенінен 6 бала, №441 бекетте тұратын 2 бала Доссор кентіндегі С.Шәріпов атындағы мектеп-интернатта оқыды. Оқушыларға аталған мектеп-интернатта 2020-2021 жылғы оқу процесін жүргізуге дайынбыз. Осыған орай өзім, орынбасарым, округ әкімі, аудандық білім беру бөлімінің басшысы, С.Шәріпов атындағы мектеп-интернаттың директорымен бірге Ескене елді мекеніндегі ата-аналармен кездесу өткіздік. Ата-аналардан мектеп жасындағы балаларын мектеп-интернатта жатып оқуға жіберуін сұрадым. Мектеп-интернатта жатын орны да, тамағы да, интернет желісі де дайын, – дейді Ш.Кейкин.
Алайда тұрғындар балаларын Доссор кентіндегі мектеп-интернатта жатып оқуға жіберуге келіспей отыр. Осыған орай ата-аналар өздерінің қарсылығын қағазға түсіріп, қолын қойып беріпті. Енді олар балаларын қашықтан оқыту үшін интернет желісін орнату мүмкіндігі қарастырылғанын қалайды.
– Балалар – біздің болашағымыз. Олардың қандай жағдайда да сапалы білім алуына көмегімізді береміз. Сол себептен, аталған ауылдарға интернет желісін тарту жұмыстарын жеделдетуді қолға аламыз, – дейді аудан басшысы.
Елімізде цифрландыру жобасы қолға алынып, барша жұрт интернеттің игілігін көріп отырғанда, шағын ауылдардағы шәкірттердің ұмыт қалғаны, олардың шатырға шығуға мәжбүр болғаны өкінішті-ақ. Бұған дейін облыс әкімі Махамбет Досмұхамбетовтің мәлім еткеніндей, мобильді байланыс операторлары арқылы сатып алынатын 3 мың роутер қайда екен? Ал ата-аналар балаларының шатырға шығуына неге рұқсат берген?
Атырау облысы,
Мақат ауданы
