Мектеп директоры Олимпиада Әубәкірованың айтуынша, қазір мектепте 107 оқушы білім алуда, мектеп жанындағы шағын орталықта 35 бала тәрбиеленуде. Оқушылардың дені – елге оралған қандастардың ұл-қыздары. Ауыл балаларына «Оnline Mektep» платформасы арқылы білім алуға жағдай жасалған. Бұған қоса оқушылар «Балапан», «Еларна» телеарналарынан да қосымша білім ала алады.
– Ауылдағы «Агро-Даму» ЖШС мал дәрігері Бауыржан Талғатұлы демеушілік көмек жасап Тұрсынбек Серікбаев, Хави Жайлаухан, Ыдырыш Ермұрат, Әзанбай Оронбасар, Әбілғажы Шалахан, Дубек Ержан, Қинаят Нұрсәулелер тұратын оқушылардың үйлеріне хабар тарататын «Отау» ТВ табақшаларына қажетті қондырғылар орнатып берді, – дейді мектеп директоры.
Сөйтіп енді шалғай ауылда тұратын мектеп оқушыларының жаңа оқу жылында өз білімдерін толықтырып, сапалы білім ала алмақ. Оқушылар «Еларна», «Балапан» телеарналары арқылы өткізілетін қосымша сабақтарға еш кедергісіз қатысуда.
Сонымен қатар ауылда өскен жігіт, қазір Курчатов қаласындағы №3514 әскери бөлімінде келісімшарт бойынша қызмет атқаратын сарбаз Дастан Жамантаев Ержан Дина, Оронбасар Жанерке, Ерасыл Күлімбаев, Оронбасар Ерсұлтан, Ержан Үкіләй, Жайлауханұлы Мадияр, Ермұрат Еділ, Әйкерім Жайлауханқызы, Сейілғазы Айттұмар, Мәрмәр, Ермұрат Серпін сияқты 11 оқушыға демеушілік көрсетіп, мектепке қажетті кеңсе тауарларын алып беріпті.
Ауылдықтар, мектеп ұжымы жанашыр демушілерге жаңа оқу жылының дайындық барысына үлес қосқандары үшін мал дәрігері Бауыржан Талғатұлы мен сарбаз Дастан Жамантаевқа алғыс білдіреді.
Індет тараған кезінде ауылдың, өздері білетін ауылдағы отбасылардың мұқтаждығын сезініп, қолдағы барын бөлісіп, балаларды қуантқандары өзгелерге үлгі боларлықтай.
Павлодар облысы,
Май ауданы,
Ақжар ауылы
