«Самұрық-Қазына» АҚ компаниялар тобының COVID-19 індетінің ықтимал екінші толқынына дайындығы туралы арнайы брифингі өтіп, қордың активтерді басқару және жекешелендіру жөніндегі басқарушы директоры Алмасадам Сатқалиев жан-жақты мәлімет берді.
– Пандемияның алғашқы кезеңінде жиналған тәжірибе көрсеткендей, қор тәуекелдер мен қиындықтарды еңсере білді. Біз негізгі көрсеткіштердің айтарлықтай төмендеуіне, өндірістің тоқтап қалмауына және өндірістік персоналдың қысқаруына жол бермедік, жалақы уақытында төленді, – деді А.Сатқалиев.
Оның айтуынша, қазіргі уақытта пандемия қайталанған жағдайда іс-шаралар жоспарын түзету бойынша жұмыс жүргізіліп, қаржыны резервтеу қамтамасыз етілген. Сондай-ақ тиісті тауарларды, жұмыстар мен қызметтерді үздіксіз жеткізу барысы пысықталған. Портфельдік компанияларға қарасты кәсіпорындар мен мердігерлік медициналық ұйымдардың медициналық көмек көрсету жөніндегі іс-қимылдарға дайындығы нақтыланды.
Қордың қазіргі қабылданып жатқан шаралары өндірістік қызметті қолдау, қаржылық тұрақтылықты қамтамасыз ету және басқарудың ең тиімді құрылымын сақтау үшін қолайсыз салдарға әкелуі мүмкін маңызды бизнес-процестердің тізімін айқындауға бағытталған. Мәселен, пандемияның бірінші толқыны кезінде өндіріске минималды кері әсер етіп, тиімділікті көрсеткен А, В, С жоспарларының алгоритмдері жасалған. А жоспары алдын алу шараларын жүзеге асыруды көздейді. Ал В жоспары эпидемиялық жағдайдың нашарлауы кезінде және С жоспары компанияда немесе өндіріс орнында инфекция жағдайлары анықталған кездегі іс-шараларды бекітуге бағытталған. Сондай-ақ портфельдік компаниялардың індеттің алдын алу іс-шаралары бойынша жүргізген белсенді жұмыстары жалғасуда.
– Әрине, қор қазіргі жағдайды мұқият талдайды. Қызметкерлеріміздің денсаулығын ойлау – басты міндетіміз. Біз бұл бағытта көптеген жұмыс жүргізіп жатырмыз. Пандемия тәжірибесі болашақ бизнесті цифрландыру ісінің, өндірістік экономиканы модернизациялаудың маңызды екенін көрсетті, – дейді А.Сатқалиев.
Басқарушы директор ықтимал екінші толқынға дайындық аясында қор қызметкерлерінің арасында Денсаулық сақтау министрлігінің нұсқамаларына сәйкес COVID-19-дан қорғанудың шараларын сақтау мәселелері бойынша ақпараттық жұмыстары жалғасатынын хабарлады. Сондай-ақ журналистер сұрағына жауап берген ол коронавирус инфекциясынан зардап шеккен салаларға қолдау көрсету және қалпына келтіру жұмыстарына тоқталды.
– Жолаушылар тасымалдау саласына келетін болсақ, бұл коронавирус инфекциясының таралуынан ең көп зардап шеккен сала екені сөзсіз. Пандемияның бірінші толқыны кезінде жолаушылар трафигі тоқтатылғаны белгілі. Жолаушылар тасымалы 2019 жылмен салыстырғанда 50 пайызға қысқарды. Бұл компанияның қаржылық нәтижелеріне әсер етті. Мемлекет тарапынан темір жол саласына бөлінетін жоспарлы субсидияның көлемі сақталып, жағдай қалпына келді.ҚТЖ жолаушыларды тасымалдау жоспарын жыл соңына дейін 60 пайыздан асыра алмауы мүмкін. Бұл сәйкесінше компанияның қаржылық көрсеткіштеріне әсер етеді. Жұмыс тиімділігін арттыру үшін біз жаңа даму жоспарын қабылдадық. Онда компаниялар өндірістік және күрделі салымдарды едәуір қысқартты. Бұл тұтастай алғанда компанияға өндірістік тапсырмаларды орындауға мүмкіндік береді, – деді А.Сатқалиев.
«Самұрық-Қазына» АҚ еншілес компанияларының тұрақты өндірістік көрсеткіші аса маңызды. Кез келген жағдайға байланысты қор жаңа шешімдерді іздеу механизмін іске қосып, басқарушылық және өндірістік процестерді қайта құру мен жетілдіруге бағытталған жобаларға баса назар аударып келеді.
