– Қазақ үшін тазы тұқымы қашанда киесі бар құндылық болып саналған. Сондықтан да құмай тазыны ұстау адамға аса зор жауапкершілік жүктейді. Тазыны балаңдай мәпелемесең, бәрі бекер, – деп сыр ақтарады Қазбек.
Жалпы, уызбайлық азамат тазы өсірумен бала кезден бері әуестеніп келеді екен. Бүгінде ол өзінің көрген-білгенін баласына үйретіп жүр. Қазір Қазбектің қолында бес үлкен тазы және бір күшік бар. Иттерінің тұқымы таза, бәрінің де құжаттары ресімделген.
Тазы тұқымын жанындай жақсы көретін азамат республикалық «Қансонар» қауымдастығымен тығыз қарым-қатынас жасайды. Өзі өңірде, тіпті ел аумағында болып жататын түрлі жарыс, байқауларға белсенді түрде қатысып жүреді. Желдей жүйрік тазылары арқылы талай мәрте жүлде де алған көрінеді.
Қазіргі таңда Қазбек Әбдірахманов ауыл жастарына тазы ұстап, баптауды ғана емес, ұлттық спорт ойыны – көкпарды да зор ықыласпен насихаттап жүр.
– Ауылымыз жастарының ұлттық тамырынан ажырамай, салт-дәстүрді біліп жүргенін қалаймын. Оларға жөн-жосықты біз үйретпегенде, кім үйретеді?! – дейді ол.
Бүгінде Қазбек Әбдірахманов құрған көкпар командасы аудан деңгейіндегі додаларда тәп-тәуір нәтижелер көрсетіп жүр.
Қарағанды облысы,
Осакаров ауданы
