Бақытқали Оразғалиев 2017 жылы достарымен бірге «Зелло. Іздеу» тобын құрды. Жас жігіттің бұл іспен айналысуына Ақтөбенің шетіндегі Жилянка елді мекенінде тұратын таныстарының баласының жоғалып кетуі себеп болды. Көрші тұратын 11 жастағы екі бала қыстың аязды кешінде жоғалып кетеді. Ата-аналары дүрлігіп балаларды түнімен іздегенімен, еш жерден таба алмайды.
– Балалар үйлерінен сөмкеге азық-түлік салып алып кеткен. Ендеше оларды ешкім ұрламаған, өз бетінше бір жаққа кеткен деп топшыладым. Қыс ортасында, аязды күні олар қайда жол тартуы мүмкін? Не болса да, алыстағы саяжайларынан іздеп көрейік деп кеңес беріп, бәріміз жолға шықтық. Айтқанымдай-ақ, екі баланы сол жерден тауып алып, үйлеріне қайтардық. Жалпы, осы жастағы балалар көп жағдайда зеріккендіктен, не ойнап жүріп адасып кетеді. Ал жасөспірімдердің жоғалуына көбіне үй ішіндегі жанжал, ата-анасымен ұрыс-керіс себепші болады. Тобымызға іштей жалғыздық, торығушылық, үрей, қорқыныш сезіміне бой алдырған соң осындай қадамға баратын жасөспірімдермен жұмыс істейтін психолог маман алдық. Ол балаларға үйден кетіп қалудың себеп-салдарын жайлап түсіндіреді. Өкінішке қарай, бала мен үлкеннің арасында тіл табысудың болмауынан осындай жағдайлар туып жатады, – дейді Бақытқали.
Қазіргі кезде «Зелло. Іздеу» волонтерлік тобының 20 үйлестірушісі мен 30-40 іздеушісі бар. Көп жағдайда жергілікті полиция қызметі мен төтенше жағдайлар департаменті де бұлардан көмек сұрап жатады. Волонтерлер ақпарат түскен бойы жоғалған азаматтың суретін әлеуметтік желілерге салып, дереу жан-жаққа хабар жібереді. Осы жағынан алғанда әр волонтердің өзіне бекітілген ауданы бар.
Ұлттық Қызыл Жарты ай қоғамы филиалының қызметкерлері әр тоқсан сайын осы топтың мүшелеріне оқу тренингтерін өткізеді. Сондай-ақ облыстық Төтенше жағдайлар департаменті мамандары волонтерлерді биікке өрмелеуге жаттықтырады, суға кеткен адамдарға алғашқы көмек көрсетуді үйретеді. «Осы жағынан алғанда, біздің тобымыз кәсіби құтқарушыларға айналып келеді», дейді Б.Оразғалиев.
Айта кету керек, жыл басынан бері «Зелло. Іздеу» тобына 60 ақтөбелік тұрғынның жоғалуы туралы дерек тіркелсе, 50 адамды волонтерлер аман-есен тауып берген. Бұлардың ішінде есін жоғалтқан ересек адамдар да, ұмытшақтық дертіне шалдыққан мүгедек жігіттер де, жас балалар да бар. Бүгінде топ мүшелерінің әрқайсысының өз жұмыстары болғанымен, оларды ортақ мақсат – қиын жағдайда қалғандарға көмектесу ісі біріктіреді.
Ақтөбе облысы