Аймақтар • 06 Қараша, 2020

Екінші толқынға қарсы дайындық күшейтілді

Қайталануы мүмкін індеттің екінші толқынына өңірдегі дайындық туралы Орталық коммуникациялар қызметінде өткен брифингте Ақтөбе облысының әкімі Оңдасын Оразалин баяндады, деп хабарлайды Egemen.kz

Баян ҚУАНДЫҚҚЫЗЫ

Жаздағы жағдай өңірдің медицинасындағы кемшіліктерді ашып қана қоймай, сондай-ақ дәрігерлердің де адам өмірін құтқарудағы орасан зор еңбегін көрсетті. Көктем-жаз айларында ақтөбелік 3250 тұрғын COVID-19- ке шалдығып, олардың араынан қайтыс болғандар да бар.

6 қарашадағы мәлімет бойынша, Ақтөбе облысында 2 тұрғын коронавирусқа шалдықса, пневмони диагнозымен 4 науқас тіркелген. Осы 6 науқас шекара бақылап-өткізу бекеттерінен өткенде дене қызуы жоғары болып, бірден ауруханаға жіберілген.

Бұлардың бәрі де Ресей Федерациясынан келген облыс тұрғындары.

Дәрі-дәрмек тапшылығы, індетке дайындықтың нашарлығы, ковид кезінде «Ана өлімінің 13 есеге артуына» байланысты жергілікті атқарушылық билік Мемлекет басшысының қатаң сынына ұшырағаны белгілі. Ана өлімінің көбеюі себебін Оңдасын Оразалин былай деп түсіндірді: "Былтыр 1, биыл 14 ана өлімі тіркелді. Өкінішке қарай 9 әйел жүктілік кезінде ковидке шалдығып, өмірден өтті. Артынан тексеріс жүргізіліп, оларды дер кезінде бақылауға алмаған аурухана басшылары жауапқа тартылды".

Қазір қалалық және аудандық ауруханалар екі айлық дәрі-дәрмек қорымен толтырылды. Науқастарға 3600 төсек орын, реанимацияда 400 төсек-орын әзірленіп, олар өкпені жасанды желдету аппараттарымен жабдықталған. Инвесторлар 550 миллион теңге қаржы бөліп, оған Ресей Федерациясынан ковидке қарсы дәрі-дәрмектер алынып, дәріханаларға таратылды.

Облыс аумағынан Ресей Федерациясынан әрлі-берлі күніне мыңдаған көлік өтіп жатқандықтан, шекараның арғы жағынан ковид таратушылар қаупі жоғарылап барады. Бүгінгі күні "Әлімбет" және «Жайсаң» өткізу бекеттерінен сырттан келген кез келген қазақстандықтың қолында жарамдылық мерзімі 3-күнге тең ПЦР-тест болуы керек. Күрделі мәселе – облыс аумағынан өтетін транзиттік көліктерге тоқтау жоқ. Бұл жерде транзиттік ауыр көліктер жүргізушілерінде жоғары дене қызуы байқалса, олар туралы мәліметтер дереу блок-бекеттерге хабарланады.

Күннің маңызды және өзекті жаңалықтарын «Егемен Қазақстан» телеграм каналынан оқыңыз