![Өңірлерде індет өршіп барады](/media/2020/11/13/blok-post-1-betke.jpg)
Өзіміздің өңірлерде де ауру жұқтыру өршіп бара жатқаны байқалып жатыр. Кейбір облыстардың кіреберіс жолдарына блок-бекет қойылып, қозғалыс ағымы бәсеңдеген. Кезбе дерт кеңірдегімізден алған кезеңде аулаға шығып ауру жұқтырғаннан, отбасыңда отырып сақтанудың абзал екенін түсінетін кез келген сияқты.
Бірақ көлікке мінсе де, көшеге шықса да бетперде тағуға бейжай қарайтындардың саны азаяр емес. Кейбір елордалықтар қолданыстағы шектеу шараларын елемей, ойын-сауық мекемелеріне жаппай баруды жалғастыруда. Осыған орай елордалық полиция қызметкерлері карантинді бұза отырып жұмыс істейтін мекемелерді анықтауды жалғастыруда. Өткен аптадағы тексеру барысында мобильді топ бірқатар заң бұзушылықтарды анықтады.
«Бірнеше мекемелердің иелері тыйым салуды елемей, адамдардың денсаулығына қауіп төндірді. Оларға қатысты жиналған материал әкімшілік жауапкершілікке тарту үшін тауарлар мен қызметтер сапасы мен қауіпсіздігін бақылау басқармасына жіберілді», делінген полиция департаменті таратқан хабарламада. Нұр-Сұлтан қаласы полиция департаменті мекеме иелері мен келушілердің жауапсыздығы инфекцияның таралуына әкеліп соқтыратынын ескертеді. Карантин режімін бұзушылар қолданыстағы заңнамаға сәйкес жауапқа тартылады.
Өткен аптада мобильді топтар аралау кезінде Алматы ауданында – 44, Байқоңыр ауданында – 34, Есіл ауданында – 40, Сарыарқа ауданында 28 карантин тәртібін бұзушылықты анықтады. Сонымен қатар 9 қарашадағы жағдай бойынша тауарлар мен қызметтер сапасы мен қауіпсіздігін бақылау комитетінің аудандық басқармаларына аудандық полиция басқармаларынан карантинді бұзған адамдарға қатысты 1 893 материал келіп түсті. Жалпы сомасы 174 089 450 теңгеге 847 жеке және заңды тұлға әкімшілік жауапкершілікке тартылды. Бүгінгі таңда жалпы сомасы 140 310 450 теңгеге 679 әкімшілік айыппұл төленді.
Еліміздің барлық өңірінде covid-19 вирусын жұқтырғандар саны күрт артқаны байқалып отыр. Бұл туралы Денсаулық сақтау министрлігі Санитарлық-эпидемиологиялық бақылау комитетінің ресми өкілі Ержан Байтанаев айтты.
«Қазақстанда осы жылдың 12 қарашасындағы жағдай бойынша 118 491 науқас тіркелді. Оның ішінде бүгінгі таңда 108 632 науқас сауығып шықты. Бүгінде 7 941 науқас емделіп жатыр. Өкінішке қарай, 1 899 отандасымыздан айырып қалдық. Сонымен қатар соңғы тәулікте 587 адамның коронавирусқа шалдыққаны белгілі болды», деді ол.
Оның дерегінше, осы жылдың 1 тамызынан бастап Сovid-19 пневманиясына 39 545 адам шалдықты. Оның ішінде 23 351 адам емделіп, сауығып шықты. Ал 9 782 науқас ем қабылдауда. 412 адам қайтыс болды. Соңғы тәулікте 188 адамнан пневмония анықталды.
«Сонымен қатар соңғы 2 аптада еліміздің барлық өңірінде Сovid-19-бен сырқаттанудың күрт өсуі байқалып отыр. Сырқаттанушылық барлық өңірде орын алуда. Өткен аптамен салыстырғанда ауру 1,7 есеге өсті. Ауру жұқтырудың 45 пайызы Шығыс Қазақстан облысында тіркелді. Қостанай облысында 4 есеге өссе, Батыс Қазақстан облысында 3,2 есеге артты. Ал Павлодар өңірінде 2,7 есеге айтарлықтай өсім байқалуда. Бүгінде аталған өңірлердің әкімдіктері күшейтілген шараларды қабылдауда», деді Е.Байтанаев.
Сонымен қатар ол соңғы аптада Қазақстанның 9 өңірінде кезекші сыныпта оқитын оқушылар арасында коронавирус жұқтырудың 62 жағдайы тіркелгенін тілге тиек етті.
«Біз оқушылар арасындағы сырқаттану мәселесін күн сайын бақылауда ұстап келеміз. Оқу жылы басталғалы бері оқушылар арасында коронавирус инфекциясының 825 жағдайы тіркелді. Оның ішінде кезекші сыныптарда оқитын балалар саны – 261. Бұл офлайн режімде білім алушылардың жалпы санының 0,03 пайызын құрайды. Ал онлайн форматта білім алатын балалардың КВИ індетіне шалдыққандары 564 оқушы болды. Бұл 0,02 пайызға тең», деді спикер.
Ресми өкілдің дерегінше, балалар арасында ауруға шалдыққандар көп өңірлердің қатарында Шығыс Қазақстан (32), Павлодар (12), Батыс Қазақстан (5) облыстары бар. Ал қалған 4 өңірде аурудың бірлі-жарым жағдайы тіркелді. Атап айтқанда, Қарағанды, Ақмола облыстары мен Нұр-Сұлтан қаласында – 3 жағдай, Солтүстік Қазақстан мен Атырау облыстарында – 1 жағдай», деді Е.Байтанаев.
Өткен аптада елімізде коронавирус инфекциясынан қайтыс болған 42 жағдай тіркелді. Оның ішінде Алматы қаласында – 12, Шығыс Қазақстан облысында – 10, Батыс Қазақстан облысында – 7, Атырау облысында – 5, Маңғыстау облысында – 2, Қарағанды облысында – 2, Нұр-Сұлтан қаласында – 1, Алматы облысында – 1, Ақмола облысында – 1, Павлодар облысында – 1 адам. Жалпы Қазақстанда COVID-19-дың кесірінен барлығы 1 899 адам қайтыс болды.
Айта кететін тағы бір жайт, Нұр-Сұлтан қаласының әкімі Алтай Көлгінов Covid-19 індетін жұқтыру жағдайларының көбеюіне байланысты елорда да «сары» аймаққа өткенін мәлімдеді.
«Covid-19 індетін жұқтыру жағдайларының көбеюіне байланысты қала «сары» аймаққа өтті. Бұл қазіргі кезеңде карантинді жеңілдету қажет емес екенін білдіреді. 11 қарашада 47 жағдай тіркелді. Шағын және орта бизнес нысандары кезек-кезекпен жабылмауы, қала аумағы бойынша блок-бекеттер орнатылмауы және қаланың жабылмауы үшін әр тұрғын жағдайдың қаншалықты ауыр екенін түсінуі керек», деді қала басшысы.