Портал мүгедектігі бар адамдарға оңалтудың техникалық құралын (ОТҚ) өндірушілері мен жеткізушіні өз бетінше таңдауға мүмкіндік береді. Көмектің кепілдік берілген түріне тапсырыс беру электронды цифрлы қолтаңба арқылы жүзеге асырылады. Тапсырыс берілген оңалтудың техникалық құралын жеткізу арқылы немесе өз бетінше алып кетуге болады. Қазіргі уақытта порталда ОТҚ-ның 55 түрінің 24-і қолжетімді. Оларды жеке таңдау қажет емес. ОТҚ-ның жеке таңдап беруді қажет ететін қалған түрлері 2021 жылы порталға ауыстырылады.
«Қазан айында портал арқылы жеке көмекшілер мен ымдау тілі мамандарының қызметтеріне тапсырыс беру, сондай-ақ санаторлық-курорттық емдеу мекемесін таңдау бойынша қызмет қанатқақты режімде іске қосылды. Биылғы 2 қарашадағы жағдай бойынша жеке көмекшінің қызметтеріне 47, ымдау тілі маманының қызметтеріне 44 және санаторлық-курорттық емдеуге 15 тапсырыс жасалған. Мүгедектігі бар адамдарды оңалту құралдарымен қамтамасыз ету протездік-ортопедиялық, сурдотехникалық, тифлотехникалық және гигиеналық құралдарды, сондай-ақ кресло-арбаларды ұсынуды қамтиды», делінген министрлік таратқан мәліметте.
Еске сала кетейік, электронды ресурс мүгедектігі бар адамдарды қажетті қызметтермен және жеткізушіден тікелей ОТҚ-мен қамтамасыз ету мақсатында әзірленген. Қазіргі уақытта порталда 772 жеткізуші тіркелген, оның 25-і ОТҚ ұсынады. 747 ұйым арнайы әлеуметтік қызметтер көрсетеді. Министрлік жеткізушілердің санын арттыру бойынша белсенді жұмыс жүргізуде.
«Әлеуметтік қызметтер порталы» автоматтандырылған ақпараттық жүйесін енгізу Мүгедектігі бар адамдардың құқықтарын қамтамасыз ету және өмір сүру сапасын жақсарту жөніндегі ұлттық жоспар шеңберінде көзделген. 1411 нөмірі бойынша колл-орталықтан порталды пайдалану бойынша кеңес алуға болады.
