Ақтөбеде кәсіпкерлер көбейді

Бизнес ашуға байланысты тиімді мемлекеттік бағдарлама­лардың іске қосылуы, несиелеу­дің пайыздық мөлшерлемесінің азайтылуы, шағын және орта бизнес нысанын тіркеу кезін­дегі құжаттардың азайтылып, тіркеу мерзімінің оңайлатылуы көп­теген тұрғындарды өз істерін бастауға ынталандырды.

Облыстық кәсіпкерлік бас­қар­ма­сының басшысы Нұрхан Тілеумұратовтың айтуынша, қазір өңірде 60 мыңға жуық шағын және орта кәсіпкерлік нысандары жұмыс істеп жатыр. Салыс­тыра айтқанда, биыл өңірдегі шағын кәсіпкерлердің үлесі өткен жылмен салыстырғанда 2,7 пайызға артқан. Көпшілік азаматтар «Бизнестің жол картасы», «Қарапайым заттар экономикасы» және «Еңбек» бағдарламалары бойынша аз пайызбен ұзақ мерзімге несиелер рәсімдеп, бірден жұмыс бастап кетті. Көбінесе аз қамтылған отбасылар, көпбалалы аналар, жұмыссыз жүрген азаматтар оқу курстарынан өтіп, жеке кәсіпкер ретінде тіркеліп, аз пайыздық мөлшерлемемен несиелер алып, өз кәсіптерін ашып үлгерді. Тұрғындар құжат­тарын рәсімдеуге несие беруші ұйымдардың қызметкерлері, халыққа қызмет көрсету орта­лықтарының мамандары жақ­сы атсалысып, дер кезінде және сапалы жұмыс атқарды. Соның арқасында кәсіпті тіркеуге және несие алуға құжаттарды рәсімдеу мерзімдері қысқарды.

Ақтөбе облысында был­тыр «Бизнестің жол кар­тасы» бағ­дарламасы бо­йын­ша кәсіпкер­лерге 2,4 млрд теңге бөлінсе, биыл осы қарастырылған қаржы көлемі 3,3 млрд теңгеге арт­қан. Үсті­міздегі жылы осы бағ­дар­лама бойынша 492 өтінім мақұлданып, былтырғы жыл­мен салыстырған­да жаңа жоба­лар саны 59 пайыз­ға жоғарыла­ды. «Бизнестің жол кар­тасы» бағдарламасының ерек­шелігі – жаңадан кәсіп бас­таған бір азамат 5-6 пайыздық жылдық мөлшерлемемен 20 млн теңгеге дейін несие ала алады.

 Қалада да, далада да кәсіп ашуға мүмкіндік беретін, нарық­қа қажетті өнім өндірушілерді қолдайтын «Қарапайым заттар экономикасы» бойынша былтыр 83 жоба, биыл 110 жоба қол­дау алған. «Еңбек» бағ­дар­ла­масы арқылы 960 жоба ма­құл­данып, жыл ішінде тұрғын­дарға 4 млрд теңгеден астам несие берілген. «Еңбек» бағ­дар­ламасы елді мекендерде тұ­рып, мал шаруашылығымен ай­на­лыс­қысы келетіндер үшін таптырмас жоба. Осы жобамен қаржы алып, шаштараз, нау­байхана, киім тігетін ателье ашып, мал-құс өсіріп, жылыжай салып көкөніс өсіретін қыз-келіншектер, көпбалалы аналар көбейген.

«Кәсіпкерлер палатасы көк­тем­де пандемия басталғаннан бастап, жедел телефон және әлеуметтік желідегі парақша­лары арқылы кәсіпкерлердің бар­лық сауалдарына жауап беруге тырысты. Наурыз айынан бас­тап жұмыстарын тоқтатқан кәсіпкерлер несие төлеу мер­зіміне жеңілдік сұрады, салық­тың азайтылуы мен пандемия­дан кейінгі бизнестің ахуалын сұрады», дейді «Атамекен» Ұлт­тық кәсіпкерлер палатасының Ақтөбе облыстық филиалының сарап­шысы Рахат Тәжібаев.

Ұлттық экономика министр­лігінің сараптауымен елімізде ең көп зардап шеккен 29 кәсіп­керлік түрі бойынша салық жеңіл­діктерінің берілуі, несие қарыздары бар кәсіпкерлердің 1 қарашаға дейін оны төлеу мерзімдерінің ұзартылуы, мем­лекет меншігінен не квазисек­торлық меншіктен жалға алып отырған кәсіпкерлерге жалдау ақысынан үш айға босатылуы – пандемия кезіндегі шектеулерге байланысты тоқтап тұрған шағын және орта кәсіпкерлік нысандарына жақсы қолдау болды.

АҚТӨБЕ