Құрылтайды шақыру туралы шешімді партияның Орталық Кеңесінің президиумы осы жылы 2 қарашада қабылдады. Өңірлерден өкілдік нормалары бекітілді. Барлық филиалға партия конференцияларын өткізу тапсырылды. Конференциялар белгіленген мерзімдерде өткізілді. Осылайша, құрылтайға 250 делегат сайланыпты. Соның 130-ы шешуші дауыспен делегат атанса, қалғандары кеңесші дауыспен сайланып отыр. Эпидемиялық жағдайға байланысты құрылтай өткен ғимаратта бас-аяғы 47 делегат қана болды. Қалғандары партияның аймақтық филиалдарында құрылтайға онлайн режімде қатысты. Олардың барлығы тиісті тіркеуден өткен.
– Соңғы кездегі бірқатар оқиғалар тізбегі – былтыр Қазақстан Республикасының Тұңғыш Президенті мемлекет билігін өркениетті түрде жаңа басшыға тапсыруы дер кезінде болғанын уақыттың өзі дәлелдеп отыр. Нұрсұлтан Назарбаевтың президенттік жүйесі еліміздің тәуелсіздік бастауында мемлекеттік институттардың қалыптасуындағы, түбегейлі нарықтық және қоғамдық реформаларды жүргізудегі және басқа елдермен қарым-қатынас орнатудағы тарихи миссиясын орындады. Келесі кезеңге Қазақстан қалыптасқан мемлекет ретінде аяқ басты. Ал ендігі мәселелерді шешу үшін жаңа тәсілдер керек. Мемлекет басқару ісіне қоғам жан-жақты араласуы және оны бақылауы қажет, – деді «Ақ жол» демократиялық партиясының төрағасы Азат Перуашев.
Оның айтуынша, елімізге әлеуметтік-экономикалық салада да, саяси жүйеге де түбегейлі өзгерістер қажет.
– Аталған өзгерістерді тым соза берудің қауіптілігі сонда, бұл Украина, Беларусь пен Қырғыз еліндегідей мемлекеттік дағдарысқа әкеп соғуы мүмкін. Ал Тәуелсіздіктің ең басты кепілі – қару емес, өз мемлекетін сыйлайтын, бағалайтын азаматтық қоғам болуы керек. Сондықтан қазіргі билік моделіне бір ғана балама бар. Ол – терең әлеуметтік-экономикалық және саяси реформаларды қабылдап, жүзеге асыру қажет. «Ақ жол» демократиялық партиясы жаңа және әділ Қазақстанға апаратын өзгерістер бағдарламасын ұсынады. Сол бағдарламадағы басты басымдығымыз – Тәуелсіздік және Алаш ұлттық идеясы, – дейді партия төрағасы.
А.Перуашевтің пікірінше, еліміздің тәуелсіздігі мен ұлттық мүдделер – мемлекеттің негізгі басымдықтары. Сондықтан ел егемендігін қамтамасыз ету және оның ұлттық мүдделерін қорғау – өзін республика азаматы санайтын кез келген адамның парызы.
– Тәуелсіздік – біздің еліміз, жеріміз, тіліміз бен діліміз. Тәуелсіздік – біздің өз жолымызды таңдау мүмкіндігіміз, келешек ұрпақтың болашағы үшін біздің жауапкершілігіміз. Тәуелсіздік пен еліміздің тұтастығы – әрбір адамның өмірі, құқығы және бостандығымен қатар тұратын басты құндылық. Тәуелсіздік бастауында қазақ халқының еркіндігі мен елдігінің тарихи мұраты ретіндегі Алаш ұлттық идеясы жатыр. Қазақ еліне Алаштан артық идея жоқ. «Ақ жол» демократиялық партиясы мемлекеттік тілдің қолдану аясын кеңейтуді қолдайды. Тілімізді экономика мен қаржы саласына, мемлекеттік басқару мен шетелдік инвесторлар жұмысына мемлекеттік деңгейге сай енгізуіміз керек, – дейді А.Перуашев.
Партия төрағасының айтуынша, биыл «Алаш» автономиясынан бастау алатын және қазіргі Қазақстанның негізін қалаған Қазақ Республикасына 100 жыл толып отыр.
– Алдымен қателесіп, «Қырғыз» Автономиялық Республикасы деп аталып, 5 жылдан кейін Сұлтанбек Қожанұлы, Сәкен Сейфуллин, Жалау Мыңбайұлы және де басқа тұлғалардың арқасында республикамызға ұлтымыздың төл атауы қайтарылды. Өткен жылы «Ақ жол» демократиялық партиясы үкіметке бұл тарихи датаны ресми атап өтуді және «Қазақстан» атымен қатар, тоталитарлық кеңес билігінің өзі мойындаған «Қазақ Республикасы» атауын қолдану туралы мәселені көтерді. Бұл бастаманы Ш.Уәлиханов атындағы тарих институты да қолдады, бірақ біздің шенеуніктер үнсіз қалды. Сонда да біз тарихи бірегейлігімізді білдіретін Қазақ Республикасы мемлекеттік атауын қайтаруды жөн деп санаймыз, – дейді партия төрағасы.
