Дегенмен уақыт өте келе томпақ қыздың еңбексүйгіштігі Эльмира Әлиева сынды білікті бапкердің назарын өзіне аудара бастаған. Айтқанды қағып алып, тура көңілден шығатындай істеуге тырысатыны ұнады. Сұңғыла бапкер оның үстел теннисіне икемділігін бірден байқаған. Аунап ай, жылжып жыл өтіп жатты. Зәурештің бо­йында спортшыға тән табандылық пен қайсарлықтан бастау алатын мінез-құлық қалыптасты. Әрбір ойында жеңіске жетіп, бірінші болуға ынтық құштарлық та бірте-бірте пайда бола бастаған.

Көп ұзамай алғашқы жеңістер де төбе көрсете бастады. Басында Қарағанды облысы бойынша өзінен жасы әлдеқайда үлкен қарсыластарын бірінен соң бірін жеңіп, республика деңгейіндегі жарыстардың жеңіс тұғырына жиі көтеріле бастады. Соның нәти­жесінде жасөспірімдер арасындағы ұлттық құрама сапына қабылданып, халықаралық тур­нирлер мен Азия чемпио­наттарын­да табысты өнер көрсетіп жүрді. Осының бәрі жас қыз үшін маңдай тер, мехнатты ең­бекпен келген нәтиже еді.

Зәуреш Ақашеваның жұл­ды­зы биыл жарқырай жанды. Қаңтар айында Қарағанды қала­сында үстел теннисінен Қазақ­станның жекелей және коман­далық чемпионаты өткен болатын. Міне, осы сында Зәуреш тамаша өнер көрсетіп, үш бірдей алтын медаль алып, еліміздің абсолютті чемпио­ны атанды. Тәуелсіз Қазақстан спортының тарихында қазақ қыздарының арасынан бұрын мұндай биікті бірде-бір спортшы бағындырып көрмеген еді.

Осы толайым табысынан соң, Зәуреш ересектер арасындағы Ұлттық құрама команда сапын­дағы орнын «шегелеп» қойды. Бұл дегеніңіз, қазақтың қарша­дай қызының келер жыл додасы басталады деп жүрген Токио Олимпиадасына қатысуы бек мүмкін деген сөз. Әлбетте, алда лицензия үшін жан алысып, жан беріскен жекпе-жектердің болары сөзсіз. Ал Зәуреш болса, өзіне сенімді.

Үстел теннисіндегі үрдісті үнемі қадағалап жүретін Зәуреш әлемнің бірнеше дүркін чемпионы Фан Чжэньдун есімді қытай теннисшісінің ойынын өзіне үлгі етеді екен. «Фань Чжэньдун – дүние жүзіндегі әлемнің ең жас чем­пионы: алтын медальды 17 жасында жеңіп алған. Ол оң қо­лы­мен ойнайды, ракетканы еуро­палық тәсілмен ұстайды. Негі­зінде ол шабуылдаушы мәнер­дің ойыншысы», дейді Зәуреш.

Қазір өзі Қарағанды мемле­кет­тік университетінің дене тәр­биесі және спорт факульте­тінде білім алып жүр. «Бос уақы­­тым­­да тәтті-дәмді тоқаш түр­лерін пісіргенді жақсы көремін», дейді спортшы қыз. Өзінің бола­шақтағы өмірі спортпен, оның ішінде тенниспен тығыз байланысты болатынына сенімді.

«Менің алғашқы және қазіргі жаттықтырушым – Эльмира Қайыр­қызы Әлиева. Ол кісі жатты­­ғуда тәртіпті қатаң сақтай­тын бап­кер. Тәртіп болған жерде нәтиже де болады деген қа­ғи­датты ұстанады», дейді Зәуреш өзінің бапкері туралы.

Эльмира Әлиева кезінде үстел теннисінен үлкен табысқа жеткен спортшы болды. КСРО-ның спорт шебері атағын иемде­нудің өзі оның қандай теннис­ші болғанын аңғартса керек. Эль­мира Қайыр­қызы өзінің спорт­тық мансабында бес жылдай Қазақстан құра­ма командасының сапында өнер көрсеткен. Елі­міздің бірне­ше дүркін чемпионы атанды. Ке­ңес­ Одағы кубогы сынында жүлдегер болса, КСРО бірінші­лігінде топ жарған тамаша жетістігі де бар.

«Зәурештің басқа теннис­ші­лерден басым түсіп тұратын қасиет­терінің бірі – шапшаңдығы мен күш­тілігі. Шарды шыр­қы­ратып тұрып ұрғанда, оқша зула­тады. Қорғанысы мығым, көбіне шабуылдап ойнағанды жақсы көреді», дейді Қазақстан­ның еңбек сіңірген жаттықты­рушысы Эль­мира Әлиева шәкірті туралы сыр ақтарып.

Зәурештің отбасын таза спорт­шылар шаңырағы деп айтуға келмес. Әкесі Рамазан Дүйсен­тайұлы экономист маман­ды­ғы бойынша еңбек етеді екен. Ал анасы Татьяна Борисовна Син заңгер болып жұмыс істейді. Дегенмен анасы жас кезінде спортқа қатты әуес болған екен: баскетбол, волейбол, шаңғымен айналысыпты. Ал Зәурештің өзі үйдегі бес баланың кенжесі.

Талантты теннисші Қара­ғанды облыстық дене тәрбиесі және спорт басқармасы тарапы­нан жасалып жатқан жағдайға риза екенін айтады. «Қазір жоға­ры дең­гейде нәтиже көрсетіп жүр­ген спортшылардың стипен­дия­сы көтерілген, басқа да тұрмыстық деңгейдегі мәселелер шешімін толықтай тапқан. Бас­шылық жағынан жан-жақты қам­­қорлықты сезінген сайын жан­­күйерді ұятқа қалдырмауға, на­мысты қолдан бермеуге тыры­са­сың. Мұның өзі кез келген спорт­­шыға үлкен жауапкершілік жүк­т­ейді», дейді саңлақ спортшы.

Қазір Зәуреш құрама сапында Талғардың маңындағы «Ақ­бұлақ» олимпиялық орта­лы­ғында оқу-жаттығу жиынында жүр. Сәтін салса, алдымыздағы қаңтар айында Қарағандыда Токио Олим­пиа­дасының жолдамалары сарапқа салынатын халықаралық турнир өтпекші. Осы сында біз Зәу­рештей қазақ қызы үшін тақым қысып, талантты теннисшінің тілеуін тілейтін боламыз.

ҚАРАҒАНДЫ