Аймақтар • 01 Желтоқсан, 2020

С.Зимановтың 100 жылдық мерейтойына орай апталықтың ашылуы өтті

67 рет көрсетілді

Ақтау қаласындағы Ш.Есенов атындағы КМТжИУ-де академик Салық Зимановтың  100 жылдық мерей тойына арналған "С.Зиманов – ұлттық құқықтық жүйенің ғылыми мектебінің негізін қалаушы" атты апталықтың ашылу салтанаты өтті, деп хабарлайды Egemen.kz

Келесі жылы отандық заң ғылымның атасы, Қазақстан Республикасы Мемлекеттік сыйлығының, Президенттің бейбітшілік және рухани келісім сыйлықтарының иегері заң ғылымдарының докторы, академик С. Зимановтың туғанына жүз жыл толғалы отыр.

Ол еліміздің ұлттық құқықтық жүйесінің қалыптасып, дамуына айрықша үлес қосып, өзінің атын отандық юриспруденцияның тарихына алтын әріптермен жазған тұлға десек артық айтпағандық болар еді.

С. Зимановтың ғылыми-зерттеу еңбектері негінен алғанда, мемлекет пен құқық тарихы мен теориясына Қазақстан мен Орталық Азияның өзге де аймақтарында ұлттық мемлекеттердің қалыптасуы мен даму жолдарына, тәуелсіз қазақ мемлекетінің құқықтық платформасының қалыптасуына және т.б. өте өзекті мәселелерге арналған.  

Оның өмір жолы – қазіргі уақытта өте сирек құбылысқа айналған, ғылымға адал ғалымның және ары таза мемлекеттік қайраткердің ақиқат бейнесі. Салық Зиманұлы жоғары білікті құқықтанушы ғалымдар мен тәжірибелік заңгер қызметкерлерді дайындау тәрізді аса маңызды өрісте де тынбастан еңбек етті. Ол аса үлкен ғылыми мектепті қалыптастарды, оның шәкірттері қазіргі таңда еліміздің түпкір-түпкірінде, құқық саласының әртүрлі өрістерінде жемісті еңбек етуде. Олардың қатарында ұстаздарының ақ батасымен өздерін ғылыми, ағартушылық және қоғамдық-саяси қызметке арнағандары да жетерлік.

Қазақ халқының қолына уақыттың өзі берген тарихи мүмкіндікті пайдаланып, аталарымыздың арманы болған тәуелсіз мемлекетті қалыптастыруға деген қажеттілік, көптеген біртуар тұлғалардың тарих сахнасына жарқ етіп шығуына себепкер болды. Академик С. Зиманов осындай тарихи тұлғалардың бірі және бірегейі бола білді, деді құттықтау сөзінде Университет ректоры Б. Ахметов.

Шарада академик Салық Зиманов туралы  бейнеролик көрсетіліп, қонақтар – Маңғыстау облысы әкімдігінің, Маңғыстау облыстық сотының өкілдері,  "Билер кеңесі" Қоғамдық Бірлестігінің өкілі мен Түпқараған аудандық білім жүйесін дамыту орталығының» директоры, Түпқараған ауданында орналасқан "С.Зимановтың өмірі мен шығармашылығына арналған мұражайдың" қызметкері сөз сөйлеп, С.Зимановтың Жоғарғы оқу орындарында, ғылыми ұйымдарда басшы, Қазақстан Республикасы Президентінің жанындағы Консультативтік кеңестің, Қазақстан Республикасының Мемлекеттік саясат жөніндегі Ұлттық кеңесінің мүшесі, Қазақстан Республи­касы Жоғарғы Кеңесінің депу­таты атанған жылдарында да туған тіліміз бен төл мәдениетіміздің тынысын кеңейтуге, еліміздің ырысын көбейтуге еңбек сіңіргендігін, Ата Заңымыздың негізін қаласып, заңдылықтың салтанат құруына атсалысқандығын, сондай-ақ тәуелсіздіктің алғашқы қиын да жауапты жылдарында Мемлекет басшысының қасында болып, азаттыққа жаңа қол жеткізген Отанымыздың өркендеуіне бағыт-бағдар берді, ұлт зиялыларының өнегесімен халыққа шынайы қызмет еткендігін баяндады. Білікті заңгер маман ретінде егемендік, тәуелсіздік жолын­дағы Қазақстанның халықаралық қатынастарын заңдастырып, қазақ тіліне мемлекеттік мәртебе беру, президенттік басқару институтын енгізу, құқықтық-демократиялық реформаларды жүргізу ісіне белсене араласып, қазақ халқының құқықтық жүйесін зерттеп, билер мен шешендердің билік өнерін бүгінгі ұрпаққа жеткізгендігі, Қазақстан егемен ел болғаннан кейін де мемлекеттің Конституциясы мен қолданыстағы заңдарын қабылдау және жетілдіру мақсатында көп тер төккендігі, Республика Жоғарғы кеңесінің депутаты, Комитет төрағасы және Жоғарғы кеңес Төралқасының мүшесі бола жүріп, ел үшін аса маңызды заңдардың жүйелі жасалып, орнықты бекітілуіне атсалысқандығы айтылды.

"Құқықтану" кафедрасының доценті С.Алибековтың айтуынша, апталық аясында "Құқықтану" мамандығының студенттері арасында "Қазақ билер соты – бірегей сот жүйесі" атты шығармалар сайысы өтіп, "Әділеттілік –мемлекеттің мызғымас тұғыры" атты брейн-ринг ұйымдастырылады. Сондай-ақ онлайн форматта "Салық Зиманов – ғұлама заңгер, ұстаз, қайраткер" атты ашық тәрбие сағаты, "С.Зиманов  және оның отандық заң ғылымының негізін қалаудағы ролі" онлайн ғылыми-семинар ұйымдастырылады.

Соңғы жаңалықтар

Соққан жел нысандарды қиратқан

Аймақтар • Бүгін, 17:16

Атырауда қанша қайыршы бар?

Аймақтар • Бүгін, 14:35

Сочиде сайысқа түседі

Спорт • Бүгін, 13:28

Ұқсас жаңалықтар