Ел экономикасының тығырыққа тірелген шағын бастан кештім. Одан шығу үшін өтпелі кезеңде Үкімет халық мүддесіне сай жедел шешімдер қабылдап, ел тұрмысын оның сұранысына сай жақсартуға тырысты. Бірақ ол шешімдерді тез арада жүзеге асыру оңай болған жоқ. Тәуелсіздігімізді баянды ету жолында қаншама ізденіске барып, қаншама қиындықты бастан кешіруге тура келгенін ел тізгінін ұстап, осы мәселелермен тікелей айналысқан жауапты лауазымдағылар жақсы біледі.
Тәуелсіздігіміздің алғашқы жылдары бұрынғы социалистік жүйеге бейімделген кадрлар халықтың күнкөріс мәселелерін тез арада шешуге қауқарсыз болды. Алайда Тұңғыш Президент аз уақыт ішінде маңайына тәуекелге бара алатын, өзіне өзі сенімді, ынталы мамандарды іріктеп, ел мүддесіне қызмет етуге бағыттай алды. Елбасы бастамасымен жоғарыдан басқарылатын жоспарлы шаруашылық жүргізу тәсілдері тез арада жойылып, тауар өндіруші кәсіпорындар мемлекет меншігінен алынып, жекенің меншігіне берілді. Осылайша, капиталистік жүйеге негізделген тәуелсіз мемлекет құру үшін нарықтық экономика әрекеттеріне барсаң да барасың, бармасаң да барасың деген үзілді-кесілді талап қойылды. Сол кезден бастап, меншікті мемлекет иелігінен алу, жекешелендіру және меншікке дербестік беру деген жаңа терминдер қолданысқа енді.
Оған дейін одақтық жоспарлау, яғни «Госплан» деген органның халықтық шаруашылық кешені таратылып, Мәскеу ендігі жерде одақтас республикалар орталыққа қол жаймай, өз күндерін өздері көрсін деуге мәжбүр болған еді. Осының нәтижесінде одақтық өндіріс орындары жойылып, күнделікті өмірге қажет тауарлар өндірісі тоқтап, дүкен сөрелері қаңырап бос қалды. Осындай экономикалық дағдарыста біз одақпен қоштасып, тәуелсіз Қазақ мемлекетінің қабырғасын қалауды бастадық, айтуға әрине оңай, тәжірибелік тұрғыда оған кедергілер аз болған жоқ. Ел экономикасының тез арада тығырықтан шығып, өркендеп дами бастауында Тұңғыш Президенттің батыл әрекеттері шешуші рөл атқарды. Ол кісінің көш бастауға лайықты тұлға екенін уақыттың өзі дәлелдеп берді.
Тәуелсіздікке бетбұрыс басталған кезде Елбасы осы жағдайларды халыққа дәлелді түрде түсіндіріп: «Тәуелсіз мемлекет құру бұрын-соңды біздің тәжірибемізде болған жоқ. Ол үшін енді қыруар жұмыстар атқару қажет. Сондықтан алда әлі талай қиындықтар болады. Қателіктер де болуы мүмкін», деп ашық айтты. Осылайша, Мемлекет басшысы халықты өтпелі кезеңнің небір қиындықтарына төзе білуге шақырды. Алғашында біз «бұл кешегі кеңес заманындағы жалаң ұрандар сияқты болып қалмас па екен?» деп те ойладық. Бірақ көп кешікпей ол кезеңнің қиындықтарын әр адам жан-тәнімен сезді, әркім бұрынғыдай мемлекетке қол жаюдан арыла бастады. Содан кейін мемлекет меншігіндегі кәсіпорындар банкротқа ұшырап, олардың мүліктері жекешелендірілді, борыштары жойылды. Меншік иелері экономикалық бостандық алып, сұранысқа сай өнім шығаратын шағын кәсіпорындар ашып, өздерінің позицияларын күшейтті. Шағын және орта кәсіпкерлікпен айналысуға үкімет тарапынан көптеген жеңілдік жасалды. Бұл жұмыстардың бүгінге дейін жалғасып жатқанын көзіміз көріп отыр. Осы игі істердің басы-қасында өзім де жүргендіктен, Тәуелсіздік мерекесі қарсаңында көрген-білгенімді айтып, өткен тарихты еске алғанды жөн көрдім.
Баршамызға Тәуелсіздік күні мерекесі құтты болсын! Елде тыныштық, бірлік болса, алынбайтын қамал, асу бермейтін асқар жоқ, мен оған кәміл сенемін! Тәуелсіз Қазақстанға тәуелді болайық, ағайын!
Мырзағали ҚҰРМАНОВ,
зейнеткер
Қостанай облысы,
Тобыл қаласы
