«Қызыл аймақтағы» жалғыз өңір Атырауда коронавирусты жұқтырушылар неге көбейді?

Облыстық денсаулық сақтау басқар­масы баспасөз қызметінің мәліметіне сүйенсек, соңғы екі тәулікте қауіпті індетті 169 адам жұқтырып отыр. Оның ішінде 30 науқас Атырау қаласында тіркелген. Коронавирусты жұқтырушылардың дені бұрынғыша Теңіз кенішіндегі жұ­мыс­шылар екені анықталған. Өт­кен екі тәулікте аталған кен орнында жұ­мыс істейтін 123 жұмысшы қауіп­ті ін­детке шалдықты. Сондай-ақ Мақат, Ма­­хамбет, Индер, Құрманғазы аудан­дарының тұрғындарынан да Сovid-19 инфекциясының белгісі табылды.

Тек соңғы бір тәулікте 112 науқас коронавирус инфекциясынан емделіп шығыпты. Қазір 249 адам үй жағдайында емделуде. Облыстық инфекциялық стационарда – 78, аудандардағы стационарларда 13 пациент жатыр. Ал Теңіз кенішіндегі инфекциялық стационарда ем қабылдап жатқан науқастардың саны 321 адамға жетіп отыр.

«Теңізшевройл» ЖШС-ның Үкімет­пен және жұртшылықпен байланыс бөлімінің бас менеджері Рзабек Ар­ты­ғалиевтің айтуынша, Теңіз кені­шін­дегі жұмысшылардың қауіпті індетті жұқтыруының мынадай бір себебі бар. «Мердігер мекемелердің кейбір қызметкерлері санитарлық бекеттерден жалған ПТР-тест анықтамаларды көрсету арқылы өткен фактілер анықталды. Осындай қызметкерлерге берілген рұқ­саттар дереу жойылды. Өрескел фактілер туралы тиісті мемлекеттік органдарға хабарланды. Ресми тергеу жүргізіледі деп кү­тілуде», дейді ол.

Мұндай деректің айтылуы негізсіз емес. Тіпті өзінің де, өзгенің де саулығын ойламайтын кейбір пысықайлар кен орнындағы блок-бекеттерді айналып өтуге тырысады екен. Дәл осы деректі полиция қызметкерлері жоққа шығармайды. Өйткені Жылыой аудандық полиция бөлімі Теңіз полиция бөлімшесінің қыз­меткерлері кен орнындағы блок-бекетті айналып өтпек болған бір топ адамның жолын кесіп, тосқауыл қойды. Жақында аталған бөлімшенің патрульдік полиция инспекторы, полиция капитаны Тілеуке Құмаров блок-бекетті айналып, кен орнына қарай бағыт алған «Lada Granta» автокөлігін байқапты. Полицей бұл туралы басшылыққа хабарлап, өзі тоқтату үшін аталған көлікке бет алған. Сол сәтте оған көмекке әріптестері көмекке келді.

– Полицейлер Құлсары қаласында тұратын 31 жастағы азаматтың басқа­руындағы көлікті вахталық кентке кі­ре­берісте тоқтатты. Көлік салонында жүр­гізушіден өзге төрт ер адам болған. Олардың екеуі Орынбор қаласында тұратын Ресей Федерациясының азаматы болып шықты. Құжаттарды тексеру кезінде үш жолаушының, оның ішінде бір ресейлік азаматтың қолында ПТР-тесттен өткені туралы анықтама болмады. Көліктегілер «Теңіз» вахталық кентінің аумағында орналасқан компаниялардың біріне баруды көздеген, – деп хабарлады облыстық полиция департаментінің баспасөз қызметі.

Облыстың мемлекеттік бас санитар дәрігері Амантай Жұмағалиевтің айтуына қарағанда, қауіпті індетті жұқ­тырушылардың 80 пайызын вахталық ауысыммен өзге өңірлерден жұмысқа келген азаматтар құрағаны анықталды. Демек, кей компаниялар карантиндік шектеу шараларын сақтауға мән бермейді. Соның қатарында «Матен Петролиум» ЖШС бар.

– Биылғы 7 желтоқсанда қалада ін­детке шалдығудың жоғары деңгейі – 19 жағдай тіркелді. Ал облыс бойынша – 61 жағдай. Оның ішінде 19 науқастың екеуі – Атырау қаласының тұрғындары, қалған 17-сі – компаниялардың бірінің вахталық ауысымға келген қызметкерлері. Қа­лалық санитарлық-эпидемиялық ба­қылау басқармасының қызметкерлері жүргізген эпидемиялық тексеру кезінде «Матен Петролиум» компаниясының қызметкерлері вахтаға бару үшін ПТР-талдауын тапсырғаны анықталды. Со­нымен қатар жұмысқа кірісу үшін қыз­меткерлер карантиндік стационарда 7 күн жатуы керек. Ал 7-ші күні ПТР-тал­­дауды тапсыруы тиіс. Егер ПТР-тал­­дауы теріс болса, олар жұмысқа жі­­бе­ріледі, – дейді Атырау қалалық сани­­тар­лық-эпидемиялық бақы­лау басқар­ма­сы­ның басшысы Қанат Ғай­неденов. – Компания қызметкерлері орналасқан қонақ-үйлердің жағдайы санитарлық нормалар мен ере­желердің талаптарына сәйкес келмеді. Сонымен бірге басшылар да, қызметкерлер де жұмысшыларды карантинге орналас­тырғаны туралы хабардар етпеді. Өйт­кені келісімшартта жай тұру туралы көрсетілген. Ал қызмет­керлердің жағ­дайын бақылау үшін медициналық қызметкерлер болған жоқ.

Оның айтуынша, қонақүйге орналас­қандарға арналған жеке қорғаныс құралдары шектеулі мөлшерде берілген. «Матен Петролиум» жұмысшыларының өздері қонақүйде еркін қозғалып, бірге тамақтаныпты. Тіпті оқшаулау талаптарын бұзып, бір бөлмеде екі-үш адам тұрған. Ал науқастармен байланыста болған сегіз адам қонақүйден мүлдем кетіп қалған. Шектеу шараларын бұзған осындай дерекке байланысты «Матен Петролиум» компаниясына әкімшілік құқықбұзушылық туралы хаттама толтырылып, 1600 АЕК (3 644 800 теңге) мөлшерінде айыппұл салынды.

Міне, осындай себептер Атырау облы­сының «қызыл аймаққа» енуіне ықпал етіп отыр. Бұған қоса облыстың мемлекеттік бас санитар дәрігері А.Жұмағалиевтің қаулысымен карантиндік шектеу шаралары қайта күшейтілді.

– Атырау облысының аумағында эпи­демиялық жағдай тұрақталғанға дейін шаруашылық, өзге де қызметпен және халықтың тыныс-тіршілігінің ерекше жағдайларымен шектеу шаралары енгізілсін. Шектеу іс-шараларының ре­жімі мен мерзімдері облыс аумағында COVID-19 коронавирус инфекциясының таралуы бойынша ахуалдың өзгеруіне сәйкес қайта қаралуы мүмкін, – делінген қаулыда.

Бас санитардың қаулысына сәйкес Теңіз кен орнында карантиндік және шектеу шаралары эпидемиялық жағдай тұрақталғанға дейін ұзартылды. Ал өңір тұрғындарына респираторлық инфекцияның алғашқы белгілері пайда болған кезде (құрғақ жөтел, қызба, тыныс алудың қиындауы, ентігу және т.б.) медициналық ұйымдарға бармай, 103-ке қоңырау шалу арқылы үйден меди­циналық көмекке жүгіну, қоғамдық тамақтану орындарында тамақтану кезін­де әлеуметтік арақашықтықты сақтай отырып және 5 (бес) жасқа дейінгі балаларды коспағанда, қоғамдық орындарда, баруға және демалуға арналған орындарда, қоғамдық көліктерде медициналық немесе мата бетперделерін кию міндеттелді. Жасы 65-тен асқан адамдарға азық-түлік, дәрі-дәрмек пен медициналық бұйымдарды, сондай-ақ қажетті тауарларды сатып алу­ды және медициналық мекемелерге баруды қоспағанда аса қажеттілік болмаса, тұрғылықты жерінен шықпауға ұсы­нылды. Сонымен бірге тұрғындар халық көп шоғырланатын жерлерге бар­мауы, әлеуметтік арақашықтықты, бетперде тәртібін, жеке бас гигиенасын сақтауы тиіс.

Бас санитар дәрігердің қаулысымен жергілікті әкімдіктерге көпшілік іс-шараларды (мерекелік, ойын-сауық, көпшілік мәдени, спорттық, білім беру іс-шараларын, көрмелерді, корпоративті, форумдарды, конференцияларды, сон­дай-ақ отбасылық, естелік іс-шараларды (банкеттер, үйлену тойлары, мерейтойлар, еске алу және т.б.), оның ішінде үйде және жаппай адамдар жиналатын өзге де іс-шараларды өткізуге ты­йым салу ұсынылып отыр. Мұның қата­рын­да ойын-сауық объектілерінің, банкет залдарының, барлық түрдегі ойын алаңдары (аулаларды қоспағанда), түнгі клубтардың, барлар, караоке, ком­пью­­терлік және ойын клубтарының, кальян, букмекерлік кеңселердің, ме­ре­келерді ұйымдастыру бойынша кей­терингтік қызметтердің, меншік нысанына қарамастан мектепке дейінгі балалар мекемелерінің (кезекші топтарды қоспағанда), мәдени нысандардың, жеке, топтық дайындықтарды қоса алғанда кинотеатрлардың, театрлардың қызметін тоқтата тұру да бар.

Соңғы тәуліктерде «қызыл аймақ­та» қалған жалғыз өңір – Атырау об­лысындағы тұрғындарды алаңдатқан эпидемиялық ахуалдың беталысы осылай қатталып отыр. Карантиндік шектеу шараларының қайтадан күшейтілуі қауіпті індеттің бетін қайтара ала ма? Әзірге бұған болжам жасауға ешкімнің жүрегі дауалар емес.

 

Атырау облысы